11 និស្ស័យរបស់នារីស្អាតទាំងកាយទាំងចិត្ត នេះហើយជានារីមានគុណភាព ដែលនរណាៗក៏ចង់បានជាគូគ្រង
11 និស្ស័យរបស់នារីស្អាតទាំងកាយទាំងចិត្ត នេះហើយជានារីមានគុណភាព ដែលនរណាៗក៏ចង់បានជាគូគ្រង
1. មិនបោះបង់ដោយងាយៗ
ជាការពិតណាស់ភាពជោគជ័យដែលមនុស្សជាច្រើនប៉ងប្រាថ្នាវាមិនងាយស្រួលទេ វាត្រូវការការព្យាយាម ហើយក៏ត្រូវជួបការខកចិត្តជាច្រើនដែរ ដូច្នេះការធ្វើអ្វីមួយពិតជាគ្មានពាក្យងាយស្រួលនោះទេ តើនារីៗធ្លាប់លឺពាក្យនេះទេ easy come, easy go so! ប្រសិនបើអ្នកចង់ជោគជ័យ ចូលកំណត់គោលដៅហើយតស៊ូជាមួយវា ហត់បានតែកុំបោះបង់ ។
2. មិនពន្យារពេល
តើអ្នកធ្លាប់និយាយពាក្យ "ចាំតិចទៀត" ឬ "ចាំធ្វើនៅថ្ងៃស្អែកទៅ" ឬស្វែងរកលេសផ្សេងៗ សម្រាប់ខ្លួនឯង ឬឲ្យនរណាម្នាក់ឬទេ? ភ្ញាក់រឭកឡើងនារីៗឈប់ប្រព្រឹត្តបែបនេះទៅវាមិនឡូយទេ ការពន្យារពេលប៉ះពាល់ដល់អាកប្បកិរិយាអវិជ្ជមានឲ្យមនុស្សជាច្រើនទៀតធ្វើតាម ដូចជាការបញ្ជូនការងារមិនទាន់ពេល បែររកលេសនេះរកលេសនោះមកដោះសារ ការធ្វើវាជាញឹកញាប់នឹងធ្វើឱ្យអ្នកជឿលែងទុកចិត្តអ្នក ហើយពាក្យសម្ដីដែលចេញពីមាត់អ្នកវានឹងសាបទៅបន្តិចម្តងៗរហូតអស់តម្លៃ ។
3. ធ្វើការឱ្យល្អបំផុតតាមដែលអ្នកអាចធ្វើបាន
បើចង់ជោគជ័យ ត្រូវចាប់ផ្តើមពីគុណភាពការងារ ការធ្វើការឲ្យតែផុតៗពីដៃកុំស្មានអ្នកដទៃគេមិនដឹងណា ប៉ុន្តែប្រសិនបើអ្នកព្យាយាមធ្វើអស់ពីបេះដូង ដាក់ចិត្តធ្វើមួយរយភាគរយ ធ្វើឲ្យគេអាចទទួលស្គាល់ថាអ្នកកំពុងព្យាយាម ឲ្យតែធ្វើបែបនេះបានជោគជ័យនឹងនៅមិនឆ្ងាយប៉ុន្មានទេ ចុងក្រោយត្រូវតែបានតំណែងជាថៅកែស្រី ដែលមនុស្សជាច្រើនច្រណែនជាក់ជាមិនខាន ។
4. មានសុទិដ្ឋិនិយម មើលពិភពលោកក្នុងផ្លូវវិជ្ជមាន
សុទិដ្ឋិនិយមមានអាកប្បកិរិយាល្អក្នុងជីវិត
គឺជាការចាប់ផ្តើមនៃអ្វីគ្រប់យ៉ាង នៅពេលអ្នកមានអារម្មណ៍ល្អ ងាយញញឹម មើលពិភពលោកក្នុងផ្លូវវិជ្ជមាន អ្នកណាៗក៏ចង់នៅជិតដែរ តែផ្ទុយទៅវិញបើសូម្បីតែមុខឡើងក្រៀមក្រំ មានតែអារម្មណ៍អស់សង្ឃឹម គិតតែពីរឿងអវិជ្ជមាន តើអ្នកណាចង់ទៅជិត? ដូច្នេះហើយនារីៗត្រូវផ្លាស់ប្តូរទស្សនៈរបស់ខ្លួន ហើយក្លាយជាមនុស្សវិជ្ជមាន ការគិតវិជ្ជមានគឺជាច្បាប់ស្រូបទាញរឿងល្អៗចូលមកក្នុងជីវិត ។
5. ក្លាហានហ៊ានប្រឈមមុខ
ទាំងនេះគឺជាគុណសម្បត្តិរបស់អ្នកឈ្នះ ដែលហ៊ានប្រឈមមុខនឹងឧបសគ្គគ្រប់យ៉ាង ចូលកុំគេចទៀត! បើអ្នកជួបឧបសគ្គឬបន្លា ត្រូវគិតថាវាជាការធ្វើតេស្តដែលបង្កើនកម្លាំងរបស់អ្នកទ្វេដង ដូច្នេះការប្រឈមមុខនឹងឧបសគ្គ មិនមែនជារឿងអាក្រក់នោះទេ។
6. រួសរាយរាក់ទាក់ ចេះបន្ទាបខ្លួន
ដើម្បីក្លាយជាមនុស្សដែលមានទេពកោសល្យ និងស្រស់ស្អាត អ្នកត្រូវតែជាមនុស្សដែលមានចរិតល្អ គុណភាពរបស់នារីស្រស់ស្អាតគឺភាពរួសរាយរាក់ទាក់និងចេះបន្ទាបខ្លួន មិនក្រអឺតក្រទម ទោះបីជាអ្នកឈានជើងទៅរកភាពជោគជ័យក៏ដោយ ឬមានសមត្ថភាពខ្លាំងជាងគេក៏ដោយ បើអ្នកប្រព្រឹត្តចំពោះអ្នកដទៃឲ្យបានល្អ អ្នកនឹងទទួលបានចិត្ត និងសេចក្តីស្រឡាញ់យ៉ាងងាយ ត្រូវធ្វើជាស្រីស្អាតថ្លៃថ្នូរ ហើយត្រូវតែមានតម្លៃថ្លៃចំពោះសកម្មភាពផងដែរ។
7. ហ៊ាននិយាយថាសុំទោស / អរគុណ
បើយើងធ្វើខុសឬត្រូវការនិយាយរកជំនួយពីអ្នកដ៏ទៃ មិនមែនមានន័យថាអ្នកមិនឆ្លាត មិនឡូយ ឬមើលទៅមិនល្អទេ តើអ្នកធ្លាប់លឺទេ? ដំរីជើងបួនគង់តែមានភ្លាត់ អ្នកប្រាជ្ញចេះស្ទាត់គង់តែមានភ្លេច គ្រប់គ្នាសុទ្ធតែធ្លាប់មានកំហុស ប៉ុន្តែបើធ្វើខុសហើយធ្វើមិនដឹង មិននិយាយមិនស្តីមិនមាត់មិនក មិនចេះស្តាយក្រោយ វាមើលទៅមិនឡូយទាល់តែសោះ ដូច្នេះល្បិចទីមួយគឺនិយាយថាសុំទោសនិងអរគុណ វាជាអ្វីដែលអ្នកគួរនិយាយជាប់នឹងមាត់ ពាក្យសាមញ្ញដែលនឹងទទួលបានបេះដូងអ្នកជុំវិញខ្លួន ។
8. មិនមែនជាមនុស្សលក្ខណៈទឹកពេញកែវ/ តែងតែស្វែងរកចំណេះដឹងឥតឈប់
ការស្វែងរកចំណេះដឹងជានិច្ចនឹងបង្កើតតម្លៃ ទៅខ្លួនអ្នក យើងរស់នៅក្នុងសង្គមដែលមានមនុស្សមានទេពកោសល្យច្រើន ដូច្នេះយើងកាន់តែត្រូវរៀន នារីស្អាតៗមិនពិបាករកទេ ប៉ុន្តែមនុស្សស្រីហើយឆ្លាតលក្ខណៈ Limited Edition វាកាន់គួរឱ្យចាប់អារម្មណ៍ជាងអ្វីទាំងអស់ ។
9. យល់និងទទួលយកការខកចិត្តខ្លួនឯង
ធ្វើជាស្ត្រីដែលឆ្លាតនិងថ្លៃថ្នូ គឺជាស្ត្រីដែលហ៊ានទទួលយកនិងយល់ពីការពិត ការខកចិត្តយំស្រែកធ្វើឱ្យខ្លួនដុនដាប វាមិនមែនជាវិធីរបស់ស្រីស្អាតទាល់តែសោះ ដោយសារលង់ក្នុងការខកចិត្តនិងការឈឺចាប់ វានឹងធ្វើឱ្យជីវិតកាន់តែអាក្រក់ទៅៗ ដូច្នេះឈប់យំទៅហើយបន្តទៅមុខទៀត ទៅចាប់យកឱកាសដែលរង់ចាំយើងនៅខាងមុខ។
10. ជាមនុស្សមានហេតុផល
មនុស្សគ្រប់គ្នាចូលចិត្តនៅក្បែរមនុស្សមានហេតុផល បើនាងជាស្រីស្អាតប៉ុន្តែគ្មានហេតុផល វានឹងឱ្យនារីនោះមើលទៅមិនថ្លៃថ្នូរទាល់តែសោះ ប៉ុន្តែប្រសិនបើអ្នកមានហេតុផលហើយបន្តរស់នៅយ៉ាងមានក្តីសុខ ការស្ថិតនៅក្រោមហេតុនិងផល វានឹងអ្នកទៅរកជីវិតប្រសើរឡើងជាងមនុស្សអត់ហេតុផល ។
11. ថែរក្សាខ្លួនឯង
ច្បាប់ចុងក្រោយគឺឈដោយសមត្ថភាពខ្លួនឯង ការថែរក្សាខ្លួនឯងបាននេះហើយ ដែលធ្វើឲ្យយើងមើលទៅឡូយ តែឈប់សិន!! ត្រូវយល់បែបនេះនេះសិន ក្នុងន័យនេះវាមិនមែនថាអ្នកត្រូវតែធ្វើអ្វីគ្រប់យ៉ាងដោយខ្លួនឯង ឬឈប់សុំជំនួយពីអ្នកដ៏ទៃទេ អ្នកអាចសុំជំនួយពីអ្នកដទៃ និងអាចសងគេវិញបាន ។
យ៉ាងណាមិញសុំបន្ថែមបន្តិចទៀត ក្នុងករណីបើអ្នកមានសមត្ថភាពជួយអ្នកដទៃបាន គឺត្រូវជួយតាមកម្លាំងដែលអ្នកមាន តែកុំធ្វើឱ្យខ្លួនឯងពិបាក ឬនាំរឿងដាក់ខ្លួនឲ្យសោះ ៕
ប្រភព៖ Knongsrok
ព័ត៌មានថ្មីៗ
