ធ្វើរឿងទាំង៦យ៉ាងនេះ នៅក្នុងថ្ងៃចូលឆ្នាំថ្មី៣ថ្ងៃខាងមុខនេះអាចបង្កើនភាពរុងរឿងនៃជីវិត
ពិធីបុណ្យចូលឆ្នាំថ្មីប្រពៃណីខ្មែរ ឬសង្ក្រាន្តឆ្នាំថ្មី ២០២២ នឹងមកដល់ក្នុងពេលឆាប់ៗនេះហើយ ហើយនេះក៏ជាពិធីបុណ្យធំមួយរបស់ខ្មែរ សម្រាប់ការធ្វើបុណ្យទានផង សែនទេវត្តាឆ្នាំថ្មីផង និងជាវេលាសម្រាកដ៏រីករាយផងដែរ។ នៅក្នុងថ្ងៃពិសេសនេះ គេក៏មានជំនឿដែរថា ក្រៅពីសែនព្រេនទេវត្តាឆ្នាំថ្មី បើធ្វើរឿងទាំង៦យ៉ាងក្នុងឆ្នាំថ្មីនេះ នឹងនាំសិរីសួស្តី និងរុងរឿងក្នុងជីវិត។
រឿងដែលធ្វើទាំង ៦យ៉ាងនេះ មានដូចជា ៖
១. ទៅវត្តធ្វើបុណ្យទាន ប្រគេនចង្ហាន់ព្រះសង្ឃ
ការធ្វើបុណ្យ ប្រគេនចង្ហាន់ដល់ព្រះសង្ឃ ប្រតិបត្តិព្រះធម៌ វាជាសកម្មភាពមួយដែលបានអនុវត្តជាយូរមកហើយ។ ក្រៅពីការធ្វើបុណ្យដល់អ្នកដែលបានលាចាកលោក ការធ្វើបែបនេះអាចបន្ថែមសេចក្តីសុខដល់ជីវិត ជួយពង្រឹងស្មារតី ដើម្បីចាប់ផ្តើមចូលឆ្នាំថ្មីដោយចិត្តជ្រះថ្លា និងមានតែសេចក្តីសុខ។
២. ពូនភ្នំខ្សាច់
គេមានជំណឿថា ការពូនភ្នំខ្សាច់ អាចបណ្តាច់អស់កម្មពៀរវេរា និងនាំមកនូវសំណាងល្អ សេរីសួស្តីសម្រាប់ឆ្នាំថ្មីផងដែរ។
៣. ព្រលែងសត្វស្លាប ឬលែងត្រី
ការលែងសត្វ ចាត់ទុកថាជាការធ្វើបុណ្យមួយបែបទៀត ដោយត្រូវបានគេជឿថាជា សូមលះបង់នូវអំពើអាក្រក់ រំដោះទុក្ខ រំដោះកម្ម នានា។ តែទោះបីជាធ្វើបុណ្យតាមបែបនេះក្តី គួរសិក្សាពីការដោះលែងសត្វទៅកន្លែងត្រឹមត្រូវ និងរបៀបត្រឹមត្រូវ ព្រោះបើធ្វើមិនត្រូវទេមិនត្រឹមតែមិនបានបុណ្យ តែអាចធ្វើឱ្យសត្វស្លាប់បានទៅវិញនាំតែជាប់បាប។
៤. សូត្រមន្តលើករាសី
តាមទំនៀមទម្លាប់ខ្មែរ ឱ្យតែជិតចូលឆ្នាំថ្មី គេតែងតែធ្វើពិធីបុណ្យសូត្រមន្តលើករាសី និងរំដោះគ្រោះនានា ថែមទាំងអាចធ្វើបុណ្យជូនដូនតា និងខ្មោចអនាថាផងដែរ។
៥. ស្រង់ព្រះពុទ្ធរូប
គេជឿថាការងូតទឹកទឹកស្រង់ព្រះពុទ្ធ វានឹងជួយសម្អាតចិត្តឱ្យស្អាត យករឿងអាក្រក់ៗចេញឆ្ងាយចាប់ពីថ្ងៃចូលឆ្នាំថ្មីផងដែរ។
៦. ស្រោចទឹក
ការឱ្យចាស់ៗ ជាពិសេសម្តាយឪពុក ឬជីដូនជីតា ស្រោចទឹកឱ្យគេជឿថា ជាការសុំអភ័យទោសពីចាស់ទុំ ហើយជាការសុំពរពីអ្នកចាស់ទុំ ឬអ្នកដែលយើងគោរព ដើម្បីភាពរុងរឿងសុខសប្បាយ លាងរឿងហ្មងសៅផងដែរ៕
រក្សាសិទ្ធិដោយ៖ ក្នុងស្រុក
ព័ត៌មានថ្មីៗ
