ដំណឹងល្អ! វ៉ាក់សាំងការពារ COVID-19 តេស្តមានប្រសិទ្ធភាពដល់ ៩០ ភាគរយហើយ និងរំពឹងដាក់ឲ្យប្រើប្រាស់នៅចុងឆ្នាំ ២០២០
ការអភិវឌ្ឍផលិតនូវវ៉ាក់សាំងដែលចូលរួមដោយក្រុមហ៊ុន Pfizer (អាមេរិក) និង BioNTech (អាល្លឺម៉ង់) តាមការសាកល្បងនៅដំណាក់កាលទី ៣ រកឃើញថាមានប្រសិទ្ធភាព ៩០ ភាគរយហើយ ដែលអាចបញ្ចៀសមិនឲ្យមនុស្សឆ្លងជំងឺ COVID-19។
តាមសេចក្ដីថ្លែងការណ៍ពីនាយកប្រតិបត្តិរបស់ក្រុមហ៊ុនផលិតវ៉ាក់សាំងខាងលើគឺលោក Albert Bourla បានឲ្យដឹងថា៖ "ការសាកល្បងនៅដំណាក់កាលទី ៣ នៃវ៉ាក់សាំងរបស់យើង គឺកាន់តែខិតជិតដល់ការផ្ដល់ឲ្យមនុស្សទូទាំងសកលលោក សម្រាប់តម្រូវការដែលពួកគេកំពុងចាំបាច់ និងជួយបញ្ចប់នូវវិបត្តិសេដ្ឋកិច្ចរបស់ពិភពលោក"។
វ៉ាក់សាំងមួយនេះ នឹងត្រូវបញ្ជូនទៅកាន់អាជ្ញាធរពាក់ព័ន្ធរបស់សហរដ្ឋអាមេរិកធ្វើការពិនិត្យម្តងទៀតនៅកំឡុងសប្តាហ៍ទី ៣ នាខែវិច្ឆិកា មុនទទួលបានអាជ្ញាប័ណ្ណដាក់ឲ្យប្រើប្រាស់ ហើយរំពឹងនឹងអាចចរាចរលើទីផ្សារត្រឹមចុងឆ្នាំ ២០២០។
តាមផែនការណ៍របស់ក្រុមហ៊ុន គឺពួកគេចង់ផ្គត់ផ្គង់វ៉ាក់សាំងនៅលទ្ធផលសម្រេច ចំនួន ៥០ លានដូសត្រឹមឆ្នាំ ២០២០ ហើយបន្ថែមដល់ ១,៣ ពាន់លានដូសនៅឆ្នាំបន្ទាប់ ២០២១។
ជាមួយដំណឹងដ៏ក្តៅគកុកនេះ ក៏បានរុញឲ្យភាគហ៊ុននៃក្រុមហ៊ុន Pfizer កើនឡើងដល់ ១៥ ភាគរយ ខណៈក្រុមហ៊ុន BioNTech កើនដល់ ២៥ ភាគរយឯណោះ។
បញ្ជាក់ថាគិតត្រឹមយប់ថ្ងៃទី ៩ វិច្ឆិកា ឆ្នាំ ២០២០ ករណីអ្នកឆ្លងជំងឺ COVID-19 មានសរុប ៥០ ៨៧៣ ៧៧១ ករណី ដោយបាត់បង់ជីវិត ១ ២៦៤ ០៥០ ករណី និងជាសះស្បើយ ៣៥ ៨៦៥ ៦០៤ ករណី៕
ប្រភព៖ Bangkokpost | Ft
ព័ត៌មានថ្មីៗ
