ប្រភេទឈាម អាចបង្ហាញពីបុគ្គលិកលក្ខណៈ និងស្ថានភាពសុខភាពរបស់មនុស្សម្នាក់ៗ!
នៅក្នុងការស្រាវជ្រាវរបស់ប្រទេសជប៉ុនបានអោយដឹងថាប្រភេទឈាម O ឈាម A ឈាម B និងឈាម AB មានទំនាក់ទំនងជាមួយនឹងបុគ្គលិកលក្ខណៈរបស់មនុស្សយើងយ៉ាងជ្រាលជ្រៅ រហូតដល់មានការសិក្សាស្រាវជ្រាវជាច្រើនផ្សេងទៀត បង្ហាញថាប្រភេទឈាម ក៏អាចបញ្ជាក់ពីស្ថានភាពសុខភាពបានដែរ។សូមតាមដានការបកស្រាយដូចខាងក្រោមនេះ ទាំងអស់គ្នា ៖
១. ប្រភេទឈាម O
- បុគ្គលិកលក្ខណៈល្អ ៖ អ្នកជាមនុស្សមានមហិច្ឆតាខ្ពស់ រឹងមាំ មានទំនុកចិត្តលើខ្លួនឯង និងមានដុងជាអ្នកដឹកនាំពីកំណើត។ អ្នកក៏ជាមនុស្សចុះចំណោមគេ បត់បែនបានគ្រប់ស្ថានការណ៍ សម្របបានគ្រប់កាលៈទេសៈ ចូលចិត្តការប្រកួតប្រជែង និងខិតខំប្រឹងប្រែងផ្តោតលើគោលដៅក្នុងជីវិតបំផុត។
- បុគ្គលិកលក្ខណៈមិនល្អ ៖ ជាមនុស្សដែលឫក ចូលចិត្តថាខ្លួនលើសគេ មិនសូវមានមេត្តា និងមុខក្រាស់បន្តិច។
- ស្ថានភាពសុខភាព ៖ អ្នកមានឈាមប្រភេទ O ទំនងជាប្រឈមនឹងជំងឺផ្សេងៗទាក់ទងនឹងដំបៅលើសរីរាង្គ និងមេរោគអាសន្នរោគខ្ពស់។ ផ្ទុយពីអ្នកមានឈាមប្រភេទ A អ្នកមានឈាម O ជាចំណីដ៏ពិសេសរបស់សត្វមូស។ ទោះជាយ៉ាងណា សម្រាប់ជំងឺមហារីកលំពែង និងជំងឺគ្រុនចាញ់ នៅតែមានហានិភ័យទាបជាងគេ បើធៀបនឹងប្រភេទឈាមទាំងអស់។
២. ប្រភេទឈាម A
- បុគ្គលិកលក្ខណៈល្អ ៖ ជាមនុស្សអភិរក្សនិយម មានស្តង់ដារខ្ពស់ តែងតែរៀបចំគម្រោងទុកជាមុន និងអនុវត្តយ៉ាងម៉ត់ចត់ ប្រកបដោយយុត្តិធម៌។ អ្នកជាមនុស្សចូលចិត្តភាពស្ងៀមស្ងាត់ មានភាពអត់ធ្មត់ខ្លាំង និងគោរពពេលវេលាណាស់។
- បុគ្គលិកលក្ខណៈមិនល្អ ៖ ជាមនុស្សគិតស្រមៃច្រើន រឹងរូស ខ្លាចនេះខ្លាចនោះ និងខឹងអាក្រក់។
- ស្ថានភាពសុខភាព ៖ អ្នកមានប្រភេទឈាមនេះ មានហានិភ័យកកើត ជំងឺមហារីកលំពែង និងជំងឺមហារីកឈាមខ្ពស់។ ជាងនេះទៅទៀត អ្នកអាចឆ្លងមេរោគអុតស្វាយ និងមេរោគជំងឺគ្រុនចាញ់បានយ៉ាងងាយ។ ប៉ុន្តែ សត្វមូស មិនចូលចិត្តខាំអ្នកមានឈាមប្រភេទ A នេះទេ។
៣. ប្រភេទឈាម B
- បុគ្គលិកលក្ខណៈល្អ ៖ អ្នកជាមនុស្សពោរពេញដោយគំនិតច្នៃប្រឌិត មានគំនិតសុទិដ្ឋិនិយម បត់បែនបានគ្រប់កាលៈទេសៈ មើលចិត្តមនុស្សបានយ៉ាងច្បាស់ មានគោលដៅច្បាស់ និងធ្វើគ្រប់យ៉ាងដើម្បីសម្រេចគោលដៅនោះ។ អ្នកក៏ជាមនុស្សចុះចំណោមគេ និងរាប់អានមនុស្សជុំវិញបានយ៉ាងងាយ។
- បុគ្គលិកល្ខណៈមិនល្អ ៖ ជាមនុស្សចិត្តដាច់ មិនយកចិត្តទុកដាក់ មិនមានទំនួលខុសត្រូវ និងគិតតែខ្លួនឯងច្រើនជាង។
- ស្ថានភាពសុខភាព ៖ សម្រាប់អ្នកមានប្រភេទឈាម B ហានិភ័យនៃជំងឺបេះដូង គឺខ្ពស់ជាងប្រភេទឈាមទាំងអស់ដល់ទៅ ១១% ។ ប៉ុន្តែ អ្នកមានប្រភេទឈាមនេះ មានពពួកបាក់តេរីល្អជាង ប្រភេទឈាម A និង O ជិត ៥០,០០០ ដងឯណោះ។
៤. ប្រភេទឈាម AB
- បុគ្គលិកលក្ខណៈល្អ ៖ អ្នកជាមនុស្សឡូយឆាយ អត់ធ្មត់ សមហេតុសមផល តែងរៀបចំគម្រោងនិងផែនការទុកយ៉ាងម៉ត់ចត់ មានទំនួលខុសត្រូវខ្ពស់ ទុកចិត្តបាន និងចូលចិត្តជួយអ្នកដទៃ ប៉ុន្តែលាក់អារម្មណ៍ច្រើនបន្តិច។
- បុគ្គលិកលក្ខណៈមិនល្អ ៖ ជាមនុស្សមិនសូវរួសរាយប៉ុន្មានទេ ខឹងច្រើន រិះគន់ច្រើន តែងតែមានអារម្មណ៍រុញរា និងមិនងាយអភ័យទោសឲ្យនរណាម្នាក់ឡើយ។
- ស្ថានភាពសុខភាព ៖ នារីដែលមានប្រភេទឈាម AB នៅពេលមានផ្ទៃពោះ នឹងកើតមានបញ្ហាទាក់ទងនឹងសម្ពាធឈាមឡើងខ្ពស់ ហៅថា Pre-eclampsia ។ ជាពិសេស បើធៀបទៅនឹង អ្នកមានឈាមប្រភេទ O អ្នកមានឈាម AB មានជំងឺបេះដូងខ្ពស់ជាង ២៣% ឯណោះ៕
ប្រែសម្រួលដោយ៖ ក្នុងស្រុក
ព័ត៌មានថ្មីៗ
