ជើងខ្លាំងលេខ១កម្ពុជា ចាន់ រតនា ជឿជាក់ថា អាចយកឈ្នះ Eko Roni បាន
អ្នកលេងគុនចម្រុះកម្ពុជា ចាន់ រតនា រីករាយទទួលការប្រកាសចង់ជួបរបស់កីឡាករឥណ្ឌូណេស៊ី “Dynamite” Eko Roni Saputra កាលពីពេលថ្មីៗនេះ ហើយរូបគេជឿជាក់ថា អាចយកឈ្នះតារាគុនចម្រុះឥណ្ឌូណេស៊ីនេះបាន។
ចាន់ រតនា អាយុ៣៥ឆ្នាំបាននិយាយថា ៖«ខ្ញុំរីករាយក្នុងការជួប Eko Roni»។
«ខ្ញុំគិតថា គាត់ចង់សងសឹកឲ្យមិត្តរួមជាតិ។ គាត់មានសមត្ថភាពមិនចាញ់ Rudy Agustian និង Abro Fernandes ឡើយ។ តែសម្រាប់ការប្រកួតនេះ ខ្ញុំត្រូវតែរក្សាកំណត់ត្រាជ័យជម្នះរបស់ខ្ញុំទល់នឹងកីឡាករឥណ្ឌូណេស៊ីឲ្យបាន»។
https://youtu.be/YAeqI81Rlf4
ជាការពិតណាស់ អ្នកលេងគុនចម្រុះលេខ១កម្ពុជា ចាន់ រតនា បានផ្តួលជើងខ្លាំងឥណ្ឌូណេស៊ី២នាក់មកគឺកាលពីខែធ្នូ ឆ្នាំ២០១៨ នៅព្រឹត្តិការណ៍ ONE: DESTINY OF CHAMPIONS តារាទូតសុច្ឆន្ទៈរបស់ Cellcard បានផ្តួល Abro “The Black Komodo” Fernandes ក្នុងទឹកទី២ និងបន្តផ្តួល Rudy “The Golden Boy” Agustian ក្នុងទឹកទី២ទៀតនៅ ONE: FOR HONOR ឆ្នាំ២០១៩។
ការប្រកួតជាមួយជើងខ្លាំងឥណ្ឌូណេស៊ីខាងលើទាំងពីរពិតជាពិបាកខ្លាំងសម្រាប់ ចាន់ រតនា ដោយសារអ្នកទាំងពីរខ្លាំងក្បាច់គុនចម្រុះដូចគ្នា។ យ៉ាងណា រូបគេទប់ទល់បាន ហើយប្រើជំនាញគុនខ្មែរដើម្បីបញ្ចប់ដៃគូ។ ដូច្នេះ Saputra ក៏ល្អជំនាញក្រោមដែរ។
រចនា បានទទួលស្គាល់ថា ៖«គាត់ល្អជំនាញក្រោម។ នៅពេលខ្ញុំមើលវីដេអូគាត់ ខ្ញុំឃើញថា ជំនាញក្រោមរបស់គាត់ល្អជាងខ្ញុំ ដូច្នេះខ្ញុំត្រូវតែប្រុងប្រយ័ត្នជំនាញក្រោមរបស់គាត់»។
«ប៉ុន្តែផ្អែកតាមបទពិសោធ ខ្ញុំតែងតែឈ្នះដៃគូដែលល្អជំនាញក្រោម។ ដូច្នេះលើកនេះ ខ្ញុំមានទំនុកចិត្តថា អាចតស៊ូបាន»។
ចាប់តាំងពីប្រឡូកចូលគុនចម្រុះមក ជើងខ្លាំងឥណ្ឌូណេស៊ី Saputra បានអភិវឌ្ឍខ្លួនក្លាយជាអ្នកលេងគុនចម្រុះកម្រិតពិភពលោកម្នាក់ ហើយជំនាញវ៉ៃឈរក៏មិនធម្មតាដែរ ពីព្រោះរូបគេក៏កំពុងហ្វឹកហាត់មួយថៃនៅក្លឹប Evolve MMA ប្រទេសសិង្ហបុរី។
តារាប្រដាល់តំណាងផ្សព្វផ្សាយឲ្យ Cellcard បាននិយាយថា ៖«បើនិយាយពីជំនាញវ៉ៃឈរ ខ្ញុំមិនអាចមើលស្រាលគាត់បានទេ ពីព្រោះខ្ញុំមិនទាន់សិក្សាពីគាត់ច្បាស់នៅឡើយ»។
«ខ្ញុំអាចនិយាយបានថា គាត់ល្អជំនាញក្រោម ដូច្នេះអ្វីដែលខ្ញុំផ្តោតយកចិត្តទុកដាក់គឺកម្លាំងស៊ុហ្វរបស់ខ្ញុំ និងក្បាច់ការពារចាប់បោករបស់គាត់។ នៅពេលខ្ញុំអាចទប់ទល់ជំនាញក្រោមរបស់គាត់បាន នោះជាឱកាសខ្ញុំប្រើជំនាញគុនខ្មែរវ៉ៃបកហើយ»។
តាមការផ្តោតលើគន្លឹះសំខាន់ៗបន្ថែមទៀត ចាន់ រតនា ជឿជាក់ថា រូបគេអាចយកឈ្នះតារាប្រដាល់ឥណ្ឌូណេស៊ីទី៣បាន ហើយប្រហែលជាចប់ពាក់កណ្តាលទី។រតនា និយាយថា ៖«ខ្ញុំអាចយកឈ្នះ Eko បាន តែខ្ញុំមិនហ៊ាននិយាយថា ឈ្នះដោយពិន្ទុ ឬសន្លប់។ ប៉ុន្តែខ្ញុំមិនគិតថា យើងទាំងពីរចប់ទឹកពេញទេ»។
តាមពិតទៅ ចាន់ រតនា មិនមែនជាកីឡាករម្នាក់ដែលជើងខ្លាំងឥណ្ឌូណេស៊ីប្រកាសចង់ជួបទេ។ Saputra ក៏បានប្រកាសជួបកីឡាករ “Saint Lion” Mangatដែរ។ទាំង ចាន់ រតនា និង Mangat សុទ្ធតែជើងខ្លាំងដែលអ្នកគាំទ្រចង់ឃើញអ្នកទាំងពីរឡើងសង្វៀនជួប Saputra ប៉ុន្តែ ចាន់ រតនា សង្ឃឹមខ្ពស់បានជួប Saputra៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
