មិនមែនលួងខ្លួនឯងទេណា តែជាការពិត នេះអត្ថប្រយោជន៍ ៧ យ៉ាងនៃការនៅលាវ (Single)
មនុស្សប្រុសស្រីជាច្រើនពិបាកនឹងដល់គូខ្លាំងណាស់ ខ្លះមិនធ្លាប់មានស្នេហាសូម្បីតែមួយលើក ទាំងដែលខ្លួនមានអាយុជិត ៣០ ទៅហើយ។ ខ្លះទៀតធ្លាប់ឆ្លងកាត់ស្នេហាពីមុនដែរ តែទទួលរងបរាជ័យដោយសារហេតុផលផ្សេងៗពីគ្នា។
ចុះអ្នកមានដែលគិតទេថា ការដែលនៅលាវ ឬ Single វាមានផលល្អជាងការដែលស្ថិតក្នុងទំនាក់ទំនងស្នេហាជាមួយដៃគូ? ខាងក្រោមនេះ Knongsrok បង្ហាញពីអត្ថប្រយោជន៍ ៧ យ៉ាងនៃការនៅលាវ៖ (បញ្ជាក់៖ មិនមែនលួងចិត្តខ្លួនឯងទេណា!)
៧) អាចរស់នៅដោយឯករាជ្យ
នៅពេលខ្លួនមួយ ចង់ទៅណា ជាមួយនរណា ស្មើណាក៏មិនចាំបាច់ត្រូវសុំការអនុញ្ញាត ឬប្រាប់ដៃគូឲ្យដឹង។ និយាយទៅគឺស្រួលមួយចប់ ហើយមិនទទួលរងសម្ពាធផ្លូវអារម្មណ៍ ថាខ្លាចចិត្តគេ ឬខ្លាចគេអន់ចិត្តជួនខ្លះនោះទេ។
៦) ភាពស្រស់ស្អាតជាខ្លួនឯង
ពេលខ្លះមិនថាជាបុរសឬនារីនោះទេ ពេលទៅណាគឺព្យាយាមតុបតែងខ្លួនសម្របតាមដៃគូរបស់ពួកគេ។ វាខុសពីនៅខ្លួនមួយ ពេលទៅខាងក្រៅគឺអាចតែងខ្លួនរបៀបដែលខ្លួនឯងស្រលាញ់បាន ហើយក៏មិនសូវមានការធ្វើអ្វីមួយដើម្បីតែបំពេញចិត្តគេនោះដែរ។
៥) គ្មានការសម្តែង (Drama)
នៅពេលស្ថិតក្នុងទំនាក់ទំនងស្នេហា ការឈឺចាប់ ការឈ្លោះប្រកែកប្រាកដជាមាន ហើយខ្លះគ្រាន់តែជាការសម្តែងដើម្បីបំភ័ន្តភ្នែក ឬបន្លប់អារម្មណ៍យើងតែប៉ុណ្ណោះ។ ខុសពីការនៅម្នាក់ឯងគឺគ្មានទៅព្រួយបញ្ហាអស់នោះទេ។
៤) អាចសន្សំលុយបានស្រួល
ស្ថិតនៅក្នុងទំនាក់ទំនងស្នេហា មិនថាយើងជាបុរសឬនារីទេ រមែងតែមានខ្ទង់ចំណាយលើការទិញរបស់នេះ របស់នោះ ប៉ះប៉ូវឲ្យគ្នាទៅមកហើយ។ វាខុសពីយើងនៅតែឯង គឺអាចទិញរបស់សម្រាប់ខ្លួនឯង ហើយអាចឆ្លៀតសន្សំលុយបានច្រើនទៀតផង។
៣) មិនខ្លាចការប្រច័ណ្ឌ
ទាំងបុរសនិងនារី នៅពេលមានដៃគូ ប្រាកដជាត្រូវខ្លាចចិត្តគេហើយ ទៅនិយាយជាមួយអ្នកនេះច្រើនបន្តិចក៏មិនបាន ទៅលេងជាមួយអ្នកនោះច្រើនបន្តិចក៏មិនបាន គ្រប់យ៉ាងគឺដោយសារខ្លាចភ្លើងប្រច័ណ្ឌរើឡើង។
២) មានពេលសម្រាប់ខ្លួនឯង មិត្តភ័ក្ដិ និងគ្រួសារ
អ្នកអាចមានពេលវេលាច្រើនសម្រាប់ចំណាយលើខ្លួនឯង ឬអាចទៅជួបជុំជាមួយមិត្តភ័ក្ដិបានដោយសេរី ហើយសេសសល់ពេលវេលាផ្សេងៗឯទៀតក៏អាចចំណាយជាមួយក្រុមគ្រួសារបានដោយកក់ក្តៅផងដែរ។
១) មានពេលគិតពីផែនការណ៍ជីវិត
ពេលខ្លះមានស្នេហានាំតែឈឺចាប់ ហើយទាំងការរៀនសូត្រ ទាំងការងារក៏ធ្វើឲ្យប៉ះពាល់ ព្រោះដោយសារអារម្មណ៍មួយនៅជាប់នឹងស្នេហា បើគេធ្វើឲ្យខូចអារម្មណ៍ យើងនេះក៏បណ្តោយទៅតាមគេ។ វាខុសពីនៅតែឯង គឺមានពេលវេលាគ្រប់គ្រាន់សម្រាប់គិតគូរអំពីផែនការណ៍ជីវិត ហើយសឹមមានជីវិតស្រួលបួលមួយហើយ ចាំរកស្នេហ៍ពិតតាមក្រោយក៏វាមិនហួសពេលដែរ៕
ព័ត៌មានថ្មីៗ
