Evra៖ “ម្នាក់នេះនឹងក្លាយជា Rio Ferdinand ទី ២ នៅ Manchester United”
អតីតកីឡាករជើងចាស់លោក Patrice Evra បានប្រដូចចំណូលថ្មី ដែលទើបផ្ទេរមក Old Trafford នោះគឺ Raphael Varane ថានឹងក្លាយជា Rio Ferdinand សម័យកាលថ្មីនៅក្លឹបបិសាចក្រហម Manchester United។
បញ្ជាក់ថា កីឡាករបារាំងទើបតែសម្រេចការផ្ទេរមកក្លឹបអង់គ្លេស ក្រោមតម្លៃ ៥០ លានអឺរ៉ូ ជាមួយកុងត្រារយៈពេល ៥ ឆ្នាំ។ ការផ្ទេរចេញសារនេះ ពិតជាធ្វើឲ្យអ្នកគាំទ្រក្លឹប Real Madrid មានការសោកស្តាយជាខ្លាំង ព្រោះ Varane គេក៏រាប់បានជា Legend កាន់ឆ្នាំមួយរូបដែរបន្ទាប់ពី Sergio Ramos និង Marcelo។
ក្រឡេកមក Evra បាននិយាយប្រាប់ The Athletic បែបនេះ៖ "Varane គេកំពុងធ្វើឲ្យខ្ញុំនឹកដល់ Rio Ferdinand ដែលលេងល្អទាំងបាល់ក្រោម និងបាល់លើអាកាស និយាយទៅគេជាខ្សែការពារកណ្តាលដ៏ពេញលេញម្នាក់ ហើយខ្ញុំចាំបានកាលប្រកួតដំបូងឲ្យជម្រើសជាតិបារាំងជាមួយ Varane គឺពិតជាគួរឲ្យចាប់អារម្មណ៍ខ្លាំងណាស់"។
លោកបន្ត៖ "គេនៅក្មេង គេមានល្បឿនលឿន ហើយការដណ្តើមយកបាល់ក៏ល្អឥតខ្ចោះថែមទៀត ដោយគេលេងដោយមានចិត្តត្រជាក់ តែគេក៏អាចជាអ្នកស៊ុតបញ្ចូលទីបានដែរ នេះពិតជាការចុះហត្ថលេខាដ៏អស្ចារ្យមួយសម្រាប់ Manchester United"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
