តិចនិកដើរឲ្យត្រឹមត្រូវ ៤ យ៉ាង អាចជួយឲ្យអ្នកស្រកទម្ងន់ត្រឹមរយៈពេលខ្លី
ការដើរគឺជាលំហាត់ប្រាណមួយប្រភេទដែលមនុស្សរាល់គ្នាអាចអនុវត្តបាន ហើយវាមិនទាមទារសម្ភារៈអ្វីច្រើននោះទេ ពោលគឺត្រឹមដឹងច្បាស់ពីពេលវេលានិងតិចនិកមួយចំនួន នោះអាចជួយឲ្យអ្នកទទួលបានសុខភាពល្អ និងស្រកទម្ងន់ឆាប់រហ័សទៀតផង។
ខាងក្រោមនេះ យើងបង្ហាញតិចនិកនៃការដើរ ៤ យ៉ាងជួយឲ្យអ្នកស្រកទម្ងន់ក្នុងរយៈពេលខ្លី៖
៤) ជំរុញខ្លួនឯងឲ្យបានខ្លាំង
ការដើរគឺពិតជាអាចដុតកាឡូរីដូចកីឡាឯទៀតពិតមែន ប៉ុន្តែវាមិនអាចដុតបានច្រើននោះទេ បែបនេះហើយអ្នកត្រូវតែជំរុញខ្លួនឯងឲ្យបានខ្លាំងតាមដែលអាចធ្វើទៅបាន។ មិនមែនចំណាយពេល ១៥ នាទីក្នុងមួយថ្ងៃ ហើយគិតថាគ្រប់គ្រាន់ទេ។ ការដុតកាឡូរីនៅកម្រិតច្រើនឬតិច វាអាស្រ័យទៅលើទម្ងន់និងរាងកាយរបស់អ្នកមួយផ្នែកទៀត ប៉ុន្តែថេរវេលានៃការដើរយល់ល្អគឺចន្លោះពី ៣០ ទៅ ៤០ នាទីក្នុងមួយថ្ងៃទើបល្អបំផុត។
៣) បន្ថែមថេរវេលា តែកុំបង្ខំ
កុំបង្ខំដើរមួយថ្ងៃយករាប់សិបគីឡូ ហើយស្អែកដើរលេងរួចនោះ។ ផ្ទុយទៅវិញត្រូវរៀនទម្លាប់ខ្លួនឯង ដោយអាចថាដំណាក់កាលដំបូង ក្នុងមួយថ្ងៃដើរ ៣០ នាទី ហើយរៀងរាល់ ២ សប្តាហ៍បន្ថែមពីលើនោះ ១០ នាទីទៀត រហូតដល់បានទម្លាប់ដើរ ១ ម៉ោង/ថ្ងៃ។
២) ដើរក្រោមកម្តៅថ្ងៃ
តាមការស្រាវជ្រាវពីអ្នកជំនាញបានណែនាំថា អ្នកអាចនឹងស្រកទម្ងន់លឿន ប្រសិនណាដើរក្រោមកម្តៅថ្ងៃ ដោយមិនមានន័យថាទាមទារឲ្យក្តៅខ្លាំងពេកនោះទេ ពោលគឺអាចថាពេលព្រឹកព្រលឹម មុនអាហារពេលព្រឹក ឬពេលរសៀល តែជៀសវាងកុំឲ្យល្ងាចជ្រុល ព្រោះជាទូទៅពន្លឺព្រះអាទិត្យដែលចាំងមក អាចជួយបំផុសការខិតខំរបស់អ្នក និងអាចរំលាញខ្លាញ់ស្រកទម្ងន់លឿនផងដែរ។
១) ដើរគ្រវីដៃទៅមុខចុះឡើង
បើដើរដោយរក្សាតួខ្លួនឲ្យស្ងៀម មិនមានសកម្មភាពក្នុងការគ្រវីឬលើកដៃចុះឡើងសោះ នោះមិនមែនថាមិនស្រកទេ តែវាស្រកនៅកម្រិតកំណត់មួយ។ ផ្ទុយទៅវិញប្រសិនអ្នកបន្ថែមសកម្មភាពនៃការលើកដៃចុះឡើងកំឡុងពេលដើរទៀត នោះអាចដុតកាឡូរីបន្ថែម ៥-១០ ភាគរយពីលើនោះ។
បញ្ជាក់ថាក្រៅពីការអនុវត្តតិចនិកខាងលើហើយ ចូរប្រុងប្រយ័ត្នជាមួយទម្លាប់នៃការទទួលទានអាហារផង នោះទើបជួយឲ្យអ្នកឆាប់ទទួលបានផលលឿន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
