ជីវិតអ្នកពេលនេះលំបាកហើយ! ជ្រើសរើសសារមួយ ដើម្បីទទួលបានសារណែនាំដ៏ល្អបំផុត
អ្នកបានឆ្លងកាត់នូវរឿងរ៉ាវលំបាកជាច្រើននៅរយៈពេលចុងក្រោយនេះ ពេលខ្លះសឹងតែអស់កម្លាំងលែងចង់ក្រោកបន្តទៅមុខទៀត។ ជាមួយអត្ថបទនេះ សូមអ្នកជ្រើសរើសរូបភាពមួយក្នុងចំណោមរូបភាពទាំង ៣ ដើម្បីទទួលបានសារដូចខាងក្រោម៖
រូបភាពទី ១: សត្វដំរី
ការគ្រប់គ្រងហិរញ្ញវត្ថុរបស់អ្នកហាក់ប្រព្រឹត្តិទៅមិនបានល្អ មិនថាតែទម្លាប់នៃការចាយវាយលើការហូបចុក ការទិញរបស់របរផ្សេងៗ ដែលមួយរយៈនេះធ្វើឲ្យអ្នកបាត់បង់ការដាក់វិន័យលើខ្លួនឯង និងបាត់បង់គោលដៅរួម។
មួយផ្សេងទៀតក្នុងទំនាក់ទំនងក៏ដូចគ្នា ដោយសារតែអ្នកមានការបន្ធូរបន្ថយ គិតថាមិនអីទេ ចេះតែបណ្ដែតបណ្ដោយក៏នាំឲ្យកើតមានបញ្ហាជារឿយៗ។ ចូរអ្នកចាកចេញពីទម្លាប់មួយនោះ ហើយចូរបង្កើតច្បាប់វិន័យច្បាស់លាស់មួយសម្រាប់ខ្លួនឯង និងកំណត់គោលដៅដែលត្រូវទៅ ហើយរៀនលើកទឹកចិត្តខ្លួនឯងឲ្យបានច្រើនផង។
រូបភាពទី ២: បាតដៃ
អ្នកហាក់ដងខ្លួនចេញពីពិភពខាងក្រៅខ្លាំងពេកហើយ ការដែលរស់នៅម្នាក់ឯង មិនសូវមានទំនាក់ទំនងសោះ វាពិតជាស្មុគស្មាញខ្លាំងណាស់ ជាពិសេសនៅពេលជួបបញ្ហាផ្សេងៗគឺពិបាករកអ្នកពិគ្រោះយោបល់។
អ្នកត្រូវចាំថា បើមានមនុស្សដែលយល់ចិត្តណាម្នាក់ ឬមិត្តភក្តិល្អនៅក្បែរទោះគេពុំបានជួយអ្វី ក៏អាចជួយសម្រួលផ្លូវអារម្មណ៍ តាមរយៈការស្ដាប់នូវអ្វីដែលជាបញ្ហារបស់យើងបានខ្លះដែរ។ ជាងនេះចូរបង្កើតការចែករំលែកនូវអ្វីដែលអ្នកមានទៅកាន់មនុស្សជុំវិញខ្លួន នោះអ្នកនឹងឃើញក្តីសុខពិតប្រាកដដែលអ្នកត្រូវការហើយ។
រូបភាពទី ៣: ផ្កាឈូក
អ្នកបានឆ្លងកាត់រឿងរ៉ាវជាច្រើន ហើយក៏ធ្វើបានល្អបំផុតដែរ ក្រឡេកទៅក្រោយបន្តិចឆ្លងកាត់ផ្លូវដ៏សែនឆ្ងាយមកនេះ តើអ្នកពិតជាហត់ណាស់ហើយមែនទេ?
ចូរសម្រាកបន្តិច ឆ្លៀតពេលនេះប្រាប់ខ្លួនឯងឲ្យសម្ងំបិទភ្នែកបន្តិច ដកឃ្លាចេញពីការងារនិងការគិតជាច្រើន។ រកពេលវេលាលំហែជាមួយមិត្តភ័ក្ដិ ឬក្រុមគ្រួសារ និងចាត់ទុកជាការតបស្នងតូចមួយសម្រាប់អ្វីដែលអ្នកបានខិតខំកន្លងមក៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
