ត្រៀមចម្លើយទៅ! ដល់ថ្ងៃទៅលេងផ្ទះ អ៊ីអ្នកជិតខាងចូលចិត្តសួរនាំ ៥ សំណួរចាក់ដោតនេះបំផុត
នៅរយៈពេលតែជាង ១ ខែទៀតប៉ុណ្ណោះ ពិធីបុណ្យចូលឆ្នាំប្រពៃណីជាតិខ្មែរនឹងឈានចូលមកដល់ ហើយក៏ជឿថាបងប្អូនយើងជាច្រើននឹងឆ្លៀតពេលវិលត្រលប់ទៅស្រុកកំណើតដើម្បីអបអរនិងកម្សាន្តជាមួយក្រុមគ្រួសារ ក៏ដូចជាញាតិមិត្តជិតឆ្ងាយនានា។
ក្រៅពីត្រៀមសំលៀកបំពាក់ របស់របរផ្ទាល់ខ្លួន និងថវិកាមួយចំនួន ចុះអ្នកបានត្រៀមហើយឬនៅចុះ នៅចម្លើយដែលតែងតែមានសំណួររៀងរាល់ពេលដែលអ្នកទៅស្រុកកំណើត? ខាងក្រោម Knongsrok បង្ហាញសំណួរចាក់ដោត ៥ ដែលកម្រមានអ្នកជៀសផុត៖
សម្រាប់អ្នកស្ថិតនៅអាយុក្នុងវ័យសិក្សា ១) តើឯងរៀនមុខជំនាញអី?
សួរនាំអ្នកអំពីមុខជំនាញដែលអ្នកសិក្សា ហើយរៀននៅសាលាណា ប៉ះអ្នកជិតខាងខ្លះទៅគាត់និយាយលើកកូនគាត់មកប្រៀបធៀបយើងអីចឹងទៅ ថាកូនគាត់រៀនក្រៅប្រទេស ខ្លះជាប់អាហារូបករណ៍បែបនេះបែបនោះ និយាយបែបណាឲ្យតែល្អជាងយើង។
សម្រាប់អ្នកស្ថិតនៅអាយុក្នុងវ័យសិក្សា ២) តើឯងរៀនបាននិទ្ទេសអី?
បើប៉ះមីងពូអ្នកជិតខាងកូនគាត់រៀនបានខ្ពង់ខ្ពស់ ឬពូកែបន្តិចទៀត កូនប្រាកដជាចាក់ដល់សំណួរសួរថា តើកាលប្រលងទី ១២ ឬប្រលងបញ្ចប់ថ្នាក់បរិញ្ញាបត្រ ប្អូនបាននិទ្ទេសអី ហើយពួកគាត់ក៏រមែងយកលទ្ធផលកូនរបស់គាត់មកលើកឡើងប្រៀបធៀបម្តងទៀត ទាំងដែលពុំមាននរណាសួរនាំផងនោះ។
សម្រាប់អ្នកស្ថិតនៅអាយុក្នុងវ័យមានការងារធ្វើ ៣) តើឯងធ្វើការអី?
តើឯងធ្វើការអី ធ្វើនៅកន្លែងណា ហើយការងារនៅទីនោះល្អអត់ ជាសំណួរដែលពួកគាត់ជីកឬសជីកគល់សួរនាំជាងម្តាយឪពុកយើងទៅទៀត។ ប៉ះគ្នាយើងខ្លះមិនសូវចេះអួតសម្ញែង ភាគច្រើនប្រហែលជានិយាយថា ធម្មតាៗដូចគេឯងទេមីង/ពូ តែបើប៉ះអ្នកសម្ញែងចាក់មួយខ្សែតបវិញហើយ។
សម្រាប់អ្នកស្ថិតនៅអាយុក្នុងវ័យមានការងារធ្វើ ៤) តើឯងទទួលបានប្រាក់ខែប៉ុន្មាន?
អ្នកក្នុងផ្ទះមធ្យម ងំអ្នកក្រៅសួរគ្មានដកមាត់ទេ ហើយតាមពិតទៅការសួរនាំដល់រឿងប្រាក់ខែ គឺជាសំណួរមិនល្អមួយដែលនៅតំបន់អឺរ៉ុប គេតែងតែខឹងនៅពេលបានលឺសំណួរនេះ ព្រោះជាការពិត ការរាប់អានមិនចាំបាច់តែដឹងអំពីប្រាក់ដែលយើងទទួលបាននោះទេ។ អ្នកត្រូវដឹងទៀតថា មនុស្សភាគច្រើនក្នុងសម័យនេះ បើគេសួរនាំប្រាក់ខែយើង ក្នុងចិត្តរបស់គេគឺមានតែ ២ ទេ នឹងច្រណែនបើយើងបានច្រើន នឹងតិះដៀលបើយើងបានតិច គ្មានផ្លូវណាមួយដែលគេលើកតម្កើងយើងឡើយ។
សម្រាប់អ្នកស្ថិតនៅអាយុក្នុងវ័យមានគូស្រករ ៥) តើពេលណាហែងការ?
ពេលមិនឃើញយើងមាននាំមិត្តប្រុស ឬមិត្តស្រីមកលេងផ្ទះ ហើយវ័យយើងរាងជ្រេចូល ២០ ក្រាស់ជិត ៣០ អីហ្នឹង ដឹងតែលេចសំណួរហ្នឹងមកហើយគឺ អាក្អូនកាលណាហែងការ?
ពិតមែនហើយសំណួរទាំងអស់ស្តាប់ទៅរាងប៉ះពាល់ឯកជនភាពរបស់យើងបន្តិចមែន ប៉ុន្តែប្រសិនអ្នកមិនចង់ឆ្លើយ សូមប្រើប្រាស់ពាក្យសម្តី ឬអាកប្បកិរិយាឲ្យសមរម្យឆ្លើយតបទៅកាន់ពួកគាត់វិញ ព្រោះពួកគាត់មានវ័យចំណាស់ជាងយើង ហើយមួយផ្សេងទៀតគឺយើងត្រូវរក្សាតម្លៃនៃកិត្តិយសគ្រួសារ កុំឲ្យបាក់មុខឬអាប់ឱនមុខមាត់ម្តាយឪពុក ដោយគ្រាន់តែការឆ្លើយមិនបាននូវសំណួរទាំងអស់នោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
