៧ វិច្ឆិកា ២០២០ ពួកយើងសូមគោរពលាពុកម៉ែបងប្អូនហើយ ដើម្បីទៅរកការងារថ្មីចិញ្ចឹមជីវិតបន្ត!
ក្រោយបើកដំណើរការលើកចុងក្រោយចំនួន ៤ ថ្ងៃ កាលពីកំឡុងពេលឈប់សម្រាកបុណ្យអុំទូក អកអំបុក សំពះព្រះខែកាលពីប៉ុន្មានថ្ងៃមុន ទីបំផុតរមណីយដ្ឋាន ភូមិវប្បធម៌កម្ពុជា បានសម្រេចប្រកាសបិទទ្វារទាំងស្រុងចាប់ពីថ្ងៃទី ៧ វិច្ឆិកា ឆ្នាំ ២០២០ នេះតទៅហើយ។
បើតាមការបង្ហោះពីទំព័រ Cambodian Cultural Village ភូមិវប្បធម៌កម្ពុជា នៅមុននេះបានសរសេរថា៖ " ជំរាបសួរ ! ពុកម៉ែបងប្អូនជាទីស្រលាញ់
ថ្ងៃទី០៧ ខែវិច្ឆិកា ឆ្នាំ២០២០ ថ្នាក់ដឹកនាំ និងបុគ្គលិក ក្នុងរមណីយដ្ឋាន ភូមិវប្បធម៌កម្ពុជា ទាំងអស់ សូមលំឱនកាយគោរពលា ពុកម៉ែបងប្អូនជារៀងរហូត ដើម្បីទៅរកការងារថ្មី ដើម្បី ចិញ្ជឹមជីវិតបន្ត ។ សូមជំរាបលា!"
ជាមួយសារខាងលើ បានធ្វើឲ្យមហាជននិងបងប្អូនខ្មែរយើងជាច្រើនបង្ហាញការសោកស្ដាយ និងក្តីនឹករលឹក ហើយខ្លះក៏បង្ហាញការអរគុណដល់ទីតាំងនោះដែលបានបម្រើអារម្មណ៍ភ្ញៀវជាតិនិងអន្តរជាតិ ក៏ដូចជាបង្ហាញចែកចាយនូវវប្បធម៌ដ៏អស្ចារ្យរបស់កម្ពុជា នៅចន្លោះពេលជាង ១៧ ឆ្នាំមកនេះ។ <<ការលាដោយស្នាមញញឹម តែបង្កប់ដោយភាពនឹករលឹក>>
បញ្ជាក់ថា ភូមិវប្បធម៌កម្ពុជាមានទីតាំងស្ថិតនៅក្នុងក្រុងសៀមរាប។ ភូមិវប្បធម៌កម្ពុជាគឺជាកូនភូមិគំរូមួយដែលមានសំណង់ ផ្ទះ និង អាគារប្រវត្តិសាស្រ្តទំនាមទំលាប់របស់ប្រជាជនខ្មែរ និង ជីវភាពរបស់ជនជាតិទាំងអស់។ កន្លែងនេះមានទំហំ ២១០ ០០០ ម៉ែត្រការ៉េ។ ក្នុងភូមិវប្បធម៌កម្ពុជាមានភូមិចំនួន១២ ដែលតំណាងឲ្យវប្បធម៌ផ្សេងៗគ្នា និង ចរិតលក្ខណៈរបស់ជនជាតិ១៩។ ភ្ញៀវទេសចរណ៍អាចរីករាយជាមួយនឹងការសំដែងរបាំអប្សរា និង របាំរបស់ជនជាតិភាគតិចនៅកម្ពុជា និង អាចទស្សនាការសំដែងអំពីប្រពៃណីរៀបអាពាហ៌ពិពាហ៌របស់ជនជាតិខ្មែរ។ នៅតាមភូមិនិមួយៗ អ្នកទេសចរណ៍អាចមើលឃើញអំពីការបង្ហាញអំពីរបៀបឆ្លាក់លើថ្ម លើឈើ ដំគ្រឿងប្រាក់ និង ឆ្នៃត្បូងជាដើម៕
ប្រភព៖ Cambodian Cultural Village ភូមិវប្បធម៌កម្ពុជា
ព័ត៌មានថ្មីៗ
