អារម្មណ៍នៅពេលដែលត្រូវបាត់បង់ មនុស្សដែលខ្លួនស្រឡាញ់ខ្លាំង វាជាអារម្មណ៍ដែលអាក្រក់បំផុត
អារម្មណ៍ត្រូវបាត់មនុស្សជាទីស្រឡាញ់ ជាអារម្មណ៍ដែលពិបាកណាស់ ទោះបីជាខ្ញុំខំលួងខ្លួនឯងថា ខ្ញុំគ្រាន់តែបាត់បង់មនុស្សក្បត់ស្នេហ៍ម្នាក់ តែគេបាត់បង់មនុស្សដែលស្រឡាញ់គេបំផុត ក៏ខ្ញុំនៅតែអត់ឈឺចាប់មិនបានដែរ ព្រោះហេតុអីមែនទេ? ហេតុផល ព្រោះតែខ្ញុំមានការចងចាំល្អ និងអនុស្សារីយ៍ជាច្រេីនជាមួយគេ។
គ្រប់ពេលដែលចេញទៅក្រៅ គឺឃេីញសុទ្ធតែកន្លែងធ្លាប់ទៅជាមួយគេ ទៅកន្លែងញ៊ាំអីក៏នឹកឃេីញរបស់ដែលគេចូលចិត្ត ជួនកាលក៏ចុកចាប់ដោយសារសំណូរបស់អ៉ីអ្នកលក់ដែលសួរថា "ចុះម្នាក់ទៀតទៅណា?" ត្រឡប់មកសម្ងំក្នុងបន្ទប់ មិនចេញទៅណាក៏គិតថានឹងបានធូរ តែវាក៏មិនធូរ វាដូចជាយ៉ាប់លេីសដេីមទៅវិញ។
ពេលក្រោកពីគេងភ្លាម ក៏ចាប់ផ្តេីមមានអារម្មណ៍ស្មុគស្មាញភ្លាមតែម្តង មានអារម្មណ៍ថាហេលហាលដូចបាត់អីម៉្យាងពីក្នុងជីវិត មានអារម្មណ៍ថាធីងធោងវិលៗ មិនចង់ក្រោកសោះ សំឡេងសារក៏ស្ងាត់ខុសពីរាល់ដង បេីកទូរសព្ទមកក៏គ្មានអ្នកណា Good Morning អីដែរ តាមពិតវាជាអារម្មណ៍ខូចចិត្តបាត់បង់ស្នេហាហ្នឹងហេីយ។
ខ្ញុំពិតជាពិបាកទ្រាំណាស់ វាខុសទម្លាប់ បាត់មនុស្សដែលធ្លាប់តែជិតស្និទ្ធុិ ប៉ុន្តែពេលនេះបែរជាមានឈ្មោះត្រឹមជាអ្នកដទៃ ធ្លាប់ដឹងគ្រប់យ៉ាងពីគេ តែមេីលចុះពេលនេះ សូម្បីគេញ៊ាំបាយឬនៅ ក៏ខ្ញុំមិនដឹងផង ធ្លាប់តែទៅណាពីរនាក់ តែពេលនេះបេីដេីរៗជួបមុខគេ ប្រហែលជាមិនអាចសូម្បីញញឹមផង គឺមានតែដេីរចៀស។
មួយប៉ព្រិចភ្នែកសោះ អ្វីៗគ្រប់យ៉ាងក៏ត្រូវផ្លាស់ប្តូរក្រោយពេលបែកគ្នា ខ្ញុំពិតជាពិបាកធ្វេីចិត្តទទួលយកពិតមែន ខ្ញុំត្រូវដេកនឹកដល់មនុស្សក្បត់ ព្រោះគេធ្លាប់ជាមនុស្សខ្ញុំស្រឡាញ់ខ្លាំង ទាំងដែលគេមិនខ្វល់ពីខ្ញុំ មិនខូចចិត្តនឹងការបែកគ្នាមួយនេះ តែចំណែកខ្ញុំវិញ នឹកដល់គេពេលណាក៏ទឹកភ្នែកហូរ បាយមិននឹកទឹកមិនស្រេក គិតតែយំ យំដល់គេងលក់ ហេីយខ្ញុំក៏សួរខ្លួនឯងថា ត្រូវប្រេីពេលយូរប៉ុនណាទេីបឈប់ខូចចិត្ត។
តែមិនយូរប៉ុន្មាន ខ្ញុំក៏អាចឆ្លងកាត់វាទៅបាន ក្រោយមកខ្ញុំក៏កាត់ចិត្តបានពិតមែន ខ្ញុំអាចដេីរជ្រួសផ្លូវជាមួយគេដោយគ្មានអារម្មណ៍អីសោះ ប៉ុន្តែដឹងទេថា ខ្ញុំត្រូវចំណាយពេលអស់ប៉ុន្មាន? គឺ ១ឆ្នាំ ៦ខែ ស្រឡាញ់ហេីយមិនងាយដកចិត្ត ទោះគេធ្វេីឱ្យឈឺក៏ដោយ ដូច្នោះហេីយបេីមិនច្បាស់លាស់កុំចូលមកលេងសេីចបេះដូងខ្ញុំ ខូចចិត្តម្តងៗរាប់ខែ រាប់ឆ្នាំ មិនមែនងាយស្រួលទេ៕
អត្ថបទ ៖ អេដមីន ហត់ / Knongsrok
ព័ត៌មានថ្មីៗ
