អ្នកនិពន្ធដែលផ្ទុះការរិះគន់រឿង សៀវភៅប្រើប្រាស់អក្សរឡាតាំងកត់សូរភាសាខ្មែរ ត្រូវបានក្រសួងវប្បធម៌ និងវិចិត្រសិល្បៈអញ្ជើញមកបកស្រាយបំភ្លឺហើយ
អ្នកនិពន្ធវ័យក្មេងមួយរូប ដែលមានឈ្មោះថា លី តារា បានធ្វើឱ្យផ្ទុះការរិះគន់ពេញបណ្តាញសង្គមព្រោះតែអ្នកនិពន្ធរូបនេះបានបង្ហោះស្នាដៃសៀវភៅថ្មីរបស់ខ្លួន ដែលមានពាក្យពេចន៍ជាអក្សរឡាតាំងសំនៀងជាភាសាខ្មែរ ដោយចំណុចនេះធ្វើឱ្យគ្រប់គ្នាយល់ថាអ្នកនិពន្ធរូបនេះបាននឹងកំពុងធ្វើឱ្យអក្សរសាស្ត្រខ្មែរធ្លាក់ចុះ នឹងអាចឈានដល់ការបាត់បង់ ។
យុវជនរូបនេះកំពុងបោះពុម្ពសៀវភៅ ជាភាសាអង់គ្លេសតែ សរសេរជា សូរសព្ទខ្មែរ ដាក់លក់ជាសាធារណៈ និង បង្ហោះលក់តាមបណ្ដាញសង្គមហ្វេសប៊ុក Dara Ly Book ទៀតផង ដោយការបោះពុម្ពសៀវភៅបែបនេះត្រូវបានអ្នកអភិរក្សអក្សរសាស្រ្តខ្មែរ យល់ឃេីញថា នឹងធ្វើអោយក្មេងៗជំនាន់ក្រោយកាន់តែភ្លេចប្រេីប្រាស់អក្សរសាស្រ្តជាតិរបស់ខ្លួន ។
ជាពិសេសដោយសារតែបច្ចុប្បន្ននេះនៅលេីបណ្ដាញសង្គមហ្វេសប៊ុក មានយុវវ័យជាច្រើនមិនសរសេរអក្សរខ្មែរទេ តែសរសេរអក្សរអង់គ្លេសតែសូរសព្ទខ្មែរវិញ វិញបែបនេះ ធ្វើឱ្យមានការយល់ឃើញថាអ្នកនិពន្ធបែរជាជម្រុញការភ្លេចប្រើប្រាស់អក្សរសាស្រ្តជាតិតាមរយៈសៀវភៅខ្លួនបន្ថែមទៀតទៅវិញ។
យ៉ាងណាមិញ បើតាមអ្នកនិពន្ធរូបនេះបកស្រាយថា អត្ថបទភាសាឡាតាំងសំនៀងខ្មែរនេះគ្រាន់តែជាសំណេរដកស្រង់ពីហ្វេន Edition អមតាមអត្ថបទជាភាសាអង់គ្លេសរបស់ខ្លួនប៉ុណ្ណោះដើម្បីជាការច្នៃប្រតិដ្ឋថ្មីឱ្យកាន់តែទទួលបានការចាប់អារម្មណ៍ តែទោះមានការបកស្រាយយ៉ាងណាពេលនេះ អ្នកនិពន្ធ លី តារា ត្រូវបាន ក្រសួងវប្បធម៌ និងវិចិត្រសិល្ប: ហៅមកសួរនាំហើយ។
នេះបើយោងតាមរយៈគណនីហ្វេសប៊ុកផេកជាផ្លូវការរបស់ ក្រសួងវប្បធម៌ និងវិចិត្រសិល្ប: បានឱ្យដឹងថា៖ «ក្រសួងវប្បធម៌និងវិចិត្រសិល្បៈអញ្ជើញ លោក លី តារា មកបកស្រាយបំភ្លឺអំពីការបោះពុម្ពផ្សព្វផ្សាយសៀវភៅ Possible Crush ដែលមានផ្នែកខ្លះបានប្រើប្រាស់អក្សរឡាតាំងកត់សូរភាសាខ្មែរ។
កាលពីថ្ងៃសុក្រ ១០កើត ខែភទ្របទ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី ២៨ ខែសីហា ឆ្នាំ២០២០ ក្រសួងវប្បធម៌និងវិចិត្រសិល្បៈបានអញ្ជើញ លោក លី តារា មកបកស្រាយបំភ្លឺអំពីការបោះពុម្ពផ្សព្វផ្សាយសៀវភៅ Possible Crush ដែលមានផ្នែកខ្លះបានប្រើប្រាស់អក្សរឡាតាំងកត់សូរភាសាខ្មែរ។សំណេរនិងការបោះពុម្ពផ្សាយបែបនេះធ្វើឲ្យអាប់ឱននិងប៉ះពាល់ធ្ងន់ធ្ងរដល់អក្សរខ្មែរដែលមានចំណាស់រាប់ពាន់ឆ្នាំរបស់ជាតិ។
ក្នុងជំនួបដែលមានការចូលរួមពីតំណាងក្រុមប្រឹក្សាជាតិភាសាខ្មែរផងនោះ លោក លី តារា បានទទួលស្គាល់កំហុសឆ្គងដែលកើតមានដោយអចេតនានិងដោយពុំបានគិតគូរគ្រប់ជ្រុងជ្រោយរបស់លោក។ លោកបានសន្យាថានឹងប្រមូលសៀវភៅដែលបានចេញផ្សាយហើយនោះមកវិញ ហើយនឹងធ្វើការកែប្រែកុំឲ្យមានកំហុសឆ្គងបែបនេះកើតទៀតនៅពេល អនាគត»៕
ព័ត៌មានថ្មីៗ
