ដឹងកុងត្រាថ្មីរបស់ Messi ហើយ ដែលលោកនឹងឈរជើងនៅ Barcelona ដល់អាយុប៉ុណ្ណេះ
Lionel Messi បានផុតកុងត្រាជាមួយក្លឹប Barcelona កាលពីចុងខែមិថុនា ឆ្នាំ ២០២១ កន្លងទៅ ដែលនេះមានន័យថា លោកឈរទំនេរជើងរយៈពេលជាង ១ ខែមកហើយ។ យ៉ាងណាការចរចាត្រូវបានគេរាយការណ៍កៀកនឹងឈានដល់ការសម្រេចហើយ ពោល M10 នឹងមិនទៅចូលរួមឲ្យក្លឹបដទៃ ក្រៅតែពី Barcelona ឡើយ។
តាមសារព័ត៌មាន Sport បានចុះផ្សាយ តារាឆ្នើមវ័យ ៣៤ ឆ្នាំ បានព្រមព្រៀងទម្លាក់ចុងប៊ិចចុះហត្ថលេខាលើកុងត្រាថ្មី រយៈពេល ៥ ឆ្នាំជាមួយ Barcelona ដែលមានន័យថា នឹងរក្សាជើងលោកដល់ឆ្នាំ ២០២៦ ពេលលោកមានអាយុ ៣៩ ឆ្នាំ។ ការប្រកាសនឹងធ្វើឡើងនៅពេលដ៏ខ្លីខាងមុខ មុនដល់ការប្រកួតមិត្តភាពទល់ក្លឹប Juventus នៅឯ Camp Nou នាថ្ងៃទី ៨ សីហា។
គួរបញ្ជាក់ថា ទន្ទឹមនឹងកុងត្រាថ្មីនេះ Messi ពុំអាចទទួលបានថ្លៃពលកម្មពេញដូចមុនទៀតទេ ពោលនឹងត្រូវកាត់បន្ថយ ៥០ ភាគរយ ដូចបណ្តាកីឡាករដទៃទៀតអ៊ីចឹងដែរ ដែលមានន័យថា កីឡាករអាហ្សង់ទីនអាចទទួលបានក្បែរ ២៥០ ០០០ ផោន/សប្ដាហ៍ប៉ុណ្ណោះ។
ការចាយពេល ១៦ ឆ្នាំនៅ Camp Nou តារាឆ្នើមពាក់អាវលេខ ១០ បង្ហាញខ្លួន ៧៧៨ ប្រកួត រកបាន ៦៧២ គ្រាប់និង Assist ៣០៥ លើក។ រាប់ទាំងពានឯកត្តជននិងពានរង្វាន់រួម Messi លើកមិនក្រោម ៣៥ ពានឡើយជាមួយ Barcelona៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
