ភ្នែកមុតណាស់! Xavi ឲ្យថ្នាក់លើ Barca ចាយ ៥ លានផោនថ្ពក់យកម្នាក់នេះ មកជំនួស Aguero
អនាគតរបស់ Sergio Aguero កំពុងស្ថិតក្រោមមន្ទិលសង្ស័យ ដោយប្រសិនជាសម្រាកព្យាបាលក៏ត្រូវការពេលយូរច្រើនខែទៅមុខទៀតដែរ ហើយមួយវិញទៀតក៏មានភាគរយអាចនឹងត្រូវចូលនិវត្តពីអាជីពបាល់ទាត់ត្រឹមប៉ុណ្ណេះ ក្រោយកើតមានជំងឺបេះដូង។
ខាងក្លឹប Barcelona ក៏មានន័យថា ពួកគេត្រូវបន្តជួបបញ្ហា ដោយនឹងខ្វះខាតកីឡាករលេងតំណែងប្រយុទ្ធ ហើយឥឡូវលឺថាត្រៀមចាយលុយ ៥ លានផោន ដើម្បីបំពេញចិត្តគ្រូថ្មី Xavi Hernandez។ តាមការណែនាំពីគ្រូសញ្ជាតិអេស្ប៉ាញផ្ទាល់ បានស្នើទៅថ្នាក់លើឲ្យរៀបចំកញ្ចប់លុយដើម្បី ចរចាយកកីឡាករដែលជំនាញខាងបញ្ចប់ទី ចេញពីក្លឹបបិសាចក្រហម Manchester United។
នោះគឺ Edinson Cavani ដែលគេត្រូវផុតកុងត្រានាបញ្ចប់រដូវកាល ២០២១/២២ តែខាងក្លឹបអ្នកមានបុណ្យចង់បានគេ ត្រឹមខែមករាខាងមុខ ដើម្បីមកដោះស្រាយចន្លោះប្រហោងបន្ទាន់នៅតំបន់ប្រយុទ្ធ។ ខាងក្លឹបយក្សនៅក្របខ័ណ្ឌ La Liga នឹងចរចាលើកញ្ចប់លុយ ៥ លានផោន តែមិនទាន់ច្បាស់ថា ភាគីក្លឹបអាណាព្យាបាល Man Utd ព្រមព្រៀងឬបែបណាឡើយ។ នេះបើតាមសារព័ត៌មាន The Mirror បានចុះផ្សាយ។
រំឭកដែរថា បុរសវ័យ ៣៤ ឆ្នាំ បានផ្ទេរមកក្លឹបម្ចាស់ដី Old Trafford កាលពីខែតុលា ឆ្នាំ ២០២០ ដោយស្ថិតិបង្ហាញខ្លួនសរុប ៤៧ ប្រកួត គេរកបាន ១៨ គ្រាប់និង Assist ៦ លើក។ យ៉ាងណាក្រោយ Ronaldo មកដល់ គេមិនសូវបានលេងនោះទេ ហើយក៏មិនមានតម្រុយនៃការបន្តកុងត្រាថ្មីដែរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
