LV លក់ស្បែកជើងដើរក្នុងផ្ទះ តែតម្លៃកុំមើលទិញ iPhone 12 Pro បានជិត ២ គ្រឿង
ក្រុមហ៊ុនប្រេនល្បីឈ្មោះរបស់ប្រទេសបារាំង LV (Louis Vuitton) ថ្មីៗនេះទើបតែចេញលក់នូវប្រភេទស្បែកជើងដើរក្នុងផ្ទះ (Slipper) ដែលមានជម្រើសពណ៌ស ផ្កាឈូក ប្រផេះ និងត្នោត។
ស្បែកជើងនេះកំពុងដាក់ឲ្យបញ្ជាទិញចាប់ពីពេលនេះតទៅ ហើយរំពឹងនឹងដឹកជញ្ជូនដល់ដៃអតិថិជននៅបុណ្យណូអែលនាខែធ្នូខាងមុខ ពោលគឺសមល្មមនឹងទុកជាអំណោយសម្រាប់មិត្តភ័ក្ដិ ឬមនុស្សជាទីស្រលាញ់បានទាន់ពេលតែម្តង។
ដោយឡែកចំពោះតម្លៃវិញ គឺរាងកល់បន្តិចដោយមួយគូថ្លៃដល់ទៅ ២ ២៦០ ដុល្លារអាមេរិកឯណោះ ពោលគឺជិតទិញបាន iPhone 12 Pro ពីរគ្រឿងទៅហើយ។
យ៉ាងណាមិញក្រោយមានការប្រកាសលក់ស្បែកជើង LV ខាងលើនេះ ក៏ទទួលបានការរិះគន់ពីមតិមហាជនមួយចំនួនផងដែរ ព្រោះស្បែកជើងផលិតចេញពីស្បែកសត្វ ស្របពេលដែលអ្នកប្រើប្រាស់អ៊ីនធឺណិតជាច្រើនកំពុងបើកយុទ្ធនាការប្រឆាំងការប្រើប្រាស់ផលិតផលដែលធ្វើឡើងដោយស្បែកសត្វផងនោះ។
ក្រឡេកទៅមើលយីហោល្បីឈ្មោះមួយផ្សេងទៀតគឺ Gucci ក៏មានបញ្ចេញនូវប្រភេទផលិតផលស្រដៀងគ្នានោះផងដែរ ប៉ុន្តែតម្លៃធូរត្រឹមតែ ១៩០ ដុល្លារប៉ុណ្ណោះ ហើយក៏មានមនុស្សជាច្រើនយកមកប្រៀបធៀបនិងគាំទ្រដល់ផលិតផលរបស់ប្រទេសអ៊ីតាលីមួយនេះយ៉ាងសម្បើមផងដែរ៕
ប្រភព៖ Zing
ព័ត៌មានថ្មីៗ
