ក្លឹប PSG សម្លឹងឃើញគោលដៅថ្មីម្នាក់ ដោយហ៊ានឲ្យថ្លៃពលកម្មខ្ពស់ជាងមុន ១ ទ្វេជា ៣
ក្លឹបបារាំង Paris Saint-Germain ត្រូវបានគេរាយការណ៍ថា កំពុងសម្លឹងឃើញខ្សែការពារឆ្នើមរបស់ក្លឹប AC Milan នោះគឺ Theo Hernandez ដោយចង់ប្រើប្រាស់យុទ្ធសាស្រ្តបន្ថែមថ្លៃពលកម្មទ្វេ ១ ជា ៣ ដើម្បីអូសទាញគេឲ្យចេញពីក្លឹបនៅអ៊ីតាលី។
កីឡាករវ័យ ២៣ ឆ្នាំត្រូវបានក្លឹប Milan ទិញគេចេញពី Real Madrid នៅតម្លៃផ្ទេរ ២១,៥ លានអឺរ៉ូ កាលពីឆ្នាំ ២០១៩។ ឥឡូវសេសសល់សុពលភាពកុងត្រាដល់ឆ្នាំ ២០២៤ ខណៈហាងឆេងថ្លៃខ្លួនអាចឡើងដល់ ៥០ លានអឺរ៉ូហើយ។
យ៉ាងណា PSG មើលឃើញថា កីឡាករវ័យ ២៣ ឆ្នាំអាចមកបន្ថែមគុណភាពនៅតំបន់ការពារក្រោម ជាមួយចំណូលថ្មី Ramos និង Hakimi បាន ជាពិសេសក្រោយឃើញស្ថិតិដ៏ល្អនៅ ៤៥ ប្រកួតឲ្យ Milan រកបាន ៨ គ្រាប់និង Assist ៨ លើក។
ទាក់ទងនឹងទំហំថ្លៃពលកម្ម Hernandez នៅ AC Milan បច្ចុប្បន្នទទួលបានប្រាក់ទាបខ្លាំង ត្រឹមតែ ១,៥ លានអឺរ៉ូប៉ុណ្ណោះ ក្នុងមួយរដូវកាល ហើយប្រសិនគេព្រមមក PSG នោះនឹងបានដល់ ៥ លានអឺរ៉ូឯណោះ ដែលទាបជាងដៃថ្មី Gianluigi Donnarumma ខ្ទង់ ៣ លានអឺរ៉ូ៕
ប្រភព៖ SportBible
ព័ត៌មានថ្មីៗ
