ស្ត្រប៊េរីខែនេះសំបូរណាស់ នេះមកដឹងអត្ថប្រយោជន៍ចំពោះសុខភាពទាំង ១១ ពីការទទួលទានវា
ផ្លែស្ត្រប៊េរីជាប្រភេទផ្លែឈើពេញនិយមមួយនៅគ្រប់តំបន់ទូទាំងសកលលោក ហើយជាទូទៅនៅកំឡុងខែនេះគឺសំបូរខ្លាំងណាស់។ មិនថាតែមនុស្សចាស់ កូនក្មេង ភាគច្រើនសុទ្ធតែចូលចិត្តទទួលទាន ហើយជាទូទៅអ្នកប្រាកដជានិយមនិយាយតៗគ្នាថាអាចជួយដល់សុខភាពរបស់យើង។
ចុះបើស៊ីជម្រៅថាតើអាចជួយដល់ផ្នែកណាខ្លះ អ្នកបានដឹងហើយឬនៅ? ក្នុងអត្ថបទនេះ ក្នុងស្រុក បង្ហាញពីអត្ថប្រយោជន៍ទាំង ១១ ចំពោះសុខភាពសម្រាប់ការទទួលទានផ្លែស្ត្រប៊េរី៖
១) ថែរក្សាសុខភាពបេះដូង
សារធាតុប្រឆាំងអុកស៊ីតកម្ម, Anthocyanins និង Polyphenols នៅក្នុងផ្លែស្ត្រប៊េរី វាអាចចិញ្ចឹមនិងការពារបេះដូង។ វាក៏ជួយគ្របគ្រងសម្ពាធឈាមនិងលំហូរឈាមក្រហមឲ្យមានភាពល្អប្រសើរ និងកាត់បន្ថយហានិភ័យនៃការកើតជំងឺគាំងបេះដូង។
២) គ្រប់គ្រងកម្រិតជាតិស្ករក្នុងឈាម
ក្នុងផ្លែស្ត្រប៊េរីក៏វាមានជាតិសរសៃ និងអង់ទីអុកស៊ីដង់ដែលជួយគ្រប់គ្រងដល់ឡើងកម្រិតជាតិស្ករក្នុងឈាម។
៣) ការពារជំងឺមហារីក
ផ្លែស្ត្រប៊េរីមានវីតាមីន C និងជាតិសរសៃខ្ពស់ដែលជួយការពារបំពង់អាហារ និងពោះវៀនធំ ហើយក៏កាត់បន្ថយនូវការលូតលាស់កោសិកាមហារីក ជាពិសេសវាអាចបំផ្លាញនូវសារជាតិអាចបង្កឲ្យកើតមហារីកថែមទៀតផង។
៤) បង្កើនប្រព័ន្ធភាពសុាំក្នុងខ្លួន
ជាមួយសារជាតិវីតាមីន C ខ្ពស់ វាអាចជួយរំញោចឲ្យប្រព័ន្ធសុាំនិងប្រព័ន្ធប្រយុទ្ធប្រឆាំងក្នុងរាងកាយយើងដំណើរការល្អ ដែលអាចបញ្ចៀសការកើតអាឡែហ្សី និងជំងឺហឺត។
៥) ចិញ្ចឹមសារធាតុល្អក្នុងខួរក្បាល
ជាមួយសារធាតុប្រឆាំងអុកស៊ីតកម្មខ្ពស់ វាអាចការពារកោសិកាខួរក្បាលរបស់យើង និងជួយចិញ្ចឹមកោសិកាសរសៃប្រសាទធ្វើឲ្យខួរក្បាលស្រស់ថ្លា និងមានការគិតល្អៗ។
៦) កាត់បន្ថយកូលេស្តេរ៉ុលអាក្រក់
ក្នុងផ្លែស្ត្រប៊េរីមានផ្ទុកសារជាតិ Pectin ដែលវាអាចកាត់បន្ថយកម្រិតកូលេស្តេរ៉ុលអាក្រក់ LDL នៅក្នុងខ្លួន។
៧) ជួយបំប៉នសុខភាពភ្នែក
វាអាចជួយការពារជំងឺភ្នែកឡើងបាយ និងការចុះខ្សោយនៃសុខភាពភ្នែក ក៏ដូចជាជំងឺភ្នែកផ្សេងៗទៀតបាន។
៨) ជួយឲ្យអ្នកស្រក់ទំងន់
អាស៊ីតអេលីហ្គិក និងអង់ទីអុកស៊ីដង់នៅក្នុងផ្លែស្ត្រប៊េរី ជួយឲ្យរាងកាយរបស់អ្នកផលិតនូវអរម៉ូនអាឌីប៉ូតុងទីន។ អរម៉ូននេះវាធ្វើឲ្យប្រសើរឡើងនូវការរំលាយអាហារនិងរំលាយខ្លាញ់ ហើយវាក៏ជួយយើងមិនឲ្យឃ្លានញឹកញាប់ផងដែរ។ និយាយទៅវាល្អឥតខ្ចោះ នាមជាផ្លែឈើដែលអាចជួយសម្រក់ទម្ងន់។
៩) ជួយថែរក្សាសុខភាពស្រ្តីមានផ្ទៃពោះ
ចំពោះស្រ្តីដែលមានផ្ទៃពោះវាក៏អាចជួយនៅពេលពួកគេមានជាតិខ្លាញ់ខ្ពស់ ដើម្បីបញ្ចៀសការប៉ះពាល់ផ្សេងៗ។
១០) ជួយឲ្យឆ្អឹងរឹងមាំនិងធ្មេញស
វាក៏មានសារធាតុចិញ្ចឹមនិងសារធាតុរ៉ែសំខាន់ៗ ដូចជាវីតាមីន K ប៉ូតាស្យ៉ូម និងម៉ាញេសូម ដែលជួយដល់ឆ្អឹង។ស ជាងនេះវាក៏មានផ្ទុកនូវអាស៊ីត Malic ដែលជួយឲ្យធ្មេញរបស់អ្នកសស្អាតផងដែរ។
១១) ប្រឆាំងភាពចាស់
វាអាចប្រឆាំងរ៉ាឌីកាល់សេរីដែលអាចបំផ្លាញកោសិកាស្បែកនាំឲ្យយើងចាស់ ហើយក៏ការពារស្បែកកាត់បន្ថយស្នាមអុជខ្មៅ និងរឹតបន្តឹងរន្ធញើស ក៏ដូចជាពន្លឿនល្បឿននៃការបង្កើតកោសិកាឡើងវិញផងដែរ៕
ប្រភព៖ Gangbeauty | ប្រែសម្រួល៖ ក្នុងស្រុក
ព័ត៌មានថ្មីៗ
