ជ្រើសរើសហិបមួយ ដើម្បីទទួលនូវអំណោយអ្វីដែលត្រៀមសម្រាប់អ្នកនៅពេលដ៏ខ្លីខាងមុខ
តាមការសម្រេចចិត្តរបស់អ្នកខ្លួនឯងផ្ទាល់ តើក្នុងចំណោមហិបទាំង ៨ មានហិបណាមួយដែលអ្នកពេញចិត្តបំផុត? ការជ្រើសរើសមួយរបស់អ្នក អាចឲ្យយើងបង្ហាញនូវអំណោយអ្វីដែលកំពុងត្រៀមរង់ចាំអ្នកនៅពេលដ៏ខ្លីខាងមុខ៖
ហិបទី ១
នៅក្នុងជីវិតរបស់អ្នកនៅពេលដ៏ខ្លីខាងមុខ នឹងមានការផ្លាស់ប្តូរដ៏ធំមួយ ហើយវាក៏ជាការសម្រេចចិត្តដ៏សំខាន់បំផុត ដែលអ្នកត្រូវធ្វើដោយការបោះជំហានទៅមុខ ហើយកុំមានការភ័យខ្លាចអ្វីឲ្យសោះ។ បើទោះបីជាមានអ្វីដែលរាំងស្ទាក់នៅផ្លូវធ្វើដំណើរដំបូងៗ ក៏កុំបញ្ឈប់ឲ្យសោះ ចូរប្រឹងប្រែងបន្តិច នោះជោគវាសនារបស់អ្នកនឹងទទួលបានលាភធំ ជាការតបស្នងមកវិញ។
ហិបទី ២
សប្បាយរីករាយជាបណ្តើរៗទៅ ក្តីស្រមៃមួយរបស់អ្នកនឹងក្លាយជាការពិតនៅពេលខាងមុខ។ ភាពជោគជ័យនឹងដើរអមជាមួយគ្នា ហើយចូរប្រើប្រាស់ឱកាសដែលអ្នកមានទាញយកប្រយោជន៍ពីវាឲ្យបាន។ បើអ្នកកំពុងបម្រើការងារនៅស្ថាប័នណាមួយ អ្នកត្រៀមនឹងទទួលបានលាភតាមរយៈការឡើងតំណែងទៀតផង។
ហិបទី ៣
ជាហិបរ៉ូមែនទិក ដែលមានន័យថាឆាប់ៗនេះអ្នកនឹងបានជួបមនុស្សដែលស្ថិតក្នុងប្រភេទតម្រូវការរបស់អ្នក ហើយគេនឹងអាចផ្តល់ឲ្យអ្នកនូវភាពផ្អែមល្ហែម និងការយកចិត្តទុកដាក់ដែលអ្នករំពឹងចង់បានយូរណាស់មកហើយ។
ហិបទី ៤
សម្រាប់អ្នកជ្រើសរើសហិបទី ៤ គឺមានន័យថា អ្នកកំពុងជួបបញ្ហាផ្នែកហិរញ្ញវត្ថុនៅពេលនេះ តែនៅពេលខាងមុខ អ្នកនឹងទទួលបានដំណោះស្រាយដ៏សមប្រកបមួយ។ ក្នុងរយៈពេល ១ ខែឲ្យតែអ្នកបោះចោលគំនិតអវិជ្ជមានចេញពីចិត្ត នោះលំហូរសាច់ប្រាក់ដែលមិនរំពឹងទុកនឹងធ្លាក់មកដល់ដៃអ្នក។
ហិបទី ៥
បើអ្នកកំពុងមានរបររកស៊ី ឬអាជីវកម្មណាមួយក្នុងដៃ នោះនឹងទទួលបានលាភធំនៅពេលឆាប់ៗនេះ ហើយរកបានចំណូលច្រើនជាងមុន។ នឹងមានមនុស្សមួយចំនួនបង្ហាញខ្លួនដោយចៃដន្យមកក្នុងជីវិតរបស់អ្នក ហើយពួកគេគឺជាមនុស្សនាំលាភលើផ្នែកហិរញ្ញវត្ថុ ដោយឡែកបើសាកល្បងផ្សងសំណាងអ្វី នោះក៏មានភាគរយខ្ពស់អាចបានលាភធំដែរ។
ហិបទី ៦
អំណោយនៅហិបទី ៦ នេះគឺជាសារដ៏មានតម្លៃមួយសម្រាប់អ្នក។ ចូរអ្នកឈប់ប្រាប់នរណាម្នាក់អំពីតម្រុយឬរឿងដែលមិនចាំបាច់ដែលពួកគេត្រូវដឹង ឧទាហរណ៍៖ ក្តីស្រមៃ ឬបំណងប្រាថ្នារបស់អ្នក ឬការរំពឹងទុកនូវរឿងដ៏ធំណាមួយ ចូរធ្វើវាដោយមានឆន្ទៈ និងភាពស្រេកឃ្លាននៃជោគជ័យ នោះលទ្ធផលនឹងអាចសម្រេចបាន។
ហិបទី ៧
អំណោយនៅហិបទី ៧ នេះក៏ជាសារមួយសម្រាប់អ្នកដូចគ្នា ដោយមានការណែនាំថាអ្នកត្រូវមានការប្រុងប្រយ័ត្នសម្រាប់ឆ្នាំនេះ ហើយបើអ្នកឡើងខ្ពស់ប៉ុណ្ណាក៏ដោយ ក៏កុំភ្លេចគ្រួសារ កុំភ្លេចមិត្តភ័ក្ដិដែលធ្លាប់លំបាករួមគ្នា។ បើអ្នកបន្តសកម្មភាពល្អៗសម្រាប់មនុស្សជុំវិញខ្លួន នោះមិនយូរទៀតទេ នឹងមានមនុស្សដ៏សំខាន់បំផុតសម្រាប់ជីវិតរបស់អ្នក គេដើរចូលមក។
ហិបទី ៨
ការគិតវិជ្ជមាន ការអភិវឌ្ឍថ្មី ការភ្ញាក់ផ្អើលដ៏គួរឲ្យចាប់អារម្មណ៍ ភាពស្រស់ថ្លានៃជីវិត គឺជាអ្វីដែលកំពុងរង់ចាំអ្នកនៅផ្លូវខាងមុខ។ អ្នកមានសំណាងណាស់ គ្រប់យ៉ាងនឹងដំណើរការទៅដោយរលូន ទាំងដែលរឿងល្អខ្លះ អ្នកពុំបានគ្រោងវាទុកផង៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
