ខ្ញុំអត់ចូលចិត្តសន្យាច្រើនទេ តែបើខ្ញុំស្រឡាញ់ គឺស្រឡាញ់ហើយ ហើយក៏ដឹងថា មនុស្សស្រឡាញ់គ្នា គេគួរធ្វើបែបណាដើម្បីដៃគូដែរ
ខ្ញុំមិនចូលចិត្តសន្យា ព្រោះមិនចង់បោក ឬលួងចិត្តឱ្យអ្នកណាមកសប្បាយចិត្ត ឬរំពឹងថា ចង់បានក្ដីសង្ឃឹមពីខ្ញុំ ហើយត្រូវមកខកចិត្តពេលក្រោយដោយសារតែខ្ញុំនោះឡើយ។ ពេលខ្លះ មនុស្សដែលចូលចិត្តសន្យានេះ សន្យានោះ ព្រោះតែព្យាយាមចង់ដោះសារ ឱ្យរួចខ្លួនមួយគ្រាៗតែប៉ុណ្ណោះ មួយវិញទៀត អ្នកដែលពូកែតែសន្យា ភាគច្រើនគឺ មិនដែលធ្វើ់អ្វីកើតជាការ ឬធ្វើបានតាមពាក្យខ្លួននិយាយនោះឡើយ។
សម្រាប់ខ្ញុំ ចំពោះស្នេហា ឬចំពោះមនុស្សដែលខ្ញុំស្រឡាញ់ ខ្ញុំក៏មិនចង់សន្យាអ្វីច្រើនដែរ តែអ្វីដែលគួរធ្វើ ឬមិនគួរធ្វើ គឺខ្ញុំដឹងច្បាស់ណាស់ ព្រោះខ្ញុំឱ្យតម្លៃក្ដីស្រឡាញ់ ខ្ញុំឱ្យតម្លៃមនុស្សដែលខ្ញុំស្រឡាញ់ ដូច្នេះ ខ្ញុំមិនសន្យាផ្ដេសផ្ដាសទេ។
- កុំបារម្ភ ទោះបីខ្ញុំមិនសន្យាថាស្រលាញ់រហូត តែដរាបណាអ្នកនៅតែស្រឡាញ់ ហើយស្មោះនឹងខ្ញុំ ខ្ញុំក៏នឹងមិនក្បត់ ឬបោះបង់អ្នកចោលដែរ។
- ខ្ញុំមិនសន្យាថាស្មោះរហូតទេ តែមនុស្សខ្ញុំស្រឡាញ់ គឺស្រឡាញ់ហើយ ហើយក៏មិនក្បត់ដៃគូ មានចិត្តវៀចវេរនោះដែរ។
- ខ្ញុំមិនសន្យាថាអាចនៅក្បែរអ្នករហូតទេ ប៉ុន្តែគ្រប់ពេល ដែលអ្នកត្រូវការ រាល់ពេលដែលអ្នកមានបញ្ហា មិនថាលំបាកប៉ុនណាទេ ខ្ញុំក៏នឹងនៅក្បែរ មិនចោល មិនបោះបង់ មិនឱ្យអ្នកលំបាកតែម្នាក់ឯងនោះឡើយ។
- មិនសន្យាថាអាចនៅមើលថែ និងធ្វើឱ្យអ្នកញញឹមមានក្តីសុខរហូតទេ តែខ្ញុំនឹងព្យាយាមឱ្យបានល្អបំផុត ទោះយ៉ាងណា ក៏ខ្ញុំនៅត្រង់នេះមិនទៅណា ក៏មិនឱ្យអ្នកណាមកធ្វើបាប ឬមើលងាយអ្នកបានដែរ។
- ខ្ញុំប្រហែលជាមិនទាន់ល្អគ្រប់គ្រាន់ទេ តែអ្វីដែលខ្ញុំមាន អ្វីដែលខ្ញុំធ្វើគឺ ដើម្បីមនុស្សដែលខ្ញុំស្រឡាញ់ ហើយវាក៏ជាធាតុពិត ចរិតពិតរបស់ខ្ញុំផងដែរ។
អ្នកជឿ ឬមិនជឿ ទុកចិត្ត ឬមិនទុកចិត្ត ខ្ញុំចង់ឱ្យអ្នកផ្ដោតលើទង្វើ កាយវិការរបស់ខ្ញុំឱ្យបានច្រើន មិនមែនលើពាក្យសម្ដីនោះឡើយ ខ្ញុំអាចមិនមែនជាមនុស្សដែលសម្ដីពីរោះ ពូកែលួងលោម ឬពូកែសន្យា តែខ្ញុំជាមនុស្សដែលស្រឡាញ់អ្នកពិត ហើយធ្វើនូវទង្វើពិតឱ្យអ្នកបានឃើញ។ ហើយខ្ញុំក៏មិនដឹងដែរថា ខ្ញុំស្រឡាញ់ ឬស្មោះចំពោះអ្នកច្រើន ឬខ្លាំងប់ុនណា ខ្ញុំគ្រាន់តែដឹងថា ខ្ញុំស្រឡាញ់ ហើយស្មោះ ចំពោះអ្នកតែម្នាក់ប៉ុណ្ណោះ៕
អត្ថបទ ៖ ភី អេក
ក្នុងស្រុករក្សាសិទ្ធ
ព័ត៌មានថ្មីៗ
