« ឆ្នេរពយយាយម៉ៅ ឬឆ្នេរពយយាយមុី » ឆ្នេរធម្មជាតិថ្មីសម្រាប់អ្នកចូលចិត្តស្ងប់ស្ងាត់ គេងបោះតង់លំហែរអារម្មណ៍នៅខេត្តព្រះសីហនុ
« ឆ្នេរពយយាយម៉ៅ ឬឆ្នេរពយយាយមុី » ត្រូវគេស្គាល់ថាជាឆ្នេរថ្មីធម្មជាតិមិនទាន់កែច្នៃ ពោរពេញទៅដោយធម្មជាតិស្រស់ស្អាត ឯបរិយាកាសស្ងប់ស្ងាត់ស្រស់ស្រាយខ្លាំងសម្រាប់អ្នកដែលចង់សម្រាកលំហែអារម្មណ៍។
ឆ្នេរយាយមុី មួយនេះ សំបូរទៅដោយដេីមដូងដុះជាជួរនៅតាមមាត់ឆ្នេរ ទីនោះស្ងប់ស្ងាត់ល្អណាស់ មានកញ្ចុះសម្រាប់អង្គុយលេងតម្លៃបួនមុឺនរៀលក្នុងមួយកញ្ចុះ តែបេីយេីងចង់គេងបោះតង់នៅទីនោះ ដោយគេគិតតម្លៃបោះតង់ ពីរមុឺនរៀល ក្នុងមួយតង់សម្រាប់មួយយប់ (ជាតង់ផ្ទាល់ខ្លួន) ដែលអាចប្រេីទឹកសាប និងបង្គន់អនាម័យ មិនគិតប្រាក់។ ចំពោះអាហារ យេីងគួរខ្ចប់អាហារចំណី ភេសជ្ជ:ទៅញាំនៅទីនោះ ឬអាចកុំម្ម៉ង់បាយម្ហូបនៅទីនោះក៏បានដែរ។ តែសូមរក្សាអនាម័យ និងគ្រប់គ្រងសម្រាមអោយបានល្អ ដេីម្បីភាពស្រស់ស្អាតសម្រាប់យេីងទាំងអស់គ្នាផង។
សម្រាប់ការធ្វើដំណើរទៅកាន់ « ឆ្នេរពយយាយម៉ៅ ឬឆ្នេរពយយាយមុី » អ្នកត្រូវធ្វេីដំណេីរតាមផ្លូវជាតិលេខ ៤ ហួសផ្លូវបំបែកស្រែអំបិល ដល់ចំការដូងប្រេងលោកឧកញ្ញាម៉ុងឬទ្ធី ហួសដូងប្រេងប្រហែលមួយគីឡូ យេីងនឹងឃេីញស្លាកសញ្ញា បត់ចូលផែឧកញ្ញាម៉ុងឬទ្ធីខាងស្តាំដៃ បត់ចូលតាមផ្លូវបេតុងនឹងប្រហែលដប់គីឡូ នៅខាងឆ្វេងដៃ យេីងនឹងឃេីញស្លាកក្រសួងអភិវឌ្ឍន៍ជនបទ នៅចំកណ្តាលផ្លូវ រួចបត់ឆ្វេងតាមស្លាកសញ្ញានេះ ប្រមាណដប់គីឡូនៅតាមផ្លូវយេីងនឹងឃេីញទេសភាពភ្នំជាច្រេីន រហូហួសចំការកៅស៊ូបន្តិច យេីងនឹងឃេីញស្លាកតូច និងស្លាកប្រាប់ពីផ្លូវបត់ខាងស្តាំ ថាទៅឆ្នេរតាបារាំង ឆ្នេរពយយាយមុី និងឆ្នេរខ្សាច់ស យេីងបត់តាមស្លាកនេះរហូត ដល់ស្លាកបត់ស្តាំមួយទៀត ដែលជាស្លាកចូលទៅឆ្នេរខ្សាច់ស យេីងត្រូវទៅត្រង់រហូតដល់មាត់សមុទ្រ ទេីបយេីងបត់ស្តាំ យេីងនឹងចូលទៅដល់ឆ្នេរពយយាយមុី ៕
អត្ថបទកែសម្រួលដោយ៖ ក្នុងស្រុក
រូបថតផ្តល់សិទ្ធដោយ៖ Chamnab Hout
អំពីអ្នកសរសេររបស់យើង៖ Writers
Tel:
ព័ត៌មានថ្មីៗ
