រកឃើញផ្សិតខ្មែរថ្មីមួយប្រភេទ ល្បីថាចម្លែក តែមានរសជាតិឆ្ងាញ់ និងកំពុងតែពេញនិយមខ្លាំង
មួយរយៈក្រោយមកនេះ ហាក់បីដូចជាមានអ្នកចាប់អារម្មណ៍ទៅលើផ្សិតព្រៃរបស់ខ្មែរយើងម្យ៉ាងដែលមានឈ្មោះថា ផ្សិតកែវ រីឯអ្នកខ្លះវិញក៏ហៅវាថាជាផ្សិតអង្គុញអណ្តែត ដោយសារតែវាមានរូបរាងស្រដៀងទៅហ្នឹងនំអង្គុញអណ្តែតរបស់ខ្មែរយើង តែសម្រាប់វិទ្យាសាស្ត្រវមានឈ្មោះពេញថា Calostoma insigne ។
ដោយផ្សិតមួយនេះមានរូបរាងចម្លែកខុសពីផ្សិតដទៃទៀត ហើយនៅក្នុងប្រទេសកម្ពុជាវាមានដុះនៅតែបរិវេណលើភ្នំ ឬ ជើងភ្នំក្នុងខេត្តមួយចំនួនតែប៉ុណ្ណោះក្នុងប្រទេសកម្ពុជាយើង ជាពិសេសភាគច្រើនវាដុះនៅក្រោមស្លឹកឈើងាប់។
ក្រៅពីមានរូបរាងខុសពីផ្សិតដទៃ វាក៏មានលក្ខណៈពិសេសផ្សេងទៀតផងដែរ រួមមានដូចជា គេទទួលទានឆៅ ចំណែកឯរសជាតិវិញគឺច្រុបៗឆ្ងាញ់ប្លែក។ ហើយជាទូទៅគេច្រើនញុំាវាដូចជាបង្អែមអញ្ចឹង ពោលគឺគ្រាន់តែចិតផ្សិតកែវ លាងទឹកឲ្យស្អាតដាក់ចូលចាន ដាក់ទឹកកក ថែមទឹកដោះគោ ឬស្ករពីលើ ដើម្បីឲ្យមានរសជាតិកាន់តែផ្អែមឆ្ងាញ់។ អ្វីដែលសំខាន់ផ្សិតប្រភេទនេះ ក៏មានដុះលូតលាស់នៅប្រទេសមួយចំនួនដូចជា ថៃ ឥណ្ឌូណេស៊ី និងម៉ាឡេស៊ីផងដែរ៕
រក្សាសិទ្ធដោយ៖ ក្នុងស្រុក (SreyNoch Long)
រក្សាសិទ្ធិដោយ៖ ក្នុងស្រុក
ព័ត៌មានថ្មីៗ
