អាហារទិព្វ ៤ ងាយស្រួលរក អាចកាត់បន្ថយកូលេស្តេរ៉ុលអាក្រក់ ការពារជំងឺគាំងបេះដូង
តាមរយៈការផ្លាស់ប្តូររបបអាហារ ដោយប្តូរមកទទួលទានអាហារទាំង ៤ ខាងក្រោមនេះ គឺវាអាចជួយកាត់បន្ថយកូលេស្តេរ៉ុលអាក្រក់ ហើយជួយរក្សាកម្រិតកូលេស្តេរ៉ុលក្នុងឈាមបានល្អ៖
៤) សណ្តែកសៀង
វាជាអាហារដែលមានប្រយោជន៍ដល់បេះដូង ដោយកាត់បន្ថយខ្លាញ់ឆ្អែតក្នុងរាងកាយ ដែលវាពាក់ព័ន្ធនឹងការបញ្ចុះកូលេស្តេរ៉ុលអាក្រក់។ ខ្លាញ់ឆ្អែតដែលមានលើសក្នុងរាងកាយ រមែងកើតចេញពីការទទួលទានលើសលប់នៅទឹកដោះគោ បឺ Cream សាច់ជ្រូក សាច់គោជាដើម។
៣) ផ្លែបឺរ
ជាប្រភពដ៏ល្អនៃខ្លាញ់ monounsaturated វាជួយកាត់បន្ថយកម្រិតកូលេស្តេរ៉ុលអាក្រក់ LDL ល្អបំផុតចំពោះអ្នកលើសទម្ងន់ ឬធាត់ បន្ថែមពីនេះវាក៏ជួយបង្កើនកម្រិតកូលេស្តេរ៉ុលល្អ HDL មកវិញផងដែរ។
លើសពីនេះផ្លែបឺរសម្បូរទៅដោយប្រូតេអ៊ីន ជាតិសរសៃ វីតាមីន B K និងសារធាតុរ៉ែ។ យកល្អគួរទទួលទានផ្លែបឺរយ៉ាងហោចណាស់ពាក់កណ្តាលនៃផ្លែរៀងរាល់ថ្ងៃ តាមរយៈការបន្ថែមវាទៅក្នុងអាហារ ឬបន្លែផ្សេងៗក៏បាន។
២) តែបៃតង
ការផឹកតែបៃតង ២-៣ ពែងរៀងរាល់ថ្ងៃ គឺជាវិធីសាមញ្ញបំផុតមួយ ដើម្បីកាត់បន្ថយកម្រិតកូលេស្តេរ៉ុលអាក្រក់ LDL ជាពិសេសល្អបំផុតសម្រាប់មនុស្សវ័យចំណាស់។ លើសពីនេះវាក៏ជាភេសជ្ជៈ ដែលជួយការពារការកកស្ទះនៃសរសៃឈាម កាត់បន្ថយហានិភ័យនៃការកើតជំងឺគាំងបេះដូង ឬដាច់សរសៃឈាមខួរក្បាល។
១) ទឹកក្រូចច្របាច់
តាមការស្រាវជ្រាវពីអ្នកជំនាញនៅសហរដ្ឋអាមេរិកបង្ហាញថា វីតាមីន C ហ្វូឡាដ និងសមាសធាតុ Flavonoid ក៏ដូចជា Hesperidin ដែលមានក្នុងផ្លែក្រូច គឺសុទ្ធតែល្អសម្រាប់រាងកាយ ដោយវាអាចជួយរក្សាកម្រិតតុល្យភាពកូលេស្តេរ៉ុលល្អ។ ជាការណែនាំ អ្នកគួរទទួលទានទឹកក្រូចច្របាច់ ២-៣ កែវ ឬផ្លែក្រូចស្រស់ ២-៣ ផ្លែរៀងរាល់ថ្ងៃ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
