ស្រីៗដែលរវល់ច្រើន ហើយចង់បានស្បែកចាំក្មេងជាងវ័យ ត្រូវធ្វើរឿងសាមញ្ញ ៣ នេះរាល់ថ្ងៃ
មនុស្សស្រីមួយចំនួន ដល់តែរវល់ខ្លាំងពេក ភ្លេចមើលថែសម្រស់ខ្លួនឯង ហើយគិតថា បណ្តែតបណ្តោយទៅតាមហ្នឹងសិនចុះ ព្រោះខ្លាចត្រូវចំណាយពេលច្រើនលែងបានធ្វើការរកស៊ី។
យ៉ាងណាក៏អ្នកមិនត្រូវរំលង ៣ ចំណុចខាងក្រោមនេះដែរ ដែលវាមិនទាមទារពេលវេលាយូរពេកនោះទេ ហើយអ្នកគួរតែអនុវត្តដើម្បីជាចំណែកជួយឲ្យស្បែកនៅចាំ ក្មេងជាងវ័យ និងមិនងាយជ្រីវជ្រួញ៖
៣) ទម្លាប់នៃការទទួលទានទឹក
រៀងរាល់ពេលព្រឹកព្រលឹម ក្រោយក្រោកពីគេងមក អ្នកត្រូវតែទទួលទានទឹកក្ដៅឧណ្ហ៍ៗ ១ កែវរៀងរាល់ព្រឹក ដោយវាមិនត្រឹមតែជួយដល់សរីរាង្គផ្នែកខាងក្នុងប៉ុណ្ណោះទេ ជាមួយសុខភាពស្បែកក៏ជួយបានដូចគ្នា។
ជាងនេះវាក៏ដូចបានកម្ចាត់ និងបញ្ចេញចោលដោយងាយនូវជាតិពុល ដែលបានផ្អាប់ទុកកាលពីថ្ងៃចាស់ ដោយឡែកការទទួលទានទឹកក្ដៅឧណ្ហ៍ៗ ១ កែវតូចភ្លាម បន្ទាប់ក្រោកពីដំណេក ល្អបំផុតប្រសិនអ្នកអាចបន្ថែមនូវទឹកឃ្មុំ និងក្រូចឆ្មារប៉ុន្មានចំណិតទៅក្នុងនោះ។
បន្ថែមពីនេះ ជាប្រចាំមិនថានៅទីណា កន្លែងណា វាមិនចំណាយពេលច្រើននោះទេ ពោលត្រូវមានទម្លាប់ទទួលទានទឹកយ៉ាងហោចណាស់ ១,៥ ទៅ ២ លីត្រ/ថ្ងៃ ដើម្បីបន្សាបជាតិពុល និងផ្តល់សារធាតុរ៉ែចាំបាច់ដល់ស្បែក ទើបជាការល្អ។
២) លាបឡេការពារកម្តៅថ្ងៃឲ្យបានទៀងទាត់
នៅរដូវក្តៅ ពេលកាំរស្មី UV ជះមកលើស្បែក វាងាយនឹងធ្វើឲ្យស្បែកស្ងួត ហើយខូចគុណភាពស្បែកពីធម្មជាតិ។ ដូច្នេះអ្នកត្រូវថែរក្សាវាឲ្យបានល្អ តាមរយៈការលាបឡេការពារកម្តៅថ្ងៃ តាមថាទោះមិនចេញទៅក្រៅក៏ដោយ នៅតែក្នុងផ្ទះអង្គុយធ្វើការមុខកុំព្យូទ័រ និងចុចទូរស័ព្ទក៏គួរតែប្រើប្រាស់វាដែរ។
អ្នកមិនទាមទារឲ្យចាយពេលប្រើប្រាស់ផលិតផលអ្វីច្រើនឡើយ ត្រឹមតែឡេការពារកម្តៅថ្ងៃមួយមុខគឺជួយបានច្រើនហើយ។ ចូរលាបវាមុនរយៈពេល ៣០ នាទី មុនពេលចេញទៅក្រៅ នេះនឹងជួយការពារស្បែកពីការចាស់ជាងវ័យ។
១) លុបគ្រឿងសម្អាងចេញ ហើយលាងមុខមុនចូលគេង
ពេលទៅធ្វើការ យើងតែងតែមានលាបតុបតែងមុខមាត់បន្តិចហើយ តែពេលត្រលប់មកផ្ទះវិញ ទោះនឿយហត់អស់កម្លាំងប៉ុណ្ណា ក៏មិនត្រូវគេងទាំងអ៊ីចឹងដែរ។ អ្នកត្រូវតែប្រកាន់ខ្ជាប់នៅទម្លាប់សម្អាតវាឲ្យបានល្អមុនចូលគេង។
យើងអាចប្រើប្រាស់ទឹក Remove Makeup មកដុសលាងសម្អាត ហើយទៅលាងមុខមួយតង់ទៀត ដើម្បីជម្រុះធូលីដី ក៏ដូចជាមេរោគដែលអាចជ្រាតចូលតាមរន្ធញើសបង្កឲ្យកើតមុន និងការកើតស្នាមជ្រីវជ្រួញ។
វិធីម្យ៉ាងទៀតគឺតាមបែបធម្មជាតិ ហើយក៏មិនចំណាយលុយ មិនចំណាយពេលវេលាច្រើន នោះគឺលាងសម្អាត ដោយប្រើប្រាស់ចំហាយទឹកក្តៅ។ អ្នកប្រហែលជាមិនជឿ តែវាគឺជាវិធីធម្មជាតិដ៏ល្អមួយក្នុងការយកគ្រឿង Makeup ចេញ ហើយរក្សាសភាពមុខអ្នកទន់និងស្អាត។
អ្នកត្រូវបំពេញធុងតូចមួយដោយទឹកក្តៅ ហើយយកកន្សែងស្អាត ជ្រលក់ទឹកក្តៅឧណ្ឌៗមួយឡែកផ្សេងទៀត មកជូតសម្អាតលើមុខដោយថ្នម តែរក្សាធុងទឹកក្តៅកំពុងហុយផ្សែងនោះ នៅពីក្រោមមុខ ដើម្បីឲ្យវាបំភាយចំហាយទឹកមកខាងលើ។ ស្តាប់ទៅវាអាចស្មុគស្មាញបន្តិច តែវាមិនត្រឹមអាចសម្អាតគ្រឿងសម្អាង ទៀតសោតក៏នឹងអាចបើករន្ធញើសរបស់អ្នកផងដែរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
