ការទ្រាំរបស់មនុស្សមានដែនកំណត់ សុំទោស! ដែលខ្ញុំដើរចេញ ព្រោះមិនអាចទ្រាំនឹងអ្នកបន្តទៀតបាន
ការទ្រាំរបស់មនុស្សមានដែនកំណត់ អ្នកគិតចង់ឱ្យខ្ញុំអត់ធ្មត់ទ្រាំទ្រជាមួយទង្វេីយ៉ាប់ៗ មិនខ្វល់អារម្មណ៍ខ្ញុំរហូតទៅអ៊ីចឹងមែនទេ? ពេលខ្ញុំនៅទ្រាំ ខ្ញុំនៅព្រមអភ័យ អត់ឱនលេីកលែង អ្នកក៏ថាខ្ញុំល្អ ខ្ញុំពូកែទ្រាំ ដល់ពេលខ្ញុំដាច់ចិត្ត ខ្ញុំឈប់ធ្វេីល្ងង់តទៀត ខ្ញុំឈប់ទ្រាំ អ្នកក៏ចាប់ផ្ដើមគិតថាខ្ញុំនេះអាក្រក់។
ខ្ញុំមិនស្រឡាញ់អ្នក ហេតុអីអ្នកចេះតែបន្ទោសខ្ញុំបែបនេះ? គ្មានអ្នកណាចង់ដេីរចេញពីមនុស្សដែលខ្លួនឯងស្រឡាញ់ទេ អ្នកគិតមែនទេថាខ្ញុំមិនឈឺចាប់ ត្រូវហេីយខ្ញុំឈឺចាប់ណាស់ តែបេីឱ្យខ្ញុំនៅទ្រាំរស់នៅជាមួយមនុស្សដែលមិនខ្លាចបាត់បង់ខ្ញុំផងនោះ ខ្ញុំគិតថាការដេីរចេញជាជម្រេីសល្អបំផុតហេីយ។
អ្នកចង់ចោទខ្ញុំយ៉ាងម៉េចក៏បាន ព្រោះខ្ញុំឈប់ខ្វល់ទៀតហេីយ ខ្ញុំសុំយកពេលខ្វល់ពីខ្លួនឯងម្តង ព្រោះកន្លងមកខ្ញុំរវល់តែខ្វល់ពីអ្នក គិតពីអារម្មណ៍របស់អ្នកខ្លាំងពេក រហូតដល់ភ្លេចគិតថាខ្លួនឯងកំពុងតែឈឺចាប់ដែរ។ អ្នកនិយាយពេញៗមាត់ថាស្រឡាញ់ខ្ញុំ តែទង្វេីថាស្រឡាញ់របស់អ្នកខ្ញុំបានទទួលតិចតួចបំផុតហេីយ តិចសឹងថាមិនអាចមេីលឃេីញផង។
ភាសាស្នេហ៍ប្រេីបានតែពេលណាយេីងត្រូវគ្នា តែពេលឈ្លោះវិញអ្នកពិតជាប្រេីសម្តីដែលខ្ញុំពិបាកនឹងទទួលយកខ្លាំងណាស់ តែខ្ញុំក៏នៅតែព្រមអត់ឱនព្រោះគិតថាជាសម្តីពេលខឹង អ្នកធ្វេីអី ឬនិយាយអី អ្នកក៏មិនដែលខ្វល់គិតទេថាខ្ញុំនឹងមានអារម្មណ៍បែបណា ខ្ញុំខឹងដែរទេ ខ្ញុំអន់ចិត្តដែរទេ អ្នកដឹងត្រឹមក្តីសុខខ្លួនឯងតែប៉ុណ្ណោះ អ្នកមិនគោរព ឱ្យតម្លៃខ្ញុំជាសង្សារទេ អ្នកចង់ទៅណាក៏ទៅស្រេចតែចិត្ត កុំថាឡេីយសុំការអនុញ្ញាត សូម្បីតែប្រាប់ជាដំណឹងអ្នកមិនប្រាប់ផង។
អ្វីដែលខ្ញុំហាមមិនចង់ឱ្យអ្នកធ្វេីអ្នកក៏រឹតតែធ្វេី អ្នកមិនដែលទទួលស្តាប់យោបល់អីពីខ្ញុំទេ អ្នកស្រែកថាខ្ញុំមិនយល់ពីអ្នក ទាំងអ្នកមិនដែលព្យាយាមយល់ពីខ្ញុំម្តងណាឡេីយ អ្នកប្រាប់ខ្ញុំថាមិនចូលចិត្តឱ្យខ្ញុំធ្វេីបែបនេះបែបនោះ តែអ្នកក៏មិនដែលសួរខ្ញុំទេថា ចូលចិត្តអីមិនចូលចិត្តអី នេះមែនទេការស្រឡាញ់របស់អ្នក?
ពីមុនខ្ញុំនៅស្រឡាញ់ ខ្ញុំក៏នៅទ្រាំបាន ខ្ញុំក៏តែងតែលេីកលែង ខ្ញុំអត់ធ្មត់គ្រប់សព្វបែបយ៉ាង តែពេលនេះខ្ញុំឆ្អែត ទង្វេីគ្រប់យ៉ាងរបស់អ្នកវាគ្រប់គ្រាន់ហេីយសម្រាប់ខ្ញុំ ខ្ញុំទ្រាំបានតែមិនមែនរហូតទេ ខ្ញុំទ្រាំនៅកន្លែងដែលគេមិនឱ្យតម្លៃខ្ញុំបានដល់ពេលនេះ ក៏ចាត់ទុកថាយូរពេកណាស់ទៅហេីយ ពេលនេះខ្ញុំសុំរកក្តីសុខឱ្យខ្លួនឯងម្តងវិញ មុននឹងខ្ញុំដេីរចេញ ខ្ញុំទ្រាំហេីយទ្រាំទៀត ទ្រាំឡេីងឆ្អែតឆ្អន់ហេីយ លទ្ធផលដែលកេីតមានសុទ្ធតែមានអ្នកបង្កហេតុ មិនមែនសុខៗខ្ញុំដាច់ចិត្តដេីរចេញពីមនុស្សដែលខ្ញុំស្រឡាញ់បែបនេះទេ៕
អត្ថបទ ៖ អេដមីន ហត់/Knongsrok
រក្សាសិទ្ធិដោយ៖ ក្នុងស្រុក
ព័ត៌មានថ្មីៗ
