ឆ្ងល់អត់? វីរុស Corona ថ្មីនេះសាហាវណាស់ តែឈ្មោះបែរជាពីរោះយ៉ាងនេះទៅវិញ តើមកពីមូលហេតុអ្វី?
ជាការពិតណាស់ ថ្មីៗនេះ វីរុសកូរ៉ូណា (Coronaviruses) គេជាពពួកវីរុសដែលកំពុងតែឆ្លងរីករាលយ៉ាងខ្លាំងពាសពេញប្រទេសចិន ហុងកុង ម៉ាកាវ និងតៃវ៉ាន់ ដោយការផ្ទុះជំងឺនេះដំបូងគឺចេញពីទីក្រុង Wuhan ខេត្ត Hubei ប្រទេសចិន ថែមទាំងបានរាលដាលទៅដល់ ២៣ប្រទេសផ្សេងទៀត ដូចជាថៃ ជប៉ុន សិង្ហបុរី កូរ៉េខាងត្បូង អូស្ត្រាលី ម៉ាឡេស៊ី បារាំង សហរដ្ឋអាមេរិក អាល្លឺម៉ង់ វៀតណាម អេមីរ៉ាតអារ៉ាប់រួម កាណាដា អ៊ីតាលី រុស្ស៊ី ចក្រភពអង់គ្លេស កម្ពុជា ហ្វាំងឡង់ ឥណ្ឌា ណេប៉ាល់ ហ្វីលីពីន ស្រីលង្កា ស៊ុយអែត និងអេស្ប៉ាញ។ ដោយអ្នកជំងឺទូទាំងពិភពលោកឡើងដល់ជាង១០០០០នាក់ហើយ។
វីរុស កូរ៉ូណា (Coronaviruses) ត្រូវបានគេដឹងថាមានរោគសញ្ញាដំបូងដូចជាជំងឺផ្តាសាយអ៊ិចឹង ដូចជាមាន ការហៀរសំបោរ ក្អក ឈឺបំពង់ក និងក្ដៅខ្លួនជាដើម ហើយ វីរុសនេះ ជាធម្មតាឆ្លងពីមនុស្សម្នាក់ទៅមនុស្សម្នាក់ទៀតតាមរយៈទឹកមាត់ និងការប៉ះពាល់ជាមួយអ្នកជំងឺផ្ទាល់តែម្តង ។
តើអ្នកឆ្ងល់ទេថា មូលហេតុអ្វីបានជាវីរុសថ្មីនេះ ត្រូវបានគេដាក់ឈ្មោះដូច្នេះ?
វីរុសថ្មី ដែលគេហៅថា វីរុសកូរ៉ូណា ឬ នូវ៉ែលកូរ៉ូណា វីរុស ជាភាសាផ្លូវការ Novel Coronavirus ឬហៅថា 2019-nCoV ជាដំបូងមូលហេតុដែលគេបានដាក់ឈ្មោះវីរុសមួយនេះបែបនេះ គឺដោយសារតែពេលគេយកវីរុសនេះមកវិភាគ និងពិនិត្យដោយប្រើឧបករណ៍វេជ្ជសាស្រ្ត គេបានឃើញថាវាមានរូបរាង ជាបន្លាៗ រាងដូចជាមកុដ (មកុដខាងប៉ែកអឺរ៉ុប) ។
ដូច្នេះហើយបានជាគេសម្រេចដាក់ឈ្មោះវាជាផ្លូវការថា Novel Coronavirus ដោយ៖
-Novel ជាភាសាឡាតាំង មានន័យថា New គឺ ថ្មី
-Corona ជាភាសាឡាតាំង មានន័យថា មកុដនេះឯង ទើបឱ្យឈ្មោះវាជាផ្លូវការ « Novel Coronavirus » ។
ជាការពិតណាស់បើតាមការស្រាវជ្រាវ វីរុសកូរ៉ូណាថ្មី ឬហៅថា 2019-nCoV គឺជាវីរុសកូរ៉ូណា មួយ ក្នុងចំណោមវីរុសទាំង ៧ ប្រភេទ ដែលអាចប៉ះពាល់ជីវិតរបស់មនុស្សខ្លាំងតាមរយៈការឆ្លង និងរាលដាលយ៉ាងកាចសាហាវឆាប់រហ័សតែម្តង៕
ដកស្រង់ពី៖ ExPress
ព័ត៌មានថ្មីៗ
