បើបានជួបបុរសធ្វើរឿង ៩ យ៉ាងនេះ ចូរថែរក្សាគេឲ្យល្អ អ្នកជាមនុស្សស្រីសំណាងបំផុតហើយ
បើបានជួបបុរសដែលល្អបំផុតហើយ ចូរថែរក្សាគេឲ្យបានល្អផង ព្រោះប្រភេទមនុស្សប្រុសបែបហ្នឹងពិបាករកណាស់។
ក្នុងអត្ថបទនេះ Knongsrok បង្ហាញសកម្មភាពទាំង ៩ យ៉ាង ប្រសិនណាបុរសបង្ហាញមកហើយ មានន័យថាគេជាមនុស្សដែលស្រលាញ់អ្នកខ្លាំងបំផុត ហើយយើងជានារីគួរចេះយកចិត្តទុកដាក់នឹងគេ កុំឲ្យគេរបូតពីដៃបាន៖
៩) គេព្រមផ្លាស់ប្តូរដើម្បីអ្នក
មនុស្សប្រុសខ្លះប្រកាន់គោលជំហររបស់គេ ឲ្យតែចរិតពីដើមរបស់គេបែបណា គឺគេនៅតែបែបហ្នឹងជារៀងរហូត។ ប៉ុន្តែបើគេអាចផ្លាស់ប្តូរ ដើម្បីសម្របតាមអ្នក ដើម្បីក្តីសុខរបស់អ្នក នោះមានន័យថាគេស្រលាញ់អ្នកខ្លាំងហើយ។
៨) គេទម្លាយរឿងគ្រប់យ៉ាងឲ្យអ្នកដឹង
ស្តាប់ទៅមានអារម្មណ៍ថាជឿជាក់ខ្លាំងណាស់ ហើយគ្មានអ្វីត្រូវលាក់បាំងគ្នាទេ។ ពិតហើយបើគេព្រមប្រាប់មកយើងគ្រប់យ៉ាង មិនថារឿងផ្ទាល់ខ្លួន ឬផែនការណ៍ជីវិតអីនោះ គឺរាប់ថាគេជាបុរសស្មោះត្រង់ដែលយើងអាចទុកចិត្តបាន។
៧) គេបំពេញឲ្យអ្នកគ្រប់គ្រាន់មុន
មិនថាតែរបស់ប្រើប្រាស់ របស់ហូបចុក បើគេសុខចិត្តឲ្យអ្នកឆ្អែត ហើយគេចាំរកតាមក្រោយនោះ ក៏រាប់ថាជាបុរសល្អម្នាក់ដែរ។ ជាឧទាហរណ៍សាមញ្ញពីរបស់ប្រើប្រាស់ បើគេស៊ូប្រើរបស់អន់ ហើយឲ្យយើងប្រើរបស់ទំនើប ដើម្បីយើងងាយស្រួលក្នុងការប្រើប្រាស់ ក៏ពិបាករកបុរសបែបហ្នឹងដែរ។
៦) គេមើលថែអ្នកបានដិតដល់
គេដឹងថាអ្នកចូលចិត្តអ្វី ចំណូលចិត្តរបស់អ្នកគឺអ្វី ហើយដើរទៅណាមកណា ក៏គេដឹងច្បាស់ពីអ្នកជាងនរណាបង្អស់ដែរ។ ឧទាហរណ៍៖ គេដឹងថាអ្នកឧស្សាហ៍ប៉ះនេះប៉ះនោះ ត្រូវដៃជើងណាស់ មិនសូវប្រយ័ត្នទេ គ្រប់ពេលគេក៏តែងតែត្រៀមប្រេងខ្យល់ ប្រេងក្រឡា ដើម្បីទុកចាំលាបឲ្យអ្នក។
៥) គេផ្តល់ឱកាសឲ្យអ្នក
មនុស្សមិនមែនថាមិនចេះខុសនោះទេ តែបើយើងខុសហើយគេនៅផ្តល់ឱកាសឲ្យ គេនៅនិយាយថា មិនអីទេ លើកក្រោយកុំឲ្យបែបហ្នឹងទៀត នោះមានន័យថាគេត្រូវការយើងខ្លាំងណាស់ ហើយក៏មិនបោះបង់យើងដោយងាយដែរ។
៤) នៅក្បែរអ្នកគ្រប់ពេលរីករាយនិងលំបាក
គេស្តាប់អ្នកគ្រប់យ៉ាង មិនថាពេលអ្នកសប្បាយឬកើតទុក្ខ ហើយគេតែងតែនៅចាំផ្តល់យោបល់ ចាំលើកទឹកចិត្ត នោះក៏ជាបុរសដែលសំខាន់បំផុតដែរ។
៣) គេមិនបង្កើតរឿងគួរឲ្យសង្ស័យ
គ្រប់រឿងមើលទៅមិនល្អត្រង់ណា ឬលាក់បាំងត្រង់ណា គេមិនលាក់ទុកនាំឲ្យអ្នកសៅហ្មងចិត្តនោះទេ ដោយគេនឹងបកស្រាយប្រាប់អ្នកមុនអ្នកសួរគេទៅទៀត។
២) គេទុកអ្នកដូចជាសមាជិកគ្រួសារ
ពាក្យថាចាត់ទុកដូចជាសមាជិកគ្រួសារ គឺមានន័យណាស់ ដោយក្រៅពីផ្តល់ក្តីស្រលាញ់ ក៏ផ្តល់ទាំងភាពកក់ក្តៅ ផ្តល់ទាំងតម្លៃ ហើយធ្វើឲ្យអ្នកមានអារម្មណ៍ថាសុវត្ថិភាពគ្រប់ពេល។
១) ជាមិត្តភ័ក្ដិដ៏ល្អម្នាក់
គូស្នេហ៍ខ្លះអាចបង្កើតស្នេហាបាន តែមិនអាចបង្កើតមិត្តភាព។ នេះមានន័យថា គេអាចប្រើប្រាស់អារម្មណ៍បែបមិត្តភ័ក្ដិ មិនឲ្យយើងមានអារម្មណ៍ថាទើសទាល់ឬអៀនច្រើននោះទេ ដោយតាមពិតទៅគេអាចទាំងប្តូរជាអារម្មណ៍មិត្តភ័ក្ដិ ជាបងស្រី ជាប៉ា ជាម៉ាក់ ផ្អែកទៅតាមស្ថានការណ៍នីមួយៗ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
