Trump ចេញប្រកាសថាមិនសងសឹកអ៊ីរ៉ង់ដោយប្រើសព្វាវុធទេ តែនឹងប្រើវិធីធ្វើបាបមួយនេះ
នៅការប្រកាសសេចក្តីថ្លែងការណ៍ចេញពីសេតវិមាន នៅឯរដ្ឋវ៉ាស៊ីនតោន សហរដ្ឋអាមេរិក ប្រធានាធិបតីលោក Donald Trump បានបញ្ជាក់ថាខ្លួននឹងមិនមានការសងសឹកដោយប្រើប្រាស់កម្លាំងយោធាណាមួយទៅលើទង្វើដែលអ៊ីរ៉ង់បានធ្វើមកលើមូលដ្ឋានទ័ពរបស់ខ្លួននោះទេ។
កាលពីថ្ងៃទី ៨ មករាកន្លងទៅអ៊ីរ៉ង់បានបង្ហោះម៊ីសីលជាច្រើនគ្រាប់ទម្លាក់ចូលមកមូលដ្ឋានទ័ពពីរកន្លែងរបស់អាមេរិក ដែលឈរជើងនៅទឹកដីអ៊ីរ៉ាក់។ តាមការបញ្ជាក់លោក Trump ថាគ្មានជនជាតិអាមេរិកណាមួយរបួសឬស្លាប់នោះទេ ក្នុងយប់កើតហេតុនោះ។
ដោយឡែកមន្ទីរបញ្ចកោណរបស់អាមេរិកបាននិយាយថាអ៊ីរ៉ង់វាយប្រហារម៊ីស៊ីល ១៦ គ្រាប់ ហើយយ៉ាងហោចណាស់ ១១ គ្រាប់ចំទៅលើគោលដៅនៃតំបន់មូលដ្ឋានទ័ពអាកាស Al-Asad ប៉ុន្តែមិនបង្កការរងរបួសណាមួយឡើយ។
តាមរយៈការថ្លែងរបស់ Trump បានមានប្រសាសន៍ថា៖ "ជាការពិតយើងមានប្រព័ន្ធយោធានិងអាវុធប្រើប្រាស់ដ៏អស្ចារ្យ តែនេះមិនមានន័យថាយើងចាំបាច់ត្រូវតែប្រើប្រាស់វានោះទេ ដោយយើងមិនចង់ប្រើវាឡើយ និយាយជារួមគឺទាំងផ្នែកយោធានិងសេដ្ឋកិច្ចរបស់អាមេរិកគឺរឹងមាំខ្លាំងណាស់"។
ទន្ទឹមនោះ លោក Trump ក៏បង្ហើបពីការគំរាមកំហែងលើផ្នែកសេដ្ឋកិច្ចចំពោះអ៊ីរ៉ង់វិញ ដោយថានឹងដាក់ទណ្ឌកម្មកម្រិតធ្ងន់មួយទៅលើអ៊ីរ៉ង់បន្ថែមទៀត ដើម្បីឆ្លើយតបទៅនឹងទង្វើដែលប្រទេសស្ថិតនៅមជ្ឈឹមបូព៌ាមួយនេះបានធ្វើ។
គួរបញ្ជាក់ថា Trump ក៏បានប្រកាសថាប្រទេសខ្លួនត្រៀមនឹងចាប់ដៃសហការជួយឲ្យអ៊ីរ៉ង់ក្លាយជាប្រទេសមានសន្តិភាពមួយផងដែរ ប៉ុន្តែប្រសិនណាអ៊ីរ៉ង់នៅតែរឹងរូសបែបនេះ នោះលទ្ធផលក៏ដឹងថានឹងទៅជាបែបណានោះដែរ៕
ប្រភព៖ Reuters
ព័ត៌មានថ្មីៗ
