Aston Villa ហ៊ានបន្ថែមថ្លៃពលកម្មប៉ុណ្ណេះឲ្យ Grealish ដល់ស្មើ Rashford ដើម្បីជៀស City យកបាន
ក្លឹបមេឃខៀវ Manchester City កំពុងមានដំណឹងថា ចង់ចរចាយកខ្សែបម្រើ Jack Grealish ទៅចូលរួមនៅទីផ្សារដោះដូររដូវក្តៅនេះ ហើយវាហាក់ធ្វើឲ្យសាមីខ្លួនផ្ទាល់កំពុងមានការស្ទាក់ស្ទើរ ថាគួរបន្តនៅក្លឹបបច្ចុប្បន្ន Aston Villa ឬចាកចេញ។
ខាងក្លឹបអាណាព្យាបាល Villa ក៏មិនបង្អង់យូរនោះដែរ ដោយពួកគេបានប្រើប្រាស់យុទ្ធសាស្ត្រចរចាបន្ថែមថ្លៃពលកម្មថ្មីសម្រាប់ Grealish ដោយហ៊ានឲ្យដល់ ២០០ ០០០ ផោន/សប្តាហ៍ បន្ថែមពីថ្លៃពលកម្មចាស់ទទួលបានត្រឹម ១២០ ០០០ ផោន/សប្តាហ៍ប៉ុណ្ណោះ។ ទំហំថ្លៃពលកម្មថ្មីនេះ នឹងអាចរុញឲ្យកីឡាករអង់គ្លេសអាចឈានដល់កម្រិតរបស់ Marcus Rashford និង Mohamed Salah ជាដើម ពោលនៅបញ្ជី Top 10 ប្រចាំក្របខ័ណ្ឌ Premier League។ នេះបើតាមសារព័ត៌មាន TheSun បានចុះផ្សាយ។
គួរបញ្ជាក់ថា ខាង City ហ៊ានឲ្យតម្លៃផ្ទេរ Grealish ដល់ ៩០ លានផោនឯណោះ ហើយខាង Villa ពិតជាមិនចង់ឲ្យកីឡាករដ៏សំខាន់របស់ខ្លួនចាកចេញទៅឡើយ។ ដូច្នេះមានតែការបន្ថែមថ្លៃពលកម្មថ្មីប៉ុណ្ណោះ ដែលសង្ឃឹមអាចអូសទាញគ្រាប់ពេជ្រមួយនេះឲ្យបន្តឈរជើងនៅ Villa Park តទៅទៀត។
គួរឲ្យដឹងថា Grealish បានចំណាយពេលជាមួយ Aston Villa តាំងពីកាលនៅឈុតយុវជន U18 មកដល់ U21 ហើយឡើងមកឈុតធំនៅឆ្នាំ ២០១៣ រួចបន្តឈរជើងមកទល់បច្ចុប្បន្ន។ ចូលរួមប្រកួតសរុប ២១៣ លើក គេរកបាន ៣២ គ្រាប់និង Assist ៤៣ លើកឲ្យក្លឹប៕
ប្រភព៖ Sportsmole
ព័ត៌មានថ្មីៗ
