ទោះ Roma ឈ្នះ តែ Mourinho ត្រូវអស់លុយពីហោប៉ៅជិត ១ ពាន់ដុល្លារ ដោយសាររឿងនេះ
អ្នកចាត់ការលោក Jose Mourinho បានដឹកនាំក្លឹប AS Roma យកឈ្នះ ២-០ ទៅលើក្លឹប Geona សម្រាប់ការប្រកួតកាលពីពេលកន្លងទៅ។ ជ័យជម្នះយកបាន ៣ ពិន្ទុ រុញឲ្យក្រុមឡើងទៅឈរនៅលេខ ៥ កើតឡើងចេញពីគ្រាប់បាល់ពីរគ្រាប់ផ្ទួនគ្នារបស់កីឡាករវ័យក្មេង Felix Afena-Gyan ដែលមានវ័យ ទើបតែ ៨១ ឆ្នាំ។
យ៉ាងណាក្រោយចប់ការប្រកួត អ្នកចាត់ការរហស្សនាម "Special One" ក៏បែរជាត្រូវអស់លុយពីហោប៉ៅប្រមាណ ៨០០ អឺរ៉ូ ឬជិត ១ ពាន់ដុល្លារទៅវិញ។ នោះក៏ដោយសារតែត្រូវធ្វើតាមពាក្យសន្យាមុនការប្រកួត ជាមួយនឹង Afena-Gyan។
គ្រូសញ្ជាតិព័រទុយហ្គាល់ បានសន្យាថា ប្រសិនណាកីឡាករវ័យ ១៨ ឆ្នាំ អាចរកបានគ្រាប់បាល់ នោះលោកនឹងទិញស្បែកជើងបាល់ទាត់ដែលមានតម្លៃថ្លៃបំផុតមួយគូ ជាកាដូឲ្យគេ ហើយឥឡូវរកបានគ្រាប់បាល់ ដូច្នេះហើយសម្រាប់អតីតគ្រូ Chelsea ក៏គោរពពាក្យសន្យា លុះដល់ថ្ងៃបន្ទាប់ក៏ទៅទិញស្បែកជើងមួយគូ មកឲ្យកីឡាករសញ្ជាតិហ្គាណាពិតមែន។
គួរបញ្ជាក់ថា យុវជនលេងតំណែងប្រយុទ្ធកណ្តាលខាងលើ ជាអតីតកីឡាករលេងឲ្យថ្នាល U19 របស់ Roma ហើយក៏ទើបតែឡើងមកឈុតធំ នៅខែតុលា កន្លងទៅនេះ។ស្ថិតិនៃការបង្ហាញខ្លួនរបស់គេ ៣ ប្រកួតនៅ Serie A រកបាន ២ គ្រាប់ ជាមួយការឈរជើងសុទ្ធ ៩២ នាទីលើទីលាន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
