«សុបិន» ចំណងជើងប្រលោមលោកថ្មីរបស់ ម៉ានិត បានចេញលក់ថ្ងៃទី ៨ធ្នូ ២០១៩ !
ភ្នំពេញ៖ ក្រៅពីជំនាញអ្នកនិពន្ធបទចម្រៀង អ្នកចម្រៀង លោកម៉ានិត ក៏មានជំនាញពិសេសមួយទៀតគឺ អ្នកនិពន្ធសៀវភៅប្រលោមលោក និងអត្ថបទភាពយន្ត។ ប្រលោមលោកជាច្រើនក្បាលដែលបានចេញផ្សាយលើទីផ្សាររបស់លោក តែងទទួលបានការគាំទ្រយ៉ាងខ្លាំង ដោយសារពាក្យពេចន៍ និងសាច់រឿងប្រទាក់ក្រឡា គួរឱ្យចង់អាន និងតាមដាន ទើបធ្វើឱ្យកិត្តិយសរបស់លោក ម៉ានិត កាន់តែមានប្រជាប្រិយភាព យ៉ាងខ្លាំង ជាមួយការងារជាអ្នកនិពន្ធប្រលោមលោក។
បេសកកម្មមួយ ស្ដេចម៉ែស្ដេចកូន ផ្ទះកណ្ដាលបឹង កូនទី៦... សុទ្ធតែជាប្រលោមលោកដែលលេចធ្លោ និងទទួលបានការកោតសសើរយ៉ាងខ្លាំងពីសំណាក់អ្នកនិយម អានប្រលោមលោក ដោយសារសាច់រឿងនីមួយៗមានភាពរស់រវើក និងអត្ថបទទាក់ទាញ ស្មានមិនត្រូវ និងសីលវិធីក្នុងការសសេរ មានភាពច្នៃប្រឌិតខ្ពស់។ ជាក់ស្ដែងថ្មីៗនេះ លោកម៉ានិត បានប្រកាសចេញសៀវភៅថ្មីមួយក្បាលទៀតក្នុងចំណងជើងថា «សុបិន» ដែលក្របមុខជាគំនូរនៃនារីម្នាក់ ក្នុងឈុតរ៉ូបពណ៌ផ្កាឈូក អមដោយ ទេសភាពពណ៌សខ្មៅ ហាក់ដូចជាមនុស្សម្នាក់កំពុងតាមរកក្ដីសុបិនអ៊ីចឹង។
ថ្ងៃនេះក្នុងបណ្ដាញសង្គម Facebook លោកម៉ុង ម៉ានិត បានប្រកាសថ្ងៃចេញផ្សាយប្រលោមលោកថ្មីមួយនេះ នៅថ្ងៃទី ៨ ខែធ្នូ ឆ្នាំ២០១៩ ហើយក៏ទទួលបានការចាប់អារម្មណ៍យ៉ាងច្រើនពីប្រិយមិត្តផងដែរ។ តោះកុំចាំយូរ គាំទ្រស្នាដៃនិពន្ធពីអាយដល់យើងទាំងអស់គ្នា ហើយទទួលយកបទពិសោធថ្មីនៃប្រលោមលោក សុបិន ថាតើសុបិនរបស់អ្នកនិពន្ធ ជាអ្វី? សុបិនរបស់តួក្នុងសៀវភៅនេះជាអ្វី? ឬក៏ អ្វីជាសុបិននោះ?
ព័ត៌មានថ្មីៗ
