Ronaldo អរគុណមិត្តចាស់ Albert ដែលហ៊ានលះបង់រឿងនេះ ទើបធ្វើឲ្យខ្លួនមានដូចសព្វថ្ងៃ
Cristiano Ronaldo ពីអតីតក្មេងដែលស្ថិតក្នុងគ្រួសារក្រខ្សត់ ហើយត្រឹមជាយុវជនដូចគេឯទៀត ដែលមានការខិតខំក្នុងវិស័យបាល់ទាត់ មុនលោកមានគ្រប់យ៉ាងដូចពេលនេះ មិនថាតែទ្រព្យសម្បត្តិនិងកេរឈ្មោះ។
តាមពិតទៅ ក្នុងវិស័យបាល់ទាត់មួយនេះ មិនពឹងផ្អែកតែលើការខិតខំមួយមុខនោះទេ ទៀតសោតក៏លាយឡំនឹងសំណាង និងការជ្រោមជ្រែងពីមនុស្សជុំវិញខ្លួនផងដែរ។ និយាយមិនលាក់បាំង សម្រាប់តារាឆ្នើមសញ្ជាតិព័រទុយហ្គាល់ បានលើកឡើងថា ខ្លួនមានថ្ងៃនេះក៏ដោយសារតែមិត្តចាស់ Albert Fantrau ដែលគេព្រមលះបង់ឱកាសដ៏ពិសេសមួយ។
និយាយរៀបរាប់កាលពីពេលកន្លងទៅ បុរសវ័យ ៣៦ ឆ្នាំប្រាប់ថា៖ "ខ្ញុំមានតែការអរគុណដល់មិត្តចាស់របស់ខ្ញុំគឺ Albert Fantrau សម្រាប់ជោគជ័យទាំងអំបាលម៉ានដែលមានទល់សព្វថ្ងៃ ដោយសារកាលនោះយើងលេងនៅក្រុមតែមួយ សម្រាប់ឈុតក្រោមអាយុ ១៨ ឆ្នាំ ហើយនៅពេលក្រុមឃ្លាំមើលកីឡាករមកដល់ ពួកគេថា នរណារកបានគ្រាប់បាល់ច្រើនជាងគេ គឺមានឱកាសឡើងទៅលេងនៅឈុតថ្នាលបន្ត"។
លោកបន្តថា៖ "ពួកយើងឈ្នះការប្រកួតចុងក្រោយនោះ ៣-០ ដោយខ្ញុំរកបានគ្រាប់បាល់ទីមួយ ហើយ Albert រកបានគ្រាប់បាល់បន្ទាប់ជាការតែតបញ្ចូលទី លុះដល់គ្រាប់បាល់ទីបីជារឿងគួរឲ្យចាប់អារម្មណ៍សម្រាប់ពួកយើង ដោយពេលនោះ Albert គេញាក់បាល់មួយទល់នឹងមួយជាមួយអ្នកចាំទី ហើយគេមិនស៊ុតខ្លួនឯងបញ្ចូលទីនោះទេ ផ្ទុយទៅវិញគេបែរជាគាត់បាល់មកឲ្យខ្ញុំដែលកំពុងរត់ពីក្រោយគេ រួចខ្ញុំក៏បញ្ចប់ទីគ្រាប់ទីបីនោះ"។
"ក្រោយចប់ការប្រកួត ខ្ញុំទៅសួរគេថា ហេតុអ្វីអ្នកធ្វើអ៊ីចឹង ម្តេចមិនស៊ុតខ្លួនឯងទៅ គេក៏ឆ្លើយថា ព្រោះខ្ញុំដឹងច្បាស់ថា ឯងល្អជាងខ្ញុំ"។ នេះជាមិត្តភាពដ៏ល្អពិតប្រាកដ ហើយ Ronaldo ក៏បានឱកាសឡើងទៅលេងនៅឈុតថ្នាលបន្ទាប់ទៀត ស្របពេលដែល Albert ត្រូវបាត់បង់ឱកាសសារនោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
