អាយុច្រើនប៉ុណ្ណាក៏នៅតែមើលឃើញក្មេង បើអ្នកអនុវត្តទម្លាប់ ៤ នេះជាប់មុនចូលគេង
ដោយគ្រាន់តែអនុវត្តទម្លាប់មួយចំនួនខាងក្រោម មុនពេលចូលគេង នោះអ្នកនឹងអាចធានាពីការទទួលបានស្បែកដែលមានសុខភាពល្អ ក្មេងជាងវ័យ មិនថាតែអ្នកស្ថិតនៅអាយុច្រើនប៉ុណ្ណាទេ៖
៤) លុបលាងគ្រឿងសម្អាង
មនុស្សស្រីក្រោយធ្វើការហត់ពេញមួយថ្ងៃ ខ្លះទៅឃើញគ្រែ ដាក់ខ្លួនតែមួយភ្លែត តែបើកភ្នែកឡើងភ្លឺ ហើយផ្ទៃមុខនៅជាប់គ្រឿងសម្អាងដល់ព្រឹកថ្ងៃបន្ទាប់។ ទម្លាប់នេះវាធ្វើឲ្យស្បែកមិនបានសម្រាកនោះទេ ជាហេតុនាំឲ្យស្បែកឆាប់ឡើងមុន និងរោល។
ល្អបំផុតគួរតែមានទម្លាប់លុបលាងគ្រឿងសម្អាងមុនពេលចូលគេង ដើម្បីជួយបង្រួមរន្ធញើស ជួយបង្កើតកោសិកាស្បែកឡើងវិញ។ កាន់តែល្អបន្ថែមទៀតនោះ ក្រោយលាងមុខហើយ គួរមានរបស់ជំនួយមកលាបបន្ថែម និងម៉ាស្សាថ្នមៗ ដើម្បីបន្ថែមសារធាតុចិញ្ចឹមដល់ស្បែក។
៣) ប្រើផលិតផលប្រឆាំងភាពចាស់
ចាប់ពីអាយុ ២២ ឆ្នាំឡើងទៅ សញ្ញានៃភាពចាស់របស់ស្រ្តី ចាប់ផ្តើមរំលេចចេញមកបណ្តើរៗហើយ។ ដូច្នេះអ្នកគួរមានផលិតផលបន្ថែមជាតិកូឡាជែនមកកាន់រាងកាយ ដើម្បីជួយចិញ្ចឹមស្បែកធ្វើឲ្យស្បែកភ្លឺថ្លា និងភ្លឺរលោងក្មេង ជាងវ័យ។
ផលិតផលបន្ថែមកូឡាជែនមកកាន់រាងកាយ គឺសំខាន់ខ្លាំងណាស់ ព្រោះវាមានឥទ្ធិពលប្រឆាំងនឹងភាពចាស់នៃស្បែក ក៏ដូចជាសរីរាង្គមួយចំនួនលើរាងកាយ។
២) កុំប្រើទូរស័ព្ទ
ជៀសវាងការប្រើប្រាស់ឧបករណ៍អេឡិចត្រូនិកនៅពេលយប់ ព្រោះពន្លឺពណ៌ខៀវជះចេញពីអេក្រង់របស់វា អាចធ្វើឲ្យមានគ្រោះថ្នាក់ខ្លាំងមកលស្បែក។ វាក៏បង្កើនល្បឿនប្រតិកម្មអុកស៊ីតកម្ម និងបន្ថយល្បឿននៃការជួសជុលរបាំងស្បែក ធ្វើឲ្យយើងងាយនឹងចាស់មុនអាយុថែមទៀតផង។
១) យកចិត្តទុកដាក់លើការគេង
ការគេង ក៏ត្រូវជ្រើសរើសរបៀបនៃការគេងឲ្យបានត្រឹមត្រូវផងដែរ។ ចូរជៀសវាងការគេងផ្កាប់មុខ ព្រោះវាងាយធ្វើឲ្យកើតមានស្នាមជ្រីវជ្រួញ ដូច្នេះគួរទម្លាប់គេងផ្ងារ ហើយបើចង់គេងលក់ស្រួលស្កប់ស្កល់ គួរយកខ្នើយមួយមកកល់ក្រោមគន្លាក់ជង្គង់ទាំងសងខាង៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
