មិនបាច់អស់លុយច្រើន ផលិតម្សៅខូឡាជែន និងវីតាមីន C ដោយខ្លួនឯងស្រួលចឹងសោះ
វីតាមីនសេ (Vitamin C) ត្រូវបានគេដឹងថា ជាប្រភេទវីតាមីន ដែលផ្ទកនូវ អាស៊ីត L-Ascorbic (L-ascorbic acid) មានប្រយោជន៍ច្រើនយ៉ាងចំពោះសុខភាព និងសម្រស់ ជាពិសេសគឺការប្រឆាំង និងព្យាបាលជំងឺផ្តាសាយ ថែមទាំងជួយឱ្យប្រព័ន្ធការពាររាងកាយកាន់តែរឹងមាំទប់ទល់នឹងមេរោគ វីរុស និងជំងឺផ្សេងៗតែម្តង។ ដោយវីតាមីន C នេះរាងកាយរបស់អ្នកមិនអាចធ្វើការផលិតវាដោយខ្លួនឯងនោះទេ វិធីដែលល្អនោះគឺការទទួលទានចូលទៅក្នុងរាងកាយតាមរយៈគ្រាប់ថ្នាំ អាហារបំប៉ន និងរកឃើញនៅក្នុងបន្លែផ្លែឈើមួយចំនួនផងដែរ ជាពិសេសគឺក្នុងពពួកផ្លែក្រូចគ្រប់ប្រភទ។
ពពួកផ្លែក្រូច ត្បិតតែមានវីតាមីន C ច្រើនក៏ពិតមែន ប៉ុន្តែសារធាតុវីតាមីន C បែរជាមានយ៉ាងច្រើនលើសលប់នៅក្នុងសម្បកក្រូចច្រើនជាងសាច់ផ្លែក្រូចដែលអ្នកទទួលទានទៅវិញ រហូតគេបានរកវិធីម្យ៉ាងដែលអាចទាញប្រយោជន៍ពីសម្បកក្រូចទាំងនោះ ផលិតជាគ្រាប់ថ្នាំ ឬម្សៅសម្រាប់សុខភាពផងដែរ។
ដូច្នេះហើយ មិនបាច់ទិញគ្រាប់ថ្នាំវីតាមីនសេ (Vitamin C) ឬ ម្សៅ ខូឡាជែន នាំតែអស់លុយទេ ថ្ងៃនេះយើងនឹងលើកយកវិធីងាយៗ ក្នុងការផលិតថ្នាំវីតាមីន C ដោយខ្លួនឯង រួមទាំងអត្ថប្រយោជន៍ជាច្រើនមុខទៀត ដូចខាងក្រោម៖
# គុណប្រយោជន៍នៃ វីតាមីនសេ (Vitamin C)
សម្បកក្រូចត្រូវបានគេដឹងថា មានផ្ទុកទៅដោយវីតាមីន C និងជាតិកាកសរសៃហ្វៃ (Fiber) ដ៏ច្រើនលើសលប់ រួមទាំងគុណសម្បត្តិសុខភាពជាច្រើនរួមមាន៖
- ធ្វើការបង្ការ ប្រឆាំង និងព្យាបាលជំងឺផ្តាសាយ
- ជួយដល់ការរីកលូតលាស់កោសិកា និងជាលិការាងកាយ
- សម្បូរទៅដោយសារធាតុប្រឆាំងអុកស៊ីតកម្ម និងប្រឆាំងនឹងរ៉ាឌីកាល់សេរី
- កាត់បន្ថយហានិភ័យ និងការរីកលូតលាស់នៃកោសិកាមហារីកកាចសាហាវ ថែមទាំងជំនួយសុខភាពបេះដូង សរសៃឈាម និងសន្លាក់ផងដែរ
- ធ្វើឱ្យកម្រិតជាតិស្ករក្នុងឈាមថយចុះ ថែមទាំងកាត់បន្ថយសម្ពាធឈាម និងខ្លាញ់កូឡេស្តឺរ៉លមិនល្អ
- ជួយធ្វើឱ្យប្រព័ន្ធភាពស៊ាំកាន់តែរឹងមាំ ទប់ស្កាត់នឹងមេរោគ វីរុស និងជំងឺផ្សេងៗ ជាពិសេសគឺជំងឺគ្រុន និងផ្តាសាយងាយឆ្លងតែម្តង
- ជួយផលិតជាតិខូឡាជែន ជំនួយសុខភាពឆ្អឹង ក្រចក និងសរសៃសក់ឱ្យរឹងមាំ ជាពិសេសជួយធ្វើឱ្យស្បែកស្អាត ក្មេងជាងវ័យ ថែមទាំងគ្មានស្នាមជ្រួញផងដែរ
- ប្រឆាំងនឹងការរលាក រួមទាំងបញ្ហាអាល្លែកក្ស៊ីផ្សេងៗ
- ជំនួយដល់ប្រព័ន្ធរំលាយអាហារឱ្យដំណើរការល្អ ព្រមទាំងជួយដល់ការសម្រកទម្ងន់ រួមទាំងគុណសម្បត្តិជាច្រើនមុខផ្សេងទៀត។
# វិធីធ្វើថ្នាំវីតាមីន C ដោយខ្លួនឯង
អ្នកអាចប្រើប្រាស់ពពួកក្រូចអ្វីក៏បាន ជាពិសេសគឺ ផ្លែក្រូចក្រហម ឬក្រូចពោធិសាត់ ក្រូចឆ្មារ (Lime) ក្រូចឆ្មារសម្បកលឿង(Lemon) និងក្រូចថ្លុងតូច (Grapefruit)។ តែកុំភ្លេចថា ត្រូវតែជ្រើសរើសក្រូចដែលដាំតាមវិធីធម្មជាតិ គ្មានជាតិគីមី ឬបាញ់ថ្នាំដែលប៉ះពាល់ដល់សុខភាពតែប៉ុណ្ណោះ។
ការអនុវត្ត
- ជាដំបូង អ្នកអាចធ្វើការសន្សំសម្បកក្រូចដែលអ្នកចិតប្រុងបោះចោលទុកក្នុងទូទឹកកក រាល់ពេលទទួលទានផ្លែក្រូចម្តងៗ ឬអ្នកចិត/បក យកតែសម្បកភ្លាមៗតែម្តងក៏បាន ក្នុងបរិមាណសមល្មមដែលអ្នកត្រូវការ។
- បន្ទាប់មក យកសម្បកក្រូចនោះទៅហាលឱ្យស្ងួតក្រោមកម្តៅថ្ងៃរហូតក្រៀមល្អ (ប្រសិនជាមានម៉ាស៊ីនកម្តៅឱ្យស្ងួតក៏បានក្នុងសីតុណ្ហភាព 100 °F រយៈពេលមួយថ្ងៃពេញ)
- ក្រោយពីសម្បកក្រូចស្ងួតហើយ អ្នកអាចយកវាមកកិនក៏បាន ក្រឡុក ឬ បុកក៏បាន ធ្វើយ៉ាងណាឱ្យវាក្លាយជាម្សៅហ្មត់ល្អ។
- ជាចុងក្រោយអ្នកអាចយកម្សៅនោះច្រកទុកក្នុងដប ឬក្រឡបិទមាត់ជិត រក្សាទុកក្នុងទូទឹកកកសម្រាប់ប្រើប្រាស់ពេលក្រោយ។
# ការប្រើប្រាស់
- អ្នកអាចទទួលទានម្សៅថ្នាំវីតាមីន C នេះ ក្នុងមួយថ្ងៃ ១ស្លាបព្រាបាយជាប្រចាំ ជារៀងរាល់ថ្ងៃ។ ដោយគ្រាន់តែលាយវានៅក្នុងមុខម្ហូបដែលអ្នកទទួលទានក៏បាន ក្នុងស៊ុប សាឡាត់ បង្អែម និង ភេសជ្ជៈនានា ឬក៏លាយជាមួយនឹងទឹកក្តៅឧណ្ហៗមួយកែវក៏បាន ជាការស្រេច។
បន្ថែម៖ កាន់តែពិសេស ម្សៅសម្បកក្រូចនេះ ក៏អាចយកធ្វើជាម៉ាស់បិទមុខ ដើម្បីទទួលបានស្បែកមុខស រលោង ស្អាត តឹងណែន បំបាត់ស្នាម ជ្រីវជ្រួញ និងធ្វើឱ្យមុខក្មេងជាងវ័យបាន ដោយគ្រាន់តែលាយគ្រឿងផ្សំងាយៗបិទលើមុខ ២០ ទៅ៣០នាទីចាំលាងទឹកចេញជាការស្រេច ជាមួយរូបមន្តទាំង ៣ ខាងក្រោម ៖
រូបមន្តទី១៖ ម្សៅសម្បកក្រូច ១ស្លាបព្រាកាហ្វេ លាយទឹកដោះគោ និងប្រេងដូង
រូបមន្តទី២ ៖ ម្សៅសម្បកក្រូច ១ស្លាបព្រាកាហ្វេ លាយជាមួយនឹងទឹកដោះគោជូរយ៉ាអួ ២ស្លាបព្រាកាហ្វេ
រូបមន្តទី៣ ៖ ម្សៅសម្បកក្រូច ១ស្លាបព្រាកាហ្វេ លាយជាមួយនឹងម្សៅរមៀត ១ចិប និង ទឹកឃ្មុំ ១ស្លាបព្រាកាហ្វេ ៕
អត្ថបទ៖ រក្សាសិទ្ធក្នុងស្រុក (ហាមធ្វើការចម្លងដោយគ្មានការអនុញ្ញាតិ)
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ Writers
Tel:
ព័ត៌មានថ្មីៗ
