ចិត្តវិទ្យាធរណីមាត្រ! ជ្រើសរើសយករូបធរណីមាត្រមួយដើម្បីដឹងអំពីបុគ្គលិកលក្ខណៈរបស់អ្នកផ្ទាល់
ចិត្តវិទ្យាធរណីមាត្រគឺជាការសិក្សាទៅលើមនុស្សទូទៅដែលមានទំនោរឬចាប់ចិត្តទៅលើរូបធរណីមាត្រណាមួយដោយផ្អែកទៅលើអត្តចរិត បុគ្គលិកលក្ខណៈរបស់ពួកគេផ្ទាល់។ ចូរអ្នកជ្រើសរើសយករូបធរណីមាត្រមួយដើម្បីដឹងអំពីបុគ្គលិកលក្ខណៈរបស់អ្នក៖
១. ការេ
អ្នកធ្វើការដែលមិនចេះនឿយហត់ ហើយតែងតែខិតខំដើម្បីសម្តៅរកភាពល្អឥតខ្ចោះ។ អ្នកចូលចិត្តបរិយាកាសដែលមានរបៀបរៀបរយហើយមានអ្វីគ្រប់យ៉ាងដែលអ្នកត្រូវការ ពោលគឺត្រូវតែស្អាត មិនថាជាផ្ទះ ឬកន្លែងធ្វើការរបស់អ្នកនោះទេ ព្រោះវាជួយអ្នកឱ្យផ្តោតអារម្មណ៍កាន់តែប្រសើរឡើង។ អ្នកមានភាពអំណត់អត់ធ្មត់ ហើយចូលចិត្តធ្វើអ្វីឱ្យបានសម្រេច ព្រោះអ្នកមិនពេញចិត្តចំពោះការងារដែលធ្វើឱ្យតែរួចពីដៃឡើយ។
បុគ្គលិកលក្ខណៈ៖
អ្នកមានការតាំងចិត្ត និងឧស្សាហ៍ព្យាយាម
មានរបៀបរៀបរយ ចំណេះដឹង និងការគិតបែបតក្កៈ
ចូលចិត្តភាពល្អឥតខ្ចោះនិងភាពលម្អិត
ទំនោរទៅរកការពន្យារពេលលើការសម្រេចចិត្តសំខាន់ៗណាមួយ
អារម្មណ៍ច្របូកច្របល់ពេលមានជម្លោះ
រឹងរូស ឬពិបាកក្នុងការផ្លាស់ប្តូរ
២. ត្រីកោណ
ត្រីកោណគឺជានិមិត្តសញ្ញានៃភាពជាអ្នកដឹកនាំ និងការផ្តោតអារម្មណ៍។ ដូច្នេះបើអ្នករើសរូបនេះមុនគេ នោះមានន័យថាអ្នកជាមនុស្សដែលផ្ដោតលើគោលដៅរបស់អ្នក ហើយមិនងាយត្រូវកត្តាជុំវិញខ្លួនរំខានដល់ការផ្ចង់អារម្មណ៍របស់អ្នកនោះទេ។ អ្នកជាមនុស្សមានទំនុកចិត្ត ហើយពូកែវោហាសព្ទ។ អ្នកស្អប់ការចាប់កំហុសពីអ្នកដទៃ ព្រោះអ្នកពិបាកនឹងទទួលយកការរិះគន់ទាំងអស់នោះណាស់។ ទោះជាយ៉ាងណាក៏ដោយ ជំនាញរបស់អ្នកអនុញ្ញាតឱ្យអ្នកវិភាគស្ថានភាពបានយ៉ាងឆាប់រហ័ស និងធ្វើការសម្រេចចិត្តបានត្រឹមត្រូវក្នុងជីវិត។
បុគ្គលិកលក្ខណៈ៖
មានមហិច្ឆិតានិងគោលដៅច្បាស់លាស់
ធម្មជាតិជាមនុស្សប្រកួតប្រជែងខ្លាំង
ត្រូវតែត្រឹមត្រូវជានិច្ច
អ្នកដ៏ទៃគោរពកោតខ្លាច
ពូកែដោះស្រាយបញ្ហា
ផ្តោតលើគោលដៅជាក់លាក់
៣. រង្វង់
រង្វង់គឺជានិមិត្តរូបនៃភាពសុខដុម។ ប្រសិនបើអ្នកជ្រើសរើសយករូបរាងមួយនេះបានន័យថាអ្នកជាមនុស្សមានក្តីមេត្តា និងការយល់ចិត្តខ្ពស់ចំពោះអ្នកដ៏ទៃ ហើយអាចជួយចែករំលែកអារម្មណ៍ឈឺចាប់ និងសេចក្តីរីករាយរបស់អ្នកដ៏ទៃបានដែរ។ ជួនកាល អ្នកអាចក្លាយជាមនុស្សដែលមិនសមហេតុសមផល ប៉ុន្តែអ្នកមានភាពច្នៃប្រឌិត និងមានមនោសញ្ចេតនាច្រើន។ អ្នកត្រូវបានគេមើលឃើញថាជាព្រលឹងដែលចិញ្ចឹមបីបាច់ថែរក្សាមនុស្ស ជាពិសេសនៅពេលដែលពួកគេមានបញ្ហាលំបាក។
បុគ្គលិកលក្ខណៈ៖
មានចិត្តមេត្តា និងយកចិត្តទុកដាក់ចំពោះអ្នកដទៃ
ព្យាយាមរក្សាសន្តិភាពក្នុងការទំនាក់ទំនង
អ្នកទំនាក់ទំនងល្អ និងជាអ្នកពូកែស្តាប់
រួសរាយរាក់ទាក់និងមនោសញ្ចេតនា
ជារឿយៗមានអារម្មណ៍ថាសោកសៅ
៤. ចតុកោណកែង
ប្រសិនបើអ្នកបានជ្រើសរើសយករូបចតុកោណកែង បានន័យថាអ្នកមិនពេញចិត្តនឹងជីវិតរបស់អ្នក ហើយកំពុងស្វែងរកការផ្លាស់ប្តូរ។ អារម្មណ៍មិនប្រាកដប្រជា និងការមិនសូវឱ្យតម្លៃខ្លួនឯង ធ្វើឱ្យអ្នកមានអារម្មណ៍ច្របូកច្របល់យ៉ាងខ្លាំង។ ទោះជាយ៉ាងណាក៏ដោយ អ្នកមានភាពក្លាហាន និងចង់សាកល្បងអ្វីដែលអ្នកមិនធ្លាប់បានធ្វើពីមុន។ ស្មារតីស្មោះត្រង់ និងភាពវិជ្ជមានរបស់អ្នកគឺជាអ្វីដែលធ្វើឱ្យអ្នកបន្តដំណើរទៅមុខបាន។
បុគ្គលិកលក្ខណៈ៖
មិនប្រាកដប្រជា ឬខ្វះទំនុកចិត្ត
ពិបាកប៉ាន់ស្មាន
តែងតែស្វែងរកការចំណេះដឹងថ្មីៗ
បើកទូលាយក្នុងការទទួលយកគំនិត និងមនុស្សថ្មីៗ
មានសន្តិភាព និងជៀសវាងជម្លោះ
៥. បន្ទាត់បត់
ប្រសិនបើអ្នកជ្រើសរើសរូបបន្ទាត់បត់ បានន័យថាអ្នកជាមនុស្សបើកចំហ ច្នៃប្រឌិតបំផុត និងពូកែត្រិះរិះរកគំនិតល្អៗ ប៉ុន្តែមិនមែនជាមនុស្សលម្អិតខ្លាំងនោះទេ។ អ្នកមានគំនិតច្រើនទាំងល្អនិងអាក្រក់ តែការគិតទាំងនោះមានរយៈពេលខ្លី ក៏ប៉ុន្តែវាក៏ជានិមិត្តសញ្ញានៃភាពច្នៃប្រឌិតផងដែរ។ ទោះជាយ៉ាងណាក៏ដោយ បន្ទាត់បត់បែនក៏មានន័យថាមនុស្សមិនអាចនៅជាប់នឹងកន្លែងមួយបានយូរដែរ។ ពួកគេធុញទ្រាន់យ៉ាងងាយ ហើយចង់ស្វែងយល់ពីអ្វីដែលគួរឱ្យចាប់អារម្មណ៍ជាច្រើនទៀតដើម្បីសង្កេតនិងទទួលយកបទពិសោធន៍ថ្មីៗ។
បុគ្គលិកលក្ខណៈ៖
ទាក់ទាញ និងសម្បូរគំនិតប្លែកៗ
អាចបង្កើតគំនិតល្អៗ និងថ្មីៗ
តែងតែប្រឈមនឹងស្ថានភាពនាពេលបច្ចុប្បន្ន
ផ្លាស់ប្តូរជានិច្ចកាល
ស្រលាញ់ភាពឯករាជ្យ៕
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
