ជោគជ័យ និងគុណតម្លៃពិត គឺស្ថិតលើយើងខ្លួនឯង មិនមែនអាស្រ័យលើការមើលឃើញ ឬពាក្យសម្ដីរបស់អ្នកដទៃឡើយ
ថ្មីៗនេះ មានរូបភាពពីរសន្លឹកបានអង្រួនចិត្តប្រិយមិត្តក្នុងបណ្ដាញសង្គមហ្វេសប៊ុគយ៉ាងខ្លាំង។ រូបភាពនោះគឺ មានក្មេងប្រុសកម្សត់ម្នាក់ បានប្រើកង់សំណព្វរបស់គាត់ដែលមានសភាពចាស់ទ្រុឌទ្រោម ដើម្បីធ្វើការប្រណាំង ជាមួយនឹងសម្លៀកបំពាក់ ដែលពុំមែនជាឯកសណ្ឋានផ្លូវការសម្រាប់បេក្ខជនចូលរួមការប្រឡង។ យើងមើលឃើញថា ដ្បិតតែកង់របស់គាត់ចាស់ពិតមែន រីឯសម្លៀកបំពាក់របស់គាត់ក៏រខេករខាក ប៉ុន្តែគាត់បាននាំមុខកង់ថ្មីៗជាច្រើនអំឡុងពេលប្រណាំងនោះ ដែលឃើញហើយគ្រប់គ្នាមិនសរសើរមិនបានទេ។ គាត់ជាក្មេងដែលមានការតាំងចិត្ត ប្ដេជ្ញាចិត្ត តស៊ូពុះពារយ៉ាងមុតមាំ ទើបអាចជួយឱ្យគាត់នាំមុខគេបានបែបនេះ។
យ៉ាងណាមិញ របស់ដែលមានរូបរាងចាស់ មើលទៅមិនសមទំនង ឬគ្រប់គ្នាប្រហែលជាមើលរំលង មិនឱ្យតម្លៃ ប៉ុន្តែតម្លៃ និងគុណភាពរបស់វានៅតែល្អ ក៏ព្រោះតែវាចេះឱ្យតម្លៃដល់ខ្លួនឯង និងឈរត្រង់ចំណុចមួយដែលជាខ្លួនឯង។ សមត្ថភាពពិតមិនបានជាប់ទាក់ទងនឹងរូបរាង ឬសម្បកខាងក្រៅនោះទេ។ ដូច្នេះហើយ សូមកុំវាយតម្លៃមនុស្សដោយគ្រាន់តែឃើញត្រឹមសម្បកក្រៅ ព្រោះអ្នកពិតមិនអាចដឹងទេថា ធាតុពិតនៅខាងក្នុង និងអ្វីដែលគេមាន ជួនកាលយើងមិនអាចនឹងមាន ឬសមត្ថភាពមិនដល់គេផងក៏ថាបានដែរ៕
ប្រភពរូបភាព ៖ លោក កឹម សុវណ្ណា
ព័ត៌មានថ្មីៗ
