ផ្ញើជូនអ្នកផឹកកាហ្វេ ញ័រខ្លួន នេះងាកមកជំនួស ភេសជ្ជៈ ៤ អាចដាស់ស្មារតី ជួយឲ្យខួរក្បាលដើរល្អ
បើទោះបីកាហ្វេជាភេសជ្ជៈជួយដាស់ស្មារតី ជួយឲ្យយើងមានការផ្តោតទៅលើអ្វីមួយបានល្អ តែការទទួលទានច្រើនពេកក៏អាចបណ្តាលឲ្យយើងគេងមិនលក់ មានបញ្ហាឈឺក្បាល ជាដើមផងដែរ។ ដូច្នេះសម្រាប់អ្នកដែលចង់ជំនួសពីការទទួលទានកាហ្វេ ទៅជាភេសជ្ជៈផ្សេង លើគោលដៅតែមួយ គឺដាស់ស្មារតីដដែល អ្នកអាចងាកមកសាកល្បងភេសជ្ជៈទាំង ៤ ខាងក្រោមបាន៖
៤) ទឹក
ស្តាប់ទៅសាមញ្ញ តែមកមើលការបកស្រាយសិន។ ទម្លាប់នៃការទទួលទានទឹក ពេលព្រឹកព្រលឹមជារឿងដែលចាំបាច់ត្រូវធ្វើ ព្រោះវាអាចរំញោចខួរក្បាល ជួយឲ្យសរីរាង្គមួយចំនួនដំណើរការល្អ។
លើកទឹកក្ដៅឧណ្ហ៍ៗ មួយកែវមកទទួលទាន ក្រោយក្រោកពីគេង ក្រៅពីផ្តល់សំណើមដល់ស្បែក ជួយដាស់ប្រព័ន្ធប្រសាទ ជាងនេះក៏ជួយដល់ប្រព័ន្ធរំលាយអាហារថែមទៀតផង។ ក្រៅពីផឹកទឹក ការដាស់ស្មារតីឡើងវិញ អ្នកក៏អាចប្រើទឹកមកលាងមុខ ឬត្រាំជើងជាដើមក៏បាន។
៣) តែបៃតង
នៅក្នុងតែបៃតងមានជាតិ Thiamine ដែលមានសមត្ថភាពបំបាត់ភាពតានតឹង និងជំរុញដល់ខួរក្បាលលើការផ្តោត។ នៅពេលអ្នកមានអារម្មណ៍ហត់នឿយ តានតឹង គ្រាន់តែផឹកតែបៃតង ១ ពែង នោះអ្នកមានអារម្មណ៍ស្វាហាប់ឡើងវិញភ្លាម។
២) ទឹកក្រូចឆ្មារ
នៅពេលអ្នកអស់កម្លាំង ការផឹកទឹកក្រូចឆ្មារមួយកែវ ក៏ជារឿងដែលគួរតែធ្វើផងដែរ។ តែយ៉ាងណា មិនណែនាំឲ្យទទួលទានទឹកក្រូចឆ្មារពេលពោះទទេឡើយ ព្រោះវាមានជាតិអាស៊ីដអាចប៉ះពាល់ដល់ក្រពះ។
យកល្អ ត្រូវផឹកទឹកក្រូចឆ្មារ ឬទឹកក្រូចឆ្មារជាមួយទឹកឃ្មុំ ក្រោយពេលទទួលទានអាហាររួច ៣០ នាទី គឺល្អបំផុត។
១) ខ្ទិះដូងនិងទឹកខ្មេះប៉ោម
ខ្ទិះដូងមានអ៊ីយ៉ុងប៉ូតាស្យូម មានឥទ្ធិពលពង្រឹងសកម្មភាពខួរក្បាល ហើយទឹកខ្មេះប៉ោមអាចការពារការប្រមូលផ្តុំអាស៊ីដឡាក់ឡិកនៅក្នុងខ្លួន។ ដូច្នេះការរួមផ្សំនៃទឹកខ្ទិះដូង និងទឹកខ្មេះប៉ោម គឺអាចជួយឲ្យរាងកាយទទួលបានប្រយោជន៍សំខាន់ជាច្រើន។
វាល្អត្រង់វាមានវីតាមីន B និងសារធាតុ Probiotics ជួយបង្កើនថាមពលរាងកាយផង ហើយជួយឲ្យអ្នកមានអារម្មណ៍មិនងងុយគេង និងអាចផ្តោតអារម្មណ៍បានល្អផង៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
