សញ្ញាបង្ហាញថា យើងមិនសំខាន់ ឬមិនមានតម្លៃទាល់តែសោះសម្រាប់គេ!
នៅក្នុងទំនាក់ទំនង មិនថាជាស្នេហា ឬក៏មិត្តភក្តិនោះឡើយ បើចេញសញ្ញាទាំងនេះហើយ នោះមានន័យថា យើងមិនសំខាន់ ឬមិនមានតម្លៃសោះសម្រាប់គេ គេមិនដែលទុកយើងជាមិត្ត ឬដៃគូរបស់គេទេ យើងត្រឹមតែជាតួជំនួស ឬមនុស្សរំខានគេតែប៉ុណ្ណោះ។
១. យើងជាអ្នកចាប់ផ្ដើមមុនរហូត
មិនថាធ្វើអ្វី ទៅណាមកណា សូម្បីតែការផ្ញើសារ បបួលទៅណាក៏យើងជាអ្នកចាប់ផ្ដើមបបួលគេរហូត ហើយបបួលភាគច្រើនគេមិនទៅ បបួលពេលខ្លះគេមិនធ្វើ គេតែងតែបដិសេធ សញ្ញានេះហើយបង្ហាញច្បាស់ណាស់ថា យើងមិនសំខាន់ ឬមិនមានតម្លៃសម្រាប់គេសោះ។
២. គេបង្ហាញមុខ តែពេលដែលគេត្រូវការពឹង ឬប្រើយើង
ចំណុចនេះច្បាស់ណាស់ថា យើងសំខាន់ មានតម្លៃសម្រាប់គេតែពេលគេត្រូវការប្រើតែប៉ុណ្ណោះ និយាយាឱ្យអស់ទៅគឺ យើងត្រឹមជាកង់សឺកួរសម្រាប់គេ តែពេលដែលគេលែងត្រូវការ គេប្រាកដជាទាត់យើងចោលហើយ តែមុខយើងគេមិនមើលផង។
៣. គេតែងតែព្រងើយនឹងយើង
ជាការពិតណាស់ មនុស្សខ្លះមិនអើពើនឹងយើងទេ សូម្បីតែយើងតាមទ្រ ឬផ្គាប់ចិត្តគេ ក៏គេមើលទៅហាក់ដូចជាមិនពេញចិត្ត មិនដែលធ្វើអ្វីដែលជាការឆ្លើយតបឱ្យសមនឹងការលះបង់របស់យើងឡើយ។ បើមានសញ្ញានេះហើយ កុំនៅធ្វើឱ្យគេទើសទាល់ចិត្តទៀត គេមិនពេញចិត្តនឹងយើងទេ។
៤. មិនដែលសួរនាំ ឬចង់ដឹងពីសុខទុក្ខយើងសោះ
បើជាសង្សារ មិនថាយើងទៅណាមកណា ក៏គេមិនដែលខ្វល់យកចិត្តទុកដាក់ ឬចង់ដឹងដំណឹងយើងដែរ នេះគេមិនហៅថាមនុស្សស្រឡាញ់គ្នា ឬជាសង្សារនឹងគ្នាទេ គេហៅថា អ្នកដទៃហើយ។
៥. មិនដែលខឹង ឬអន់ចិត្តនឹងយើង
និយាយជារួមគឺ អារម្មណ៍គេទទេរស្អាតចំពោះយើង បើយើងសំខាន់ ឬមានតម្លៃសម្រាប់គេ គេប្រាកដជាបង្ហាញនូវអារម្មណ៍ ឬមានប្រតិកម្មណាមួយចំពោះយើងមិនខាន តែបើគេមិនដែលសូម្បីតែខឹង អន់ចិត្តនឹងយើងសោះ នោះមានន័យថា យើងមិនបានស្ថិតនៅក្នុងចិត្ត ឬអារម្មណ៍របស់គេទេ។
៦. ពេលយើងឆាត ឬCallទៅ មិនសូវលើក ឬមិនដែលតបមកវិញ
ពេលខ្លះមិនមែនគេរវល់ទេ គឺគេមិនចង់លើក ឬតបសាររបស់យើង។ តែមនុស្សខ្លះទៀតក៏បង្ហាញឱ្យឃើញថា យើងមិនសំខាន់ ឬមិនចាំបាច់ គឺតែងតែខកខានក្នុងការលើកទូរសព្ទយើង ឬឆាតរបស់យើង ឬពេលខ្លះឃើញហើយមិនCall ឬឆាតមកវិញទេ គឺមានន័យថា គេមិនខ្វល់នឹងយើងទាល់តែសោះ។
៧. តែងតែកុហក លាក់បាំងយើងស្ទើរគ្រប់រឿង
កុំថាឡើយឱ្យគេនិយាយរឿងរបស់គេប្រាប់យើង សូម្បីតែយើងសួរនាំគេបែបបារម្ភ យកចិត្តទុកដាក់ ក៏គេមិននិយាយត្រង់ប្រាប់យើងដែរ ពេលខ្លះ អេះអុញធ្វើដូចមិននិយាយ រឿងខ្លះនិយាយប្រាប់របៀបទើសទាល់ គេមិនដែលនិយាយអ្វីប្រាប់យើងសោះ នោះមានន័យថា គេមិនដែលទុកយើងជាមនុស្សស្និទ្ធ ឬគេទុកចិត្តយើងឡើយ យើង និងគេមិនខុសអីពីអ្នកដទៃដែលមិនស្គាល់គ្នានោះឡើយ។
បើក្នុងទំនាក់ទំនងរបស់អ្នក ប្រទះឃើញមានចំណុចទាំងនេះហើយ កុំនៅធ្វើឱ្យគេទើសទាល់ពេកអី ប្រញាប់ដើរចេញមកដើម្បីឱ្យគេបានធូរចិត្ត តែបើសង្ស័យថាគេមិនដូចអ្វីដែលយើងគិត នោះពេលដែលយើងចាកចេញ យើងប្រាកដជាអាចដឹងពីតម្លៃខ្លួនឯងកាន់តែច្បាស់ហើយ ថាយើងសំខាន់សម្រាប់គេ ឬក៏មិនសំខាន់៕
អត្ថបទ ៖ ភី អេក / ក្នុងស្រុករក្សាសិទ្ធិ
ព័ត៌មានថ្មីៗ
