ស្គាល់ទេ ដើមប្រោះ ឬប្រោះស្វា រុក្ខជាតិឱសថជំនួយច្រើនយ៉ាង ពិសេសអាចយកធ្វើអន្លក់ និងធ្វើម្ហូបជាច្រើនមុខបានទៀត
រដូវការនេះ ដើមប្រោះ ឬប្រោះស្វា កំពុងលូតលាស់យ៉ាងស្រស់បំព្រង ក្នុងដែនជម្រកសត្វព្រៃសង្ឃរុក្ខាវ័ន ខេត្តឧត្ដរមានជ័យ និងតំប់ន់ទីព្រៃដទៃទៀត។
ដើមប្រោះ ឬប្រោះស្វា ( Sand ginger) យោងតាម( Natural resources at my Village,2014) បានឱ្យដឹងថាវាជារុក្ខជាតិប្រភេទស្មៅ គ្មានដើម ឫសរីកធំជាមើម ស្លឹកមាន ២ -៣សន្លឹក គ្របគល់លាតផ្ទាល់លើដី ផ្ទៃស្លឹកធំទូលាយ ស្តើងពណ៌ក្រហមរលីងនៅលើផ្ទៃ ។ ឯយោងតាមវចនានុក្រមសម្តេចព្រះសង្ឃរាជ ជួន ណាត បានឱ្យដឹងថា ប្រោះស្វា នេះមានមើមមានក្លិនហាងឆួល ស្លឹកខ្ចីប្រើការទទួលទានបានឬប្រើអាអន្លក់ជាបន្លែក៏បាន។
តាមវិទ្យាសាស្រ្ត បានឱ្យដឹងបន្ថែមថា ដើមនេះគេប្រើជាថ្នាំសម្រាប់រំលាយអាហារ ព្យាបាលអាការៈបរិភោគពិបាករលាយ ព្យាបាលឈឺក្រពះ លើសឈាម ឈឺចុកទ្រូង ឈឺក្នុងពោះ ហឺត រាគ ក្អក ក្អួត ប្រើសម្រាប់ត្រាំអាល់កុល សម្រាប់លាបរឹត ឈឺសន្លាក់ឆ្អឹង ស្ពឹកស្រពន់ដៃជើង ...ជាដើម ។
បន្ថែមពីនេះ ស្លឹកវាអាចធ្វើជាបន្លែស្រស់ អន្លក់ បុកទឹកគ្រឿង សម្រាប់យកមកឆា ញាំ ឬភ្លា និងសម្លប្រហើរក៏បាន ។ ក្រៅពីតួនាទីជាឱសថ និងមុខម្ហូបសម្រាប់មនុស្សដែលសំបូរទៅដោយសារធាតុចិញ្ចឹមជាច្រើនហើយនោះ ដើមប្រោះ ក៏ជាចំណីសម្រាប់សត្វព្រៃដូចជា: សត្វទន្សោង សត្វឈ្លូស ជ្រូកព្រៃ-ល-ដែលកំពុងរស់នៅក្នុងតំបន់ដែនជម្រកសត្វព្រៃសង្ឃរុក្ខាវ័នផងដែរ ៕
កែសម្រួលអត្ថបទពី៖ Ministry of Environment
ព័ត៌មានថ្មីៗ
