ឧកញ៉ាវេជ្ជបណ្ឌិត គួច ម៉េងលី និងការរំដោះខ្លួនពីភាពក្រីក្រក្នុងនាមជាជនភៀសខ្លួន
ក្នុងនាមជាសហគ្រិន និងជាធុរជនជោគជ័យលើវិសយអប់រំឯកជនមួយរូប លោកឧកញ៉ាវេជ្ជបណ្ឌិត គួច ម៉េងលី ដែលទទួលបានប្រជាប្រិយភាពយ៉ាងខ្លាំងពីសំណាក់មហាជនគ្រប់ស្រទាប់ និងមានឥទ្ធិពលលើការអប់រំគ្រប់ផ្នែកទាំងប្រាជ្ញា ស្មារតី ចំណេះដឹង រួមមានទាំងសុខភាពផ្លូវការ ផ្លូវចិត្ត ផ្លូវអារម្មណ៍ ក៏ដូចជាវិសយជំនួញផងដែរនោះ ក្នុងពេលនេះដែរ លោកឧញ៉ា កំពុងតែបោះជំហានធ្វើដំណើរទៅកាន់សហភាពអឺរ៉ុបបន្ថែមទៀត តាមរយៈបណ្តាញអង្គការមនុស្សធម៌ ដែលលោកនឹងចូលរួមបរិច្ចាគថវិកាផ្ទាល់ខ្លួនដល់អង្គការគ្រប់គ្រងជនភៀសខ្លួននៅក្នុងប្រទេសអ៊ីតាលី ព្រមទាំងចែករំលែកបទពិសោធន៍ផ្ទាល់ខ្លួនដល់បណ្តាជនភៀសខ្លួនទាំងអស់នៅទីនោះទៀតផង។
ក្នុងដំណើរទៅកាន់តំបន់អឺរ៉ុប ដោយចាប់ផ្តើមពីថ្ងៃទី ១៧ ដល់ថ្ងៃទី ២២ ខែមករា ឆ្នាំ ២០២៣ លោកវេជ្ជបណ្ឌិត គួច ម៉េងលី ក៏នឹងត្រូវអនុញ្ញាតឱ្យចូលគាល់សម្ដេចប៉ាប ហ្វ្រង់ស៊ីស នៅវិមានវ៉ាទីកង់ប្រទេសអ៊ីតាលី បន្ទាប់មកទៀតលោកនឹងបន្តចូលរួមកម្មវិធីពិសេសនៅម៉ូណាកូ ដែលជាតំបន់ស្វយ័តនៅប្រទេសបារាំង ព្រមទាំងចូលរួមជាវាគ្មិនកិត្តិយសក្នុងសន្និសីទនៅទីក្រុងប៉ារីស លើប្រធានបទស្តីអំពី «ការកែប្រែជំនឿនេក្ខម្មបារមី និងបរិស្ថានវិទ្យា»។
ក្នុងដំណើរនេះ លោកនឹងលើកឡើងពីដំណើរសន្តិភាពរបស់កម្ពុជានាពេលបច្ចុប្បន្នដែលមិនធ្លាប់មានក្នុងរយៈពេល ៥០០ ឆ្នាំនៃប្រវត្តិសាស្ត្រកម្ពុជា។
លោកឧញ៉ាក៏បានបញ្ជាក់ថា «កម្ពុជាស្ទើរតែក្ស័យដាច់ពូជក្នុងរយៈពេល ៥០០ ឆ្នាំមក យើងមិនដែលមានសន្តិភាពនឹងគ្នានោះទេ។ ក្នុងរយៈពេល ៣០ ឬ ៤០ ឆ្នាំនេះ យើងឃើញថា ប្រទេសយើងមានការរួបរួមជាតិ មានសន្តិភាព មានស្ថិរភាព មានការរួបរួមក្នុងបុព្វហេតុមួយដើម្បីអនាគតកូនខ្មែរ»។
យោងតាមជីវប្រវត្តិផ្ទាល់ខ្លួនដែលបានចុះផ្សាយលើគេហទំព័ររបស់ក្រុមហ៊ុន លោក គួច ម៉េងលី មានស្រុកកំណើតនៅខេត្តបាត់ដំបង។ លោកវេជ្ជបណ្ឌិត គួច ម៉េងលី បានវិលត្រឡប់មកកាន់ប្រទេសកម្ពុជាវិញក្នុងឆ្នាំ ២០០២ ក្នុងនាមជាគ្រូពេទ្យស្ម័គ្រចិត្ត មានតួនាទីជាទីប្រឹក្សាយោបល់នៃគម្រោងសមាហរណកម្មការគ្រប់គ្រងជំងឺកុមារ (Integrated Management of Childhood Illness, IMCI) និងសុខភាពសាធារណៈរបស់អង្គការដៃគូដើម្បីអភិវឌ្ឍន៍ «Partners for Development» ដែលមានមូលដ្ឋាននៅរដ្ឋ Maryland សហរដ្ឋអាមេរិក៕
ព័ត៌មានថ្មីៗ
