នារីៗត្រូវដឹង នេះ ៥ តិចនិកទាក់ចិត្តបុរសជាគូស្នេហ៍ លែងឲ្យមើលស្រីផ្សេងចូលភ្នែក
គ្មាននរណាចង់ឲ្យចំណងស្នេហ៍មួយ មានភាគីទីបីចូលមកនោះទេ ប៉ុន្តែពេលខ្លះវាស៊ីសងលើដៃគូទាំងសងខាងដែរ ថាតើបានផ្តល់ឲ្យគ្នាគ្រប់គ្រាន់ឬអត់? បើស្រលាញ់យកចិត្តទុកដាក់ បារម្ភតែម្ខាង ស្នេហានោះក៏មិនអាចបន្តបានដែរ ហើយការបើកភ្លើងខៀវឲ្យភាគីទីបីចូលមកគឺមិនមែនជារឿងខុសឆ្គងឡើយ។
ខាងក្រោម Knongsrok ណែនាំ ៥ តិចនិកសម្រាប់នារីៗ ដែលអាចរឹតបន្តឹងចំណងស្នេហ៍ និងទាក់ចិត្តដៃគូរបស់ខ្លួនឲ្យស្រលាញ់តែខ្លួនខ្លាំង និងមិនងាយចាប់អារម្មណ៍លើអ្នកដទៃ៖
៥) ធ្វើជាមនុស្សស្រីសាមញ្ញបំផុត
ជាស្រ្តីសាមញ្ញបំផុត មានន័យថាអ្នកងាយនឹងញញឹមបំផុត ងាយនឹងចេះបត់បែនអារម្មណ៍បំផុត ដោយធ្វើអ្វីមិនប្រកាន់យកតែតាមអារម្មណ៍របស់ខ្លួនឯងនោះទេ។ អ្នកចេះយោគយល់ អ្នកងាយនឹងស្តាប់តាមការណែនាំ ប្រសិនជាយោបល់ល្អពីដៃគូ នោះហើយជាស្រ្តីដែលសាមញ្ញបំផុត។
៤) បង្កើតភាពទាក់ទាញសម្រាប់ខ្លួនឯង
វាមិនចាំបាច់តែមានរូបរាងកាយស្រស់ស្អាតនោះទេ ភាពទាក់ទាញក្នុងន័យនេះ គឺសំដៅដល់ការស្លៀកពាក់ ការចេះរៀបចំខ្លួនឲ្យបានសមរម្យនិងថ្លៃថ្នូរ។ ប្រសិនអ្នកមិនចង់ឲ្យដៃគូអ្នកសម្លឹងមើលអ្នកដទៃផ្សេង អ៊ីចឹងអ្នកក៏គួរចេះរៀបចំខ្លួនឯងឲ្យបានល្អ និងគិតអំពីខ្លួនឯងជាមុនសិនដែរ។
៣) ធ្វើអ្វីដោយមិនសម្តែង
មនុស្សប្រុសគេនៅក្បែរយើង គេឆាប់ដឹងណាស់ថាចរិតយើងបង្ហាញចេញមកសម្តែង ឬជាធម្មជាតិ។ មនុស្សប្រុសគឺស្រលាញ់ធម្មជាតិរបស់មនុស្សស្រីខ្លាំងណាស់ គ្រប់រឿងកុំព្យាយាមធ្វើបើមិនមែនជាអ្នក ហើយត្រូវចាំមនុស្សប្រុសដែលស្រលាញ់អ្នកពិត គេស្រលាញ់ការពិតរបស់អ្នក មិនមែនជាភាពក្លែងក្លាយតែសំបកក្រៅនៅរយៈពេលខ្លីនោះឡើយ។
២) កុំបន្ទាបតម្លៃខ្លួនឯង
អ្នកត្រូវតែរឹងមាំ ហើយកុំគិតថាខ្លួនឯងមិនល្អអ៊ីចេះ មិនគ្រប់គ្រាន់អ៊ីចុះ និយាយទៅត្រូវតែមានទំនុកចិត្ត នោះទើបជាមនុស្សស្រីដែលបុរសពិបាកដកចិត្តរួច។ ជាងនេះមនុស្សស្រីដែលមានការងារធ្វើស្រាប់ ចេះពឹងផ្អែកលើខ្លួនឯងទៀតនោះ គឺកាន់តែធ្វើឲ្យបុរសនោះឲ្យតម្លៃអ្នកខ្ពស់បំផុតទៅតាមនោះដែរ។
១) ធ្វើជាមនុស្សស្រីសុទិដ្ឋិនិយម
ចូរគិតអំពីភាពវិជ្ជមាន ឲ្យបានច្រើនជាងអវិជ្ជមាន ដោយប្រើគំនិតចាស់ទុំ ពុំមែនគំនិតក្មេងស្រីអាយុ ១៣-១៤ ឆ្នាំនោះឡើយ។ ចំណុចហ្នឹងជាចំណុចដែលមនុស្សប្រុសស្រលាញ់ខ្លាំងបំផុត ព្រោះគេគិតថា មនុស្សស្រីដែលស្រលាញ់ធំចិត្តធំគំនិតហើយ គឺអាចយកជាគូអនាគតទៅថ្ងៃមុខបាន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
