ជើងខ្លាំងឥណ្ឌូណេស៊ី Eko Roni ប្រកាសចង់ជួបជើងខ្លាំងកម្ពុជា ចាន់ រតនា
អ្នកលេងគុនចម្រុះឥណ្ឌូណេស៊ី “Dynamite” Eko Roni Saputra ប្រកាសចង់ជួបជើងខ្លាំងលេខ១កម្ពុជា ចាន់ រតនា ដើម្បីសងសឹកឲ្យមិត្តរួមជាតិ។
Saputra បានលើកហេតុផលថា ៖«ចាន់ រតនា បានផ្តួលកីឡាករឥណ្ឌូណេស៊ីពីរបីនាក់ហើយ ដូច្នេះច្បាស់ គាត់នឹងក្លាយជាដៃគូលំបាកសម្រាប់ខ្ញុំ»។ចាន់ រតនា បានក្លាយជាអ្នកលេងគុនចម្រុះកម្ពុជាដ៏ល្បីល្បាញតាមរយៈក្បាច់ប្រយុទ្ធគុនខ្មែរដ៏ជំនាញ និងបានអភិវឌ្ឍជំនាញក្រោមដ៏ល្អដែរ។ កីឡាករស្ថិតនៅទីក្រុងភ្នំពេញទទួលបានជ័យជម្នះ៦លើកលើឆាកប្រដាល់ពិភពលោក ONE ក្នុងនោះផ្តួលជើងខ្លាំងឥណ្ឌូណេស៊ី Abro Fernandes និង Rudy Agustian។
ប្រការនេះហើយដែលធ្វើឲ្យ Saputra ចង់សាក និងជាឱកាសសងសឹកឲ្យមិត្តរួមជាតិផងដែរ។ កីឡាករនិយាយថា ៖«រតនាល្អក្បាច់វ៉ៃឈរ ដូច្នេះខ្ញុំចង់ជួបគាត់ ហើយខ្ញុំនឹងលេងល្បាច់ក្រោមជាមួយគាត់។ ច្បាស់ណាស់ សម្រាប់ខ្ញុំ បើជួបគ្នាមែននឹងក្លាយជាការប្រកួតគួរឲ្យចាប់អារម្មណ៍រវាងអ្នកជំនាញវ៉ៃឈរ ប៉ះអ្នកពូកែក្បាច់ក្រោម»។
ជើងខ្លាំងឥណ្ឌូណេស៊ី Eko Roni Saputra ធ្លាប់ប្រកួតនៅ ONE បាន៥លើកក្នុងនោះទទួលបានជ័យជម្នះ៤ដង និងចាញ់១។ ក្នុងចំណោមជ័យជម្នះទាំង៤ដងនោះ រូបគេក៏ធ្លាប់ផ្តួលកីឡាករកម្ពុជា ខុន ស៊ីចាន់ នៅក្នុងទឹកទី១កាលពីខែកុម្ភៈ ឆ្នាំ២០២០។ ប្រការនេះ ក៏ជាឱកាសសម្រាប់ ចាន់ រតនា ដើម្បីសងសឹកឲ្យមិត្តរួមជាតិដែរ។
អ្វីគួរឲ្យចាប់អារម្មណ៍ក្រៅពីមានឆន្ទៈសងសឹកឲ្យមិត្តរួមជាតិរៀងៗខ្លួន អ្នកទាំងពីរក៏ប្តេជ្ញាបង្កើតកំណត់ត្រាដែរក្នុងនោះ Eko Roni ចង់ក្លាយជាកីឡាករឥណ្ឌូណេស៊ីទី១អាចយកឈ្នះ ចាន់ រតនា បន្ទាប់ពីកីឡាករឥណ្ឌូណេស៊ីពីរនាក់បរាជ័យ។ ចំណែក ចាន់ រតនា នឹងរក្សាកំណត់ត្រាជ័យជម្នះរបស់ខ្លួនលើកីឡាករឥណ្ឌូណេស៊ី។
តាមរយៈការដង្ហោយហៅរកដៃគូនេះ ជើងខ្លាំង Saputra ទន្ទឹងរង់ចាំការឆ្លើយតបរបស់ជើងខ្លាំងគុនខ្មែរ ចាន់ រតនា ថាតើទទួលយកឬចង់ជួបដៃគូផ្សេង៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
