ឮថា ” ប៉ៃ ដាវីឌ ” មិនទទួលបានពាន តែមមាញឹកស្ទើរគ្រប់ខេត្តក្រុង
ភ្នំពេញ ៖ អ្នកចម្រៀងជំនាន់ថ្មី លោក ប៉ៃ ដាវីឌ មួយរយៈនេះយីអ៊ុនហាក់ខ្ពស់ត្រដែត ព្រោះទទួលបានសន្ទុះគាំទ្រខ្លាំងទាំងតាមរយៈបទចម្រៀង Cover ល្បីៗ និងតាមរយៈបទចម្រៀង Original ផ្ទាល់ខ្លួន២បទ ដែលទើបតែចេញមានចំណងជើងថា « ល្ងង់បំផុត » និង « ហត់ » តែសុទ្ធតែបទចម្រៀងដែលល្បីក្នុងស្រទាប់យុវវ័យ។
បើក្រឡេកទៅកាន់អតីតកាល ការពិតទៅ លោក ប៉ៃ ដាវីឌ ត្រូវបានគេស្គាល់ថាគឺជាអតីតបេក្ខជនមួយរូបដ៏ មានសមត្ថភាពដែលបានចូលរួម កម្មវិធីប្រលងចម្រៀង Beat The Best រដូវកាលទី២ របស់ស្ថានីយ៍ទូរទស្សន៍ហង្សមាស ។ ត្បិតតែអតីតបេក្ខជនកម្មវិធីប្រលងចម្រៀង Beat The Best រូបនេះមិនទទួលបានពានក្នុង កម្មវិធីប្រលងចម្រៀងដ៏ល្បីនេះក៏ដោយ តែមកដល់ពេលនេះសមត្ថភាពរបស់ ប៉ៃ ដាវីឌ លើវិថីសិល្បៈកាន់តែវិវឌ្ឍន៍ទៅមុខជាលំដាប់ ឯបទចម្រៀងចេញមកក៏សុទ្ធតែផ្ទុះខ្លាំង រហូតទទួលបានការអញ្ជើញចូលរួម Event នៅតាមបណ្តាផាប់ល្បីគ្រប់ខេត្តក្រុងជាច្រើនដូចជា ៖ ភ្នំពេញ / ក្រុងតាខ្មៅ / ខេត្តតាកែវ /ស្វាយរៀង/ បាត់ដំបង/ ខេត្តបន្ទាយមានជ័យ / ស្ទឹងត្រែង / ក្រុងព្រះសីហនុ/ សៀមរាប និងប៉ោយប៉ែតជាដើម។
លទ្ធផលផ្លែផ្កាដ៏ល្អរបស់ លោក ប៉ៃ ដាវីឌ បានបង្ហាញថា ទោះបីជាមិនទទួលបានជោគជ័យនៅថ្ងៃមុន តែឱ្យតែមានសមត្ថភាពពិតប្រាកដ ហើយហ្វឹកហាត់បន្ថែម ប្រាកដជាអាចជោគជ័យបាននៅថ្ងៃនេះ ដូច " ប៉ៃ ដាវីឌ " ដ្បិតតែមិនទទួលបានពាន តែមានការងារមមាញឹកគ្រប់ខេត្តក្រុងតែម្តង៕
ព័ត៌មានថ្មីៗ
