Vieri៖ “បន្ទាប់ពី Haaland ទៅ គោលដៅក្លឹប Arsenal/Spurs រូបនេះជាខ្សែប្រយុទ្ធល្អបំផុតនៅអឺរ៉ុប”
បើនិយាយពីកីឡាករនៅអាយុស្រករ ២០-២១ ឆ្នាំ អាចនិយាយថា Erling Haaland គឺជាកីឡាករល្អបំផុតហើយនៅពេលបច្ចុប្បន្ននេះ ព្រោះទាំងការរកគ្រាប់បាល់ និងការ Assist គឺគេធ្វើបាននៅតួលេខខ្ពស់ដាច់គេ បើធៀបនឹងអ្នកឯទៀត។
ដូចគ្នានឹងការយល់ឃើញរបស់អតីតជើងចាស់លោកChristian Vieri ដែលថា Haaland ក៏ល្អបំផុតដែរ តែបើសួរពីអ្នកបន្ទាប់នោះ គឺជាកីឡាកររបស់ក្លឹប Fiorentina ដែលមានវ័យ ២១ ឆ្នាំ Dusan Vlahovic។ កាលពីរដូវកាលមុនកីឡាករស៊ែប បង្ហាញខ្លួន ៤០ ប្រកួត រកបាន ២១ គ្រាប់ឲ្យក្លឹប។
ប្រាប់សារព័ត៌មាន Gazzetta dello Sport លោក Vieri និយាយ៖ "Vlahovic បន្ទាប់ពី Haaland ទៅ គឺគេជាខ្សែប្រយុទ្ធល្អបំផុតនៅអឺរ៉ុបសម្រាប់អ្នកស្រករអាយុល្បាក់ៗហ្នឹង ដោយគេជាខ្សែប្រយុទ្ធកំពូល អាចធានាបានការរក ២០ គ្រាប់យ៉ាងងាយនៅរដូវកាលបន្ទាប់"។
បញ្ជាក់ថា Vlahovic បច្ចុប្បន្នសេសសល់សុពលភាពកុងត្រាជាមួយ Fiorentina ដល់ឆ្នាំ ២០២៣ ហើយមានក្លឹបធំៗ ២ ចង់បានគេ ដូចជា Tottenham Hotspur និង Arsenal។ តម្លៃផ្តាច់កុងត្រារបស់បុរសសញ្ជាតិស៊ែប ថ្លៃប្រមាណ ៧០ លានអឺរ៉ូ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
