ណាត់ក្រាស់ ណាត់គូស្នេហ៍នៅ? ខែក្រោយអង្គរវត្តមានព្រឹត្តិការណ៍ថ្ងៃរះចំកំពូលប្រាសាទអង្គរវត្ត ដឹងតែស្អាតខ្លាំង
ប្រាសាទអង្គរវត្ត ក្រៅពីមានភាពអស្ចារ្យនៅក្នុងស្នាដៃសាងសង់បង្កប់ដោយក្បាច់ក្បូររចនាល្អពិចិត្រ និងធំស្កឹមស្កៃ ប្រាសាទដែលល្បីបំផុតមួយនេះ ក៏មានព្រឹត្តិការណ៍ព្រះអាទិត្យរះចំកណ្តាលកំពូលប្រាសាទដ៏អស្ចារ្យ ២ដង ជារឿងរាល់ឆ្នាំផងដែរ ដោយបាតុភូតនេះត្រូវបានគេឱ្យឈ្មោះថា «សមរាត្រី ឬហៅថា Equinox» ដោយ សមរាត្រី ជាពេលវេលាដែលថ្ងៃ និងយប់ មានរយៈពេលស្ទើរតែស្មើគ្នា។ បាតុភូតសមរាត្រីតែងតែកើតមាន២ដង ជារៀងរាល់ឆ្នាំ គឺសមរាត្រីរដូវប្រាំង (Vernal Equinox) កើតទ្បើងនៅអំឡុងខែមីនា និងសមរាត្រីរដូវវស្សា (Autumnal Equinox) កើតទ្បើងនៅអំឡុងខែកញ្ញា។
សម្រាប់ឆ្នាំនេះ ព្រឹត្តិការណ៍ដ៏ពិសេសនេះត្រូវបានគេដឹងថានឹងកើតឡើងនៅនៅព្រឹកព្រលឹមស្រាងៗថ្ងៃទី ២១ មីនា ឆ្នាំ២០២០ ខាងមុខនេះ ពោលវាគឺជាព្រឹត្តិការណ៍ប្រចាំឆ្នាំដ៏អស្ចារ្យបំផុតនៃប្រាសាទអង្គរវត្ត ហើយជារៀងរាល់ឆ្នាំភ្ញៀវទេសចររាប់ពាន់នាក់តែងរងចាំផ្ដិតយកនូវរូបភាពដ៏អច្ឆរិយនេះ ។ ដូច្នេះកុំភ្លេចណាត់មិត្តភក្តិ ក្រាស់ ឬគូស្នេហ៍មកមើលផ្ទាល់ភ្នែកផង ព្រោះមួយឆ្នាំ មានតែ២ដងតែប៉ុណ្ណោះ កុំខកខានវេលាអស្ចារ្យនេះឱ្យសោះ។
គួរឱ្យដឹងផងដែរថា ព្រឹត្តិការណ៍ព្រះអាទិត្យរះចំកណ្តាលប្រាង្គប្រាសាទមិនមែនជារឿងចៃដន្យនោះឡើយ តែជាបំណងរបស់បុព្វបុរសខ្មែរយើងតែម្តងដោយមានចំណេះវិជ្ជាការយល់ដឹងខ្ពស់ពីកត្តាតារាសាស្ត្រច្បាស់ ស្តែងឱ្យឃើញពីអច្ឆរិយភាពនៃប្រាសាទអង្គរដែលត្រូវបានបុព្វបុរសខ្មែរយើងកសាងដោយមានការគិតគូរអំពីស្ថាបត្យកម្ម និងការផ្សារភ្ជាប់ជាមួយនឹងធម្មជាតិយ៉ាងច្បាស់លាស់គួរឲ្យស្ញប់ស្ញែង ៕
ព័ត៌មានថ្មីៗ
