លោក លៀក លីដា៖ រឿង The clock : Red wall ជាប់គាំងដោយសារ កូវីត១៩ អាចនឹងបរាជ័យបើសិនគ្មានការជ្រោមជ្រែងបន្ទាប់ពីក្រសួងវប្បធម៌ ជាពិសេសរដ្ឋាភិបាល
រឿងនាឡិកា វគ្គនាឡិកាដាស់វិញ្ញាណ ដែលផលិតដោយផលិតកម្ម LD ត្រូវបានមហាជនទទួលស្គាល់ថាពិតជាប្លែក និងមានគុណភាពខ្ពស់ ក្រោយពីបានចាក់បញ្ចាំងតាមបណ្តារោងភាពយន្តកន្លងមក។ ហើយដោយសារតែទទួលបានការគាំទ្រយ៉ាងច្រើនលើសលប់ LD ក៏បានថតភាគយន្តរឿងនាឡិកានេះជាវគ្គបន្តដោយបាន ដាក់ចំណងជើងថា រឿង The Clock : Red Wall (វគ្គជញ្ចាំងក្រហម)។
រឿង The Clock : Red Wall (វគ្គជញ្ចាំងក្រហម) ត្រូវបានលោក លៀក លីដា ជាផលិតករបានឱ្យដឹងថាជាភាពយន្តដែលចំណាយទុនច្រើន ហើយកាន់តែពិសេសថែមទាំងបានធ្វើការងារសហការដោយផលិតកម្ម LD (កម្ពុជា) ជាមួយនឹង Real Bros Production (ភូមា) ដោយមានតួអង្គឯកប្រុសរបស់ប្រទេសភូមា លោក ប៉ៃ Paing Takhon តារាខ្មែរល្បីៗជាច្រើនដួង ពិសេសគឺព្រះរាជវត្តមានដ៏ខ្ពង់ស្ពស់របស់ ព្រះនាងតូច នរោត្តម ជេនណា ចូលរួមសម្តែងផងដែរ ដោយគ្រប់គ្នាសង្ឃឹមថាវគ្គ២នេះនឹងកាន់តែពិសេសជាងមុន និងមិនធ្វើឱ្យទស្សនិកជនខកបំណងក្នុងការទស្សនាឡើយ ។
តែយ៉ាងណាមិញថ្មីៗនេះលោក លៀក លីដា ស្រាប់តែបានបង្ហាញពីផលវិបាក និងបញ្ហានៅក្នុងការផលិតខ្សែភាពយន្តខ្នាតធំមួយនេះក្រោយមានវិបត្តិជំងឺឆ្លងជាសកលគឺ វីរុស កូវីដ១៩ ដោយលោកបានរៀបរាប់ថាភាពយន្តរឿង The Clock : Red Wall (វគ្គជញ្ចាំងក្រហម) អាចនឹងបរាជ័យប្រសិនជាគ្មានការជ្រោមជ្រែងបន្ទាប់ពី ក្រសួងវប្បធម៌ ជាពិសេសរដ្ឋាភិបាល។
នេះបើតាមផលិតករលោក លៀក លីដា បានបង្ហោះសារលើគណនីផ្ទាល់ខ្លួន ដោយបានរៀបរាប់ថា៖ «រឿង The clock : Red wall រឺរឿងនាឡិកា២ ជាគំរោងសំខាន់ដ៏ធំមួយដែល LD សហការផលិតឡើងរវាងប្រទេសភូមានិងកម្ពុជា ហើយក៏ជាគំរោងស្ពានសម្រាប់ផលិតករខ្មែរផ្សេងទៀតដែលអាចឈានទៅយកគំរោងរឺហសការជាមួយប្រទេសភូមា ។LD បានដាក់ទន់ជាច្រើនលើគំរោងនេះ ដើម្បីនាំភាពយន្តខ្មែរនិងផលិតករខ្មែរ ទៅទីផ្សារភូុមា ប៉ុន្តែវាត្រូវបានជាប់គាំងដោយសារ កូវីត១៩ ហើយវាអាចនឹងបរាជ័យបើសិនគ្មាន ការជ្រោមជ្រែងបន្ទាប់ពី ក្រសួងវប្បធម៌ ជាពិសេសរដ្ឋាភិបាល។ ថ្ងៃស្អែកខ្ញុំនិងបញ្ចេញខ្លីបខ្លីមួយនៅក្នុងរឿង The clock ២ នេះ ដែលយើងបានថតមុនពេលកូវីត ដើម្បីបង្ហាយពីសមត្ថភាពរបស់ផលិតករខ្មែរយើងដែលបានផលិត នៅក្នុងវីឡាstudio , សូមលោកជំទាវរដ្ឋមន្ត្រីក្រសួងវប្បធម៌មេត្តាអន្តរាគមន៍លើគំរោងមួយនេះដែលអាចធ្វើទៅបាន»។
ដូច្នេះយើងទាំងអស់គ្នាមានតែរង់ចាំតាមដានទាំងអស់គ្នាថាតើ បញ្ហានៅក្នុងផលិតភាពយន្តនេះអាចនឹងបន្តទៅមុខទៀតឬយ៉ាងណា ឬក៏មានក្រសួងពាក់ព័ន្ធនានាណាខ្លះនឹងចេញមកជួយជ្រោមជ្រែងជាបន្តទៀត៕
ព័ត៌មានថ្មីៗ
