តោះទៅលេង! មិននឹកស្មានសោះថា ខេត្តសៀមរាប ទឹកធ្លាក់ចង្រ្គានរយ មានទេសភាពស្អាតពិសេសបែបនេះ
សៀមរាប៖ ថ្មីៗនេះ សម្រាប់អ្នកដែលទៅលេងខេត្តសៀមរាប ប្រាកដជាមានកន្លែងកម្សាន្តថ្មីមួយទៀតហើយ ល្បីថាមានទេសភាពស្រស់ស្អាតប្លែកអមដោយព្រៃភ្នំ ជាពិសេសទឹកធ្លាក់ត្រជាក់ស្រេបគួរជាទីគយគន់នោះគឺ « ទឹកធ្លាក់ចង្ក្រានរយ »។
« ទឹកធ្លាក់ចង្ក្រានរយ » គឺជាតំបន់ទេសចរណ៍មួយ ដែលមានទឹកធ្លាក់ស្អាតមួយនេះ ត្រូវបានគេតំណាលពីប្រវត្តិដំបូងថា ឈ្មោះ ភ្នំចង្ក្រាន ត្រូវបានគេដាក់តាំងពីសម័យមុន ដោយសារសំបូរមុំចង្ក្រានជាច្រើន ដែលអាចដាក់គម្របគ្រប់ទំហំឆ្នាំង និងត្រូវបានគេនិយាយតគ្នាថាជាកន្លែងដាំថ្នាំរបស់ស្ដេចគំលង់។
ទឹកធ្លាក់ដ៏ស្រស់ត្រកាលមួយនេះអាចឱ្យភ្ញៀវទេសចរណ៍ជាតិ និងអន្តរជាតិទៅលេងងូតទឹកកម្សាន្តក៏បាន ចង់សម្រាកបោះតង់តាមរបៀបផ្សងព្រេងក៏បាន ដោយផ្លូវធ្វើដំណើរមានភាពរលូនល្អ មិនពិបាកនោះទេ តែយកល្អគួរតែជិះម៉ូតូទៅ ឬបើកឡានខ្ពស់ៗ ។
គួរឱ្យដឹងផងដែរថា « ទឹកធ្លាក់ចង្រ្គានរយ » ស្ថិតក្នុងសហគមន៍មានផ្ទៃដីរហូតដល់ ៩៥៥៤ ហិកតា នៅក្នុង ភូមិបាយដុត ឃុំស្វាយស ស្រុកវ៉ារិន ខេត្តសៀមរាប មានចម្ងាយប្រមាណ ៧០ គីឡូម៉ែត្រ ពីក្រុងសៀមរាបធ្វើដំណើរ ដោយត្រូវជិះតាមបណ្ដោយផ្លូវពាក់ស្នែង ក្បែរពើងតានាន់ ពីផ្លូវបត់ចូលអាស្រមមនោរម្យពើងតានាន់ច្រកចូលទី២ ប្រហែល១៥គីឡូម៉ែត្រ ៕
រក្សាសិទ្ធអត្ថបទ៖ ក្នុងស្រុក
ប្រភពរូបភាព៖ Team MTR Drag/ Sophon Phototgraphy
ព័ត៌មានថ្មីៗ
