ឈប់ច្រឡំទៀតទៅ ទម្លាប់ ៤ នេះពុំបានជួយសន្សំសំចៃភ្លើងដូចអ្នកគិតទេ
ប្រព័ន្ធអគ្គិសនីគឺជារបស់ដ៏សំខាន់មួយក្នុងជីវិតប្រចាំថ្ងៃ ដែលមនុស្សគ្រប់គ្នាខ្វះពុំបាន ជាពិសេសអ្នកដែលរស់នៅទីប្រជុំជន និងទីក្រុង។ ការប្រើប្រាស់អគ្គិសនីក៏ត្រូវបានណែនាំពីមនុស្សជាច្រើន ឬនិយមលឺតគ្នា ថាគួរធ្វើបែបនេះ បែបនោះ ដើម្បីសន្សំសំចៃនិងមិនសូវឲ្យវាឡើងគីឡូលឿន។
យ៉ាងណាការគិតទាំង ៤ ដូចបង្ហាញខាងក្រោម វាគ្រាន់តែជាការយល់ឃើញតគ្នាប៉ុណ្ណោះ ប៉ុន្តែជាក់ស្តែងទៅវាពុំបានជួយសន្សំសំចៃភ្លើងអ្នកអ្វីនោះទេ ហើយអ្នកគួរតែបញ្ឈប់ការភាន់ច្រឡំនេះទៀតទៅ៖
៤) ប្រើទូទឹកកកតូចស៊ីភ្លើងតិចជាងទូទឹកកកធំ
ពីមុនមនុស្សទម្លាប់ទិញទឹកកកដុំមកក្លាសេ សាច់និងបន្លែ តែពេលមានបច្ចេកវិទ្យាទំនើប គឺគេនិយមប្រើប្រាស់ទូទឹកកក ដែលស៊ីភ្លើងអគ្គិសនីវិញ។
មនុស្សមួយចំនួនគិតថា ការប្រើប្រាស់ទូទឹកកកដែលមានទំហំតូច គឺស៊ីភ្លើងតិចជាង តាមពិតទៅវាដូចតែគ្នានោះទេ។ បើអ្នកចង់សន្សំសំចៃភ្លើងពិតប្រាកដ នោះគឺត្រូវទូទឹកកកនៅចម្ងាយឆ្ងាយពីជញ្ជាំងប្រមាណ ១៥ សង់ទីម៉ែត្រ ដោយកុំឲ្យវាអឹបជាប់ជញ្ជាំងពេក ព្រោះនាំឲ្យប្រព័ន្ធត្រជាក់វាដំណើរការមិនសូវបានល្អ។ ការណែនាំមួយផ្សេងទៀតគឺកុំដាក់នៅក្បែររបស់ក្តៅ ដូចជាចង្រ្កានអ្វីជាដើម នោះវានាំឲ្យប្រព័ន្ធត្រជាក់ដំណើរការកាន់តែខ្លាំង ស៊ីភ្លើងកាន់តែលឿន។
៣) ដើរទៅបិទទូរទស្សន៍ដោយផ្ទាល់ ចំណេញភ្លើងជាងការចុច Remote បញ្ជាបិទ
នេះក៏ជារឿងមិនត្រឹមត្រូវនោះដែរ មិនថាអ្នកបញ្ជាបិទពីទីតាំងឆ្ងាយ ឬដើរទៅបិទផ្ទាល់អ្វីនោះទេ។ បើចង់សន្សំភ្លើងពិតប្រាកដ អ្នកគួរតែដកដុយទូរទស្សន៍ចេញពីព្រីភ្លើងតែម្តង ក្រោយពេលឈប់ប្រើប្រាស់ នោះវាអាចនឹងជួយសន្សំសំចៃបានខ្លះ។
បើចង់ងាយបំផុតដោតខ្សែទូរទស្សន៍ទៅកុងតាក់ភ្លើង មានបិទបើក (On-Off) បែបហ្នឹងវាមិនពិបាកក្នុងការយើងដកខ្សែចុះឡើងអាចនាំឲ្យបាក់ឬដាច់។
២) បើកម៉ាស៊ីនត្រជាក់នៅសីតុណ្ហភាព ២៥ ដឺក្រេគឺស៊ីភ្លើងតិចបំផុត
មនុស្សជាច្រើនគិតថាបើកម៉ាស៊ីនត្រជាក់ នៅសីតុណ្ហភាពទាបពេក ភ្លើងនឹងរត់ខ្លាំងទៅតាមនោះដែរ ហើយត្រឹម ២៤ អង្សាគឺល្អបំផុត។ យ៉ាងណានេះពុំមែនជារឿងត្រឹមត្រូវនោះទេ។
តាមការណែនាំបើចង់សន្សំសំចៃភ្លើងពិតប្រាកដ គឺត្រូវលាងសម្អាតម៉ាស៊ីនត្រជាក់ឲ្យបានញឹកញាប់ ព្រោះដោយសារធូលីក្រាស់ជាប់នៅក្នុងម៉ាស៊ីន នាំឲ្យវាពិបាកក្នុងការបញ្ចេញខ្យល់ត្រជាក់ ហើយជាទូទៅរយៈពេលកន្លះឆ្នាំយូរបំផុត គួរតែសម្អាតម្តង (វាស៊ីសងលើតម្រូវការប្រើប្រាស់របស់អ្នកដែរ ថាបើកប៉ុន្មានម៉ោង/ថ្ងៃ)។
១) បិទបើកម៉ាស៊ីនត្រជាក់ញឹកញាប់ វាមិនសូវស៊ីភ្លើង
មនុស្សមួយចំនួនយល់ថា ពេលប្រើជាប់រាប់ម៉ោងអ៊ីចឹងស៊ីភ្លើងណាស់ បែបហ្នឹងត្រូវបិទវាហើយបើកវាវិញ មួយថ្ងៃ ៣-៤ ដងទើបមិនសូវស៊ីភ្លើង។ ជាក់ស្តែងទៅវាមិនចំណេញដល់ថ្លៃអគ្គិសនីរបស់អ្នកនោះទេ ផ្ទុយទៅវិញវាត្រឹមបានជួយឲ្យម៉ាស៊ីនមិនសូវធ្វើការខ្លាំងរាប់ម៉ោង និងអាចមានអាយុកាលយូរជាងមុនតែប៉ុណ្ណោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
