កុំនិយាយទៅកាន់គូស្នេហ៍អី! ពាក្យទាំង ៥ នេះ ស្តាប់ទៅខ្លី តែបង្កប់អត្ថន័យឈឺចាប់ខ្លាំងណាស់
នៅក្នុងទំនាក់ទំនងស្នេហា ជួនខ្លះមិនចាំបាច់តែបញ្ចេញកាយវិការអាក្រក់នោះទេ ផ្ទុយទៅវិញការនិយាយស្តី ក៏អាចបំផ្លាញទឹកចិត្តមនុស្សបានដែរ។ មិនថាតែបុរសឬនារី ប្រសិនណាស្រលាញ់គេ សូមកុំពោលពាក្យទាំង ៥ ឃ្លានេះទៅកាន់ដៃគូឲ្យសោះ៖
៥) ខ្ញុំស្អប់អ្នក
ទោះខឹង ទោះអន់ចិត្តប៉ុណ្ណា ត្រូវចាំថា ពាក្យសម្តីដែលបានពោលចេញទៅ គឺរមែងបានដក់ជាប់ក្នុងចិត្តរបស់គេហើយ។ ពាក្យថា "ខ្ញុំស្អប់អ្នក" ឬ "បងស្អប់អូន" មិនថានិយាយទៅកាន់មនុស្សស្រី ឬមនុស្សប្រុស ពេលបានលឺម្តង គឺធ្វើឲ្យដក់ជាប់ក្នុងអារម្មណ៍រៀងរហូតហើយ បែបនេះមុននិយាយសូមគិតឲ្យបានច្បាស់។
៤) ប្រៀបធៀបដៃគូទៅអ្នកដទៃ
ទោះគេធ្វើអីខុស ឬបង្កកំហុសដោយប្រការណាមួយ បើអ្នកមិនពេញចិត្តក៏ប្រាប់ថាមិនពេញចិត្ត ហើយឲ្យរៀនកែតម្រូវទៅតាមនោះ។ ជៀសវាងដាច់ខាតកុំនិយាយថា គេមិនល្អដូចអ្នកនេះ ដូចអ្នកនោះ ឬមិនអាចធ្វើបានដូចមិត្តភ័ក្ដិ ឬសង្សារចាស់ ដោយពាក្យសម្តីទាំងនេះហើយដូចជាបន្ទាបតម្លៃរបស់គេធ្លាក់ដល់សូន្យ ហើយមនុស្សណាក៏មានបេះដូង មិនមែនជាមនុស្សយន្តទេណា!
៣) ខ្ញុំពិតជាខុសនឹងជ្រើសរើសយកអ្នក
កុំបង្ហាញការសោកស្តាយ ឬស្តាយក្រោយ ដែលអ្នកបានជ្រើសរើសយកគេ នោះស្មើនឹងអ្នកមិនឲ្យតម្លៃលើការខិតខំប្រឹងប្រែង ឬទំនាក់ទំនងរវាងគ្នាកន្លងមកអ៊ីចឹងដែរ។ ចូរគិតពីចំណុចល្អ ដែលគេធ្លាប់បានធ្វើខ្លះផង។
២) ខ្ញុំមានកូនហើយ
ឃ្លាទីពីរនេះគឺសម្រាប់មនុស្សស្រី ដែលចង់សាកល្បងចិត្តមនុស្សប្រុសដែលជាសង្សារ ដោយចង់ដឹងថាគេនឹងប្រតិកម្មបែបណា?
អ្នកត្រូវគិតថាប្រសិនដៃគូអ្នក មិនទាន់ត្រៀមខ្លួនរួចរាល់ទេនោះ ប្រាកដជានឹងមានពាក្យមួយចំនួនលេចចេញមកជាមិនខាន ហើយពាក្យខ្លះអាចធ្វើឲ្យអ្នកពិបាកនឹងទទួលយក នាំទៅជារឿងល្អក់កករគ្នាទៅវិញទេ បែបនេះគួរសាកល្បងចិត្តគេតាមវិធីផ្សេងវិញ។
១) វាជាការគិតដ៏ល្ងង់ខ្លៅ
កុំបន្ទាប កុំទម្លាក់តម្លៃ នៅការបញ្ចេញយោបល់ឬមតិរបស់ដៃគូម្ខាងទៀត។ ទោះអ្នកមិនពេញចិត្ត ចូរប្រើប្រាស់មធ្យោបាយក្នុងការវាយតម្លៃមតិនោះ ទៅជាការលើកទឹកចិត្ត ឬណែនាំពាក្យល្អៗឲ្យជ្រើសរើសនិងសម្រេចចិត្តរបៀបផ្សេងវិញ៕
ព័ត៌មានថ្មីៗ
