Ronaldo បាត់បង់ឱកាសប្រជែងកំណត់ត្រាសំខាន់មួយ ពេល Juve ត្រូវប៉ះ Brescia យប់នេះ
ការប្រកួតរវាង Juventus និង Bresica នៅក្របខ័ណ្ឌ Serie A របស់អ៊ីតាលី នាវេលាម៉ោង ០៩:០០ នាទីយប់នេះ នឹងពុំមានវត្តមានកីឡាករឆ្នើម Cristiano Ronaldo នោះឡើយ ពោលនឹងធ្វើឲ្យរូបគេបាត់បង់ឱកាសគ្រោងកំណត់ត្រាដ៏សំខាន់មួយ។
នៅបញ្ជីកីឡាករទាំង ២០ រូបដែល Juventus ត្រៀមដាក់តតាំងនៅការប្រកួតខាងលើ គឺនៅតំបន់ប្រយុទ្ធមានតែកីឡាករ Dybala, Cuadrado, Higuain និង Olivieri។ បើតាមការបញ្ជាក់ពី Goal អវត្តមានខ្សែប្រយុទ្ធវ័យ ៣៥ ឆ្នាំ មិនមែនដោយសារបញ្ហារបួសទេ តែដោយសារចាំបាច់ត្រូវការពេលវេលាសម្រាក ក្រោយចាយកម្លាំងច្រើននៅប៉ុន្មានប្រកួតកន្លងមក។
Ronaldo នឹងខកខានឱកាសស៊ុតបញ្ចូលទី ១១ ប្រកួតជាប់គ្នានៅក្របខ័ណ្ឌ Serie A បន្ទាប់ពីប្រកួតមុនលោកធ្វើបាន ១០ ប្រកួតជាប់គ្នាទៅហើយនោះ។
នេះមានន័យថា Gabriel Batistuta អតីតកីឡាកររបស់ Fiorentina នៅតែគ្រោងកំណត់ត្រាស៊ុតបញ្ចូលទី ១១ ប្រកួតជាប់គ្នានៅ Serie A ដដែល ជាកំណត់ត្រាចាស់កាលពីរដូវកាល ១៩៩៤/៩៥។ បែបណាមិញបើធៀបនឹងកំណត់ត្រាដាច់គេក្នុងលោក គឺធ្វើបានដោយ Lionel Messi នារដូវកាល ២០១២/១៣ ស៊ុតបញ្ចូលទី ២១ ប្រកួតជាប់ៗគ្នា៕
រក្សាសិទ្ធប្រែសម្រួល៖ Knongsrok
ព័ត៌មានថ្មីៗ
